ភ្នែក ជាសរីរាង្គសំខាន់បំផុតមួយនៃរាងកាយ ដូច្នេះការថែទាំវា គឺចាំបាច់ណាស់ ។ ក្រៅពីការការពារពីកម្តៅថ្ងៃ ឬការសម្លឹងអេក្រង់យូរពេក ការទទួលទានអាហារដែលមានជីវជាតិគ្រប់គ្រាន់ក៏ជួយដល់សុខភាពភ្នែកផងដែរ ។
ខាងក្រោមនេះ ជាអាហារមួយចំនួនដែលអ្នកគួរទទួលទាន ដើម្បីជំនួយដល់សុខភាពភ្នែក ៖
១. បន្លែបៃតង
បន្លែបៃតងដូចជា ស្ពៃក្តោប ស្ពៃ និង ផ្កាខាត់ណាខៀវ សម្បូរទៅដោយសារធាតុ Lutein និង Zeaxanthin ដែលដើរតួនាទីយ៉ាងសំខាន់ក្នុងការការពារភ្នែកពីពន្លឺពណ៌ខៀវ (blue light) ដែលចេញពីអេក្រង់ទូរស័ព្ទ ឬកុំព្យូទ័រ ។ សារធាតុទាំងនេះក៏ជួយកាត់បន្ថយហានិភ័យនៃជំងឺឡើងបាយ និងជំងឺភ្នែកមួយចំនួនទៀត។
២. ត្រី
ត្រីដែលមានខ្លាញ់ដូចជា ត្រីសាលម៉ុន ត្រីធូណា និង ត្រីសាឌីន សម្បូរទៅដោយអាស៊ីតខ្លាញ់អូមេហ្គា ៣ (Omega-3 fatty acids) ដែលល្អសម្រាប់សុខភាពភ្នែក ។ ការទទួលទានអាហារទាំងនេះអាចជួយការពារភ្នែកពីជំងឺស្ងួតភ្នែក និងជំងឺចុះខ្សោយកញ្ចក់ភ្នែក (macular degeneration)។
៣. ស៊ុត
ស៊ុតមានផ្ទុកទាំង Lutein និង Zeaxanthin ដែលជួយការពារភ្នែកពីការខូចខាត ក៏ដូចជា Zinc ដែលជួយឱ្យរាងកាយអាចស្រូបយកសារធាតុទាំងនេះបានល្អ ។ ស៊ុតក៏ជាប្រភពដ៏ល្អនៃវីតាមីន A ដែលជួយការពារជំងឺខ្វាក់មាន់ (night blindness)។
៤. គ្រាប់ធញ្ញជាតិ និងគ្រាប់ផ្លែឈើ
គ្រាប់ធញ្ញជាតិដូចជា គ្រាប់អាល់ម៉ុន គ្រាប់ស្វាយចន្ទី និង គ្រាប់ឈូករ័ត្ន សម្បូរទៅដោយវីតាមីន E ដែលជាសារធាតុប្រឆាំងអុកស៊ីតកម្មដ៏ខ្លាំងក្លាមួយជួយការពារកោសិកាភ្នែកពីការខូចខាត។
៥. ផ្លែឈើ និងបន្លែពណ៌ទឹកក្រូច
ការ៉ុត ឪឡឹក និងដំឡូងជ្វា សម្បូរទៅដោយ Beta-carotene ដែលរាងកាយបំប្លែងទៅជាវីតាមីន A។ វីតាមីន A ដើរតួនាទីសំខាន់ក្នុងការជួយឱ្យភ្នែកអាចមើលឃើញក្នុងស្ថានភាពពន្លឺតិច។
៦. សាច់
សាច់គោ សាច់ជ្រូក និងសាច់មាន់ គឺសុទ្ធតែជាប្រភពនៃ Zinc ដែលជួយឱ្យវីតាមីន A អាចទៅដល់ភ្នែកបានត្រឹមត្រូវ។ ដូចគ្នានេះដែរ ការខ្វះជាតិ Zinc ក៏អាចបណ្តាលឱ្យចុះខ្សោយកញ្ចក់ភ្នែកផងដែរ។
ការទទួលទានអាហារទាំងនេះជាប្រចាំរួមជាមួយនឹងការធ្វើលំហាត់ប្រាណភ្នែក និងការសម្រាកឱ្យបានគ្រប់គ្រាន់ នឹងជួយរក្សាសុខភាពភ្នែករបស់អ្នកឱ្យបានល្អ ៕