យោងតាមមន្ទីរពេទ្យកាល់ម៉ែត បានឱ្យដឹងថា ទារកធម្មតាគួរតែមានទម្ងន់ចាប់ពី ២,៥ គីឡូក្រាម ឡើងទៅ។ ប្រសិនបើទារកមានទម្ងន់តិចជាងនេះ ត្រូវបានចាត់ទុកថាជាទារកមិនគ្រប់គីឡូ ដែលអាចបែងចែកជាកម្រិតដូចតទៅ៖
- មិនគ្រប់គីឡូធម្មតា: តិចជាង ២.៥០០ ក្រាម។
- ធ្ងន់ធ្ងរ: តិចជាង ១.៥០០ ក្រាម។
- ធ្ងន់ធ្ងរខ្លាំង: តិចជាង ១.០០០ ក្រាម។
ទារកកើតមិនគ្រប់គីឡូ មិនថាកើតគ្រប់ខែ ឬមិនគ្រប់ខែទេ គឺអាចប្រឈមមុខនឹងគ្រោះថ្នាក់ជាច្រើន។
១. គ្រោះថ្នាក់មុនពេលសម្រាល
ប្រសិនបើទារកមិនគ្រប់គីឡូខ្លាំង ពួកគេអាចមានសភាពខ្សោយតាំងពីក្នុងពោះដោយសារ កង្វះអាហារូបត្ថម្ភ ឬ ការបង្ករោគ។ ក្នុងករណីធ្ងន់ធ្ងរ ទារកអាចមានចង្វាក់បេះដូងខ្សោយ, កើតមកសន្លប់ ឬអាចឈានដល់ការស្លាប់ក្នុងផ្ទៃទៀតផង។
២. គ្រោះថ្នាក់ក្រោយពេលសម្រាល
ទារកដែលកើតមកតូច ងាយនឹងប្រឈមមុខនឹងបញ្ហាជាច្រើនដូចជា៖
- បញ្ហាប្រព័ន្ធរំលាយអាហារ: ធ្វើឱ្យទារកកាន់តែខ្សោយ និងមិនងាយឡើងទម្ងន់។
- បញ្ហាអាកាសធាតុ: ងាយចុះកម្ដៅក្នុងខ្លួនខ្លាំង (hypothermia)។
- បញ្ហាជាតិស្ករ និងកាល់ស្យូម: ងាយចុះជាតិស្ករ (hypoglycemia) និងចុះជាតិកាល់ស្យូម (hypocalcemia)។
- ឡើងលឿង: ងាយកើតជំងឺឡើងលឿង (jaundice)។
សម្រាប់អ្នកម្ដាយដែលមានផ្ទៃពោះ សូមយកចិត្តទុកដាក់លើរបបអាហារ និងការថែទាំសុខភាពឱ្យបានល្អ ដើម្បីការពារកុំឱ្យទារកមានទម្ងន់មិនគ្រប់នៅពេលកើត៕