ខេត្តសៀមរាប៖ ទារក-កុមារ នឹងទទួលបានការវះកាត់ដុំសាច់ក្នុងខួរក្បាល ខួរឆ្អឹងខ្នង ដោយម៉ាស៊ីនទំនើបមុនដំបូងបង្អស់ ដែលនឹងត្រូវដាក់ឲ្យដំណើរការនៅដើមខែកញ្ញាខាងមុននេះ នៅមន្ទីរពេទ្យគន្ធបុប្ផាភ្នំពេញ។
យោងតាមការចុះផ្សាយរបស់មន្ទីរពេទ្យគន្ធបុប្ផា បានឱ្យដឹងនៅថ្ងៃទី២៥ ខែសីហានេះ ថា មន្ទីរពេទ្យគន្ធបុប្ផា បានវិនិយោគនិងដំណើរការវះកាត់ប្រព័ន្ធប្រសាទជាមួយ ម៉ាស៊ីន Neurosurgical Microscope ម៉ូដែល ZEISS KINEVO 900 ដែលជាម៉ាស៊ីនមីក្រូស្កុបវះកាត់ដ៏ទំនើបបំផុតជំនាន់ថ្មី របស់ប្រទេសអាល្លឺម៉ង់ ដែលល្បីល្បាញ និងមានការទទួលស្គាល់ទូទាំសកលលោក សម្រាប់ឆ្លុះមើល និងជួយដល់ការងារវះកាត់ ផ្នែកសរសៃប្រសាទ -ខួរក្បាល និង ខួរឆ្អឹងខ្នង ប្រកបដោយប្រសិទ្ធភាពខ្ពស់ និងសុវត្ថិភាពខ្ពស់បំផុត។
ម៉ាស៊ីនមីក្រូស្កូបនេះ ជាម៉ាស៊ីនទំនើបមុនដំបូងបង្អស់ ដែលត្រូវដាក់ឲ្យដំណើរការនៅប្រទេសកម្ពុជា ហើយនឹងត្រូវដំណើរការជាមួយក្រុមគ្រូពេទ្យជំនាញកម្ពុជា នាថ្ងៃទី១ កញ្ញាឆ្នាំ២០២៥ ខាងមុននេះ នៅមន្ទីរពេទ្យគន្ធបុប្ផាភ្នំពេញ។
«ជីវិតទារក-កុមារម្នាក់ គឺជីវិតមួយ។ ការវះកាត់ដុំសាច់ក្នុងខួរក្បាល និងប្រព័ន្ធប្រសាទ ជាការវះកាត់ដោយបច្ចេកទេសខ្ពស់ និងធ្វើឱ្យបានប្រសិទ្ធភាពខ្ពស់ ព្រមទាំងកាត់បន្ថយជាអតិបរិមា នូវការប៉ះពាល់ខូចខាតសរសៃជាលិកាប្រសាទ ជាមួយការប៉ិនប្រសប់ និងឧបករណ៍វះកាត់ទំនើប»។ នេះជាការបញ្ជាក់របស់មន្ទីរពេទ្យគន្ធបុប្ផា៕