ខេត្តកណ្ដាល៖ បេក្ខជនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ១រូប មានបញ្ហាសុខភាពដោយមានអាការៈវិលមុខ អស់កម្លាំង ទទួលបានការសម្របសម្រួលដាក់ឱ្យប្រឡងនៅបន្ទប់ដាច់ដោយឡែក នៅមណ្ឌលវិទ្យាល័យទេពប្រណម ក្នុងខេត្តកណ្ដាល។
យោងតាមការចុះផ្សាយរបស់អង្គភាពប្រឆាំងអំពើពុករលួយ (ACU) បានឱ្យដឹងថានៅវេលាព្រឹកថ្ងៃទី២៨ ខែសីហា ឆ្នាំ២០២៥ ក្នុងមណ្ឌលវិទ្យាល័យទេពប្រណម មានករណីបេក្ខជនឈ្មោះ ស៊ឹម សុវណ្ណារាជ ភេទប្រុស លេខបន្ទប់ ២០ លេខតុ ៤៨៥ កំពុងមានជំងឺគ្រុនឈាម រយៈពេល ៤ថ្ងៃ និងមានអាការៈវិលមុខ អស់កម្លាំង ដូច្នេះបេក្ខជនបានស្នើសុំប្រឡងនៅបន្ទប់ដាច់ដោយឡែក ដោយមានការឯកភាពពីប្រធានមណ្ឌល និងតាមរយៈការវាយតម្លៃពីគ្រូពេទ្យប្រចាំមណ្ឌលផងដែរ។
ជាមួយគ្នានេះ ក្រសួងអប់រំ យុវជន និងកីឡា ជំរុញលើកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបានលទ្ធផលល្អប្រសើរក្នុងការប្រឡង៕