ខេត្តសៀមរាប៖ ទារិកាតូច និងខ្ចីបំផុត សម្រាលដោយមិនគ្រប់ខែ ទទួលបានការសង្គ្រោះបន្ទាន់ឱ្យរស់រានមានជីវិត នៅមន្ទីរពេទ្យគន្ធបុប្ផាខេត្តសៀមរាប។
យោងតាមការចុះផ្សាយរបស់មន្ទីរពេទ្យជ័យវរ្ម័នទី៧ខេត្តសៀមរាប បានឱ្យដឹងថាទារិកាតូច និងខ្ចីបំផុត សម្រាលដោយមិនគ្រប់ខែ នៅអាយុគភ៌ត្រឹមតែ២៧សប្តាហ៍ និងទម្ងន់តែ០,៩គីឡូក្រាមប៉ុណ្ណោះ ត្រូវបានសង្គ្រោះ និងដាក់ឱ្យសម្រាកព្យាបាល ថែទាំ នៅផ្នែកសង្គ្រោះទារក (NICU) នៃមន្ទីរពេទ្យជ័យវរ្ម័នទី៧ខេត្តសៀមរាប សរុបចំនួន៤៥ថ្ងៃ។
បើតាមប្រភពខាងលើ បានបញ្ជាក់ថា ទារិការូបនេះ បានសម្រាលតាមផ្លូវធម្មជាតិ ពីម្តាយអាយុ២៧ឆ្នាំ ហើយត្រូវបានដាក់ឱ្យសម្រាកព្យាបាល ក្នុងប្រអប់កម្តៅ និងសំណើម (Incubator) ចំនួន៤០ថ្ងៃ ព្រមទាំងទទួលជំនួយដង្ហើមដោយពីម៉ាស៊ីន (CPAP) សរុប ៣១ថ្ងៃ នៅសាលសង្គ្រោះទារកបន្ទាន់ទារក (NICU)។
ជាមួយគ្នានេះអ្នកជំងឺ ត្រូវបានក្រុមវេជ្ជបណ្ឌិតឯកទេស និងគិលានុបដ្ឋាក បានមើលថែទាំដោយយកចិត្តទុកដាក់ ព្រមទាំងបានណាត់តាមដានសុខភាពទារកជាបន្តបន្ទាប់ និងរកឃើញថា ទារកមានសុខភាពល្អ លូតលាស់ប្រក្រតី។
សូមជម្រាបជូនថា បច្ចុប្បន្ន កុមារីមានអាយុ២ឆ្នាំ៨ខែហើយ៕