ការធ្វើតេស្តឈាមទារកទើបកើត គឺជាវិធីសាស្ត្រដ៏សាមញ្ញ និងមានប្រសិទ្ធភាពមួយ ដើម្បីរកមើលជំងឺកង្វះអ័រម៉ូនទីរ៉ូអ៊ីតពីកំណើត (Congenital Hypothyroidism) ដែលអាចការពារទារកពីពិការភាពផ្លូវកាយ និងបញ្ញា។ នេះបើយោងតាមមន្ទីរពេទ្យកាល់ម៉ែត។
១. ហេតុអ្វីការធ្វើតេស្តនេះមានសារៈសំខាន់?
- រកជំងឺបានទាន់ពេល: ជំងឺនេះមិនមានរោគសញ្ញាច្បាស់លាស់ភ្លាមៗទេនៅពេលកើត។ រោគសញ្ញាអាចលេចឡើងនៅពេលទារកមានអាយុចាប់ពី ៣ ទៅ ១ ខែ។ ការធ្វើតេស្តឈាមអាចជួយរកឃើញជំងឺនេះមុនពេលរោគសញ្ញាលេចចេញ។
- បង្ការពិការភាព: ប្រសិនបើរកឃើញ និងព្យាបាលបានទាន់ពេលវេលា ទារកអាចរួចផុតពីពិការភាពប្រាជ្ញា និងស្មារតី។
២. របៀបធ្វើតេស្ត
- ការធ្វើតេស្តនេះគឺសាមញ្ញណាស់ ដោយគ្រាន់តែយកឈាមពី ១ ទៅ ២ ដំណក់ពីកែងជើងទារក ហើយដាក់លើក្រដាសតេស្ត។ ទារកនឹងមិនមានអារម្មណ៍ឈឺចាប់នោះទេ។
- ក្រដាសតេស្តត្រូវទុកឱ្យស្ងួតរយៈពេល ២៤ ម៉ោង មុននឹងបញ្ជូនទៅមន្ទីរពិសោធ។
៣. ពេលណាត្រូវធ្វើតេស្ត?
- ការធ្វើតេស្តនេះមានប្រសិទ្ធភាពបំផុតនៅចន្លោះពេលដែលទារកមានអាយុចាប់ពី ៤៨ ម៉ោង ទៅ ៧២ ម៉ោង ក្រោយពេលកើត។
៤. ការបកស្រាយលទ្ធផល
- លទ្ធផលអាចទទួលបានក្នុងរយៈពេល ៥ ថ្ងៃនៃថ្ងៃធ្វើការ។
- លទ្ធផលវិជ្ជមាន: បង្ហាញថាទារកមានហានិភ័យខ្ពស់នៃជំងឺមេតាបូលិក។
- លទ្ធផលអវិជ្ជមាន: បង្ហាញថាទារកមិនមានហានិភ័យនៃជំងឺមេតាបូលិក។
៥. អ្វីដែលត្រូវធ្វើប្រសិនបើលទ្ធផលវិជ្ជមាន?
- បើលទ្ធផលវិជ្ជមាន ត្រូវធ្វើតេស្តម្តងទៀតដើម្បីបញ្ជាក់។
- ប្រសិនបើបញ្ជាក់ថាមានជំងឺមេតាបូលិក, ការព្យាបាលរយៈពេលយូរនឹងត្រូវបានធ្វើឡើង ដើម្បីធានាថាទារកមានការលូតលាស់ផ្លូវកាយ និងបញ្ញាដូចធម្មតា។
ការយកចិត្តទុកដាក់លើការធ្វើតេស្តនេះអាចជួយការពារកូនរបស់អ្នកពីផលវិបាកធ្ងន់ធ្ងរនាពេលអនាគត៕