គ្រូពេទ្យស្ម័គ្រចិត្តយុវជនសម្តេចតេជោ បានប្រកាសនារសៀលថ្ងៃទី២៦ ខែសីហានេះថា ៖ បន្ទាប់ពីទទួលបានការវះកាត់ព្យាបាលជំងឺដុំសរសៃឈាម (Hemangioma) ដោយជោគជ័យ ពេលនេះក្មួយស្រី «រក្សា» បានវិលត្រឡប់មកកម្ពុជា រស់នៅជួបជុំជាមួយក្រុមគ្រួសារវិញហើយ។
ជាភ័ព្វសំណាងខ្ពស់បំផុតរបស់ «រក្សា» ដែលទទួលបានក្តីអាណិត មេត្តា ករុណា និងការយកចិត្តទុកដាក់យ៉ាងជ្រាលជ្រៅបំផុតរបស់ «សម្តេចមហាបវរធិបតី ហ៊ុន ម៉ាណែត» និង«លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត» តាមរយៈក្រុមគ្រូពេទ្យ នៃសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) សហការជាមួយក្រុមគ្រូពេទ្យរបស់អង្គការឆឺជី (Tzu Chi) បានបញ្ជូនក្មួយស្រី «រក្សា» ទៅវះកាត់ព្យាបាលជំងឺដុំសរសៃឈាម (Hemangioma) នៅមន្ទីរពេទ្យឆឺជី-តាលីន រដ្ឋធានីតៃវ៉ាន់ តាំងពីខែតុលា ឆ្នាំ២០២៤ រហូតដល់ទទួលបានជោគជ័យនៅថ្ងៃនេះ ។
រាល់ការចំណាយលើការព្យាបាល ការហូបចុក និងការស្នាក់នៅក្នុងអំឡុងពេលព្យាបាល គឺជាបន្ទុកដ៏ថ្លៃថ្លាបំផុតរបស់ «សម្តេចធិបតី» និង«លោកជំទាវបណ្ឌិត» ។
ពេលនេះ ក្មួយស្រី «រក្សា» មានសុខភាពល្អមាំមួន និងសូមគោរពអរគុណ និងដឹងនូវគុណូបការៈដ៏ធំធេងរបស់ «សម្តេចមហាបវរធិបតី» និង «លោកជំទាវបណ្ឌិត» ហើយក្មួយស្រីដោយភ្ជាប់ជាមួយក្តីសង្ឃឹមថ្មីនេះ សូមសន្យាថានឹងខិតខំរៀនសូត្រដើម្បីក្លាយជាធនធានមនុស្សសម្រាប់ជាតិ ៕