កំហឹងអាចបណ្តាលឱ្យមានបញ្ហាជាច្រើនក្នុងជីវិត។ ការរៀនគ្រប់គ្រងវាគឺមានសារៈសំខាន់ណាស់។ ខាងក្រោមនេះជាវិធីសាស្រ្តដែលមានប្រសិទ្ធភាពដែលអ្នកអាចអនុវត្តបាន៖
- រាប់ពី ១ ដល់ ១០: មុននឹងនិយាយ ឬធ្វើអ្វីមួយ សូមដកដង្ហើមវែងៗ ហើយរាប់យឺតៗពីលេខ ១ ដល់ ១០។ ការធ្វើបែបនេះជួយឱ្យខួរក្បាលរបស់អ្នកមានពេលសម្រាក និងបន្ធូរភាពតានតឹង។
- បង្វែរអារម្មណ៍: នៅពេលដែលមនុស្សម្នាក់ទៀតកំពុងញុះញង់អ្នក សូមព្យាយាមបង្វែរការចាប់អារម្មណ៍ដោយមិនស្តាប់ ឬមើលអ្វីដែលអាចធ្វើឱ្យអ្នកខឹង។ ផ្តោតអារម្មណ៍ទៅលើការរាប់ ឬអ្វីផ្សេងទៀតដើម្បីរក្សាភាពស្ងប់ស្ងាត់។
- បន្ថយល្បឿន: ព្យាយាមនិយាយយឺតៗ ដើរយឺតៗ និងធ្វើសកម្មភាពយឺតៗ។ មុននឹងនិយាយ សូមត្រងពាក្យទាំងនោះក្នុងខួរក្បាលសិន ដើម្បីប្រាកដថាវានឹងមិនបង្កឱ្យមានបញ្ហាធ្ងន់ធ្ងរទេ។
- គិតដល់ផលប៉ះពាល់លើអ្នកដទៃ: ពេលខឹងខ្លាំង អ្នកតែងតែគិតតែពីខ្លួនឯង។ សូមគិតដល់ឪពុកម្តាយ បងប្អូន ឬមិត្តភក្តិដែលអ្នកស្រឡាញ់ ថាទង្វើរបស់អ្នកអាចធ្វើឱ្យពួកគេអាម៉ាស់ ឬជួបបញ្ហាដែរ។
- រកពេលស្ងប់ស្ងាត់: ប្រសិនបើស្ថានការណ៍មិនអាចគ្រប់គ្រងបាន សូមសុំចាកចេញពីទីនោះមួយរយៈ។ ទៅរកកន្លែងស្ងប់ស្ងាត់ដើម្បីសម្រាកតែម្នាក់ឯង ឬជាមួយមនុស្សដែលអ្នកទុកចិត្ត ដើម្បីអនុវត្តវិធីសាស្ត្រពីចំណុច ១ ដល់ ៤។
- រៀននិយាយ “សុំទោស”: ពាក្យសុំទោសមិនមែនមានន័យថាអ្នកខុសរហូតនោះទេ។ អ្នកអាចសុំទោសចំពោះការខ្ជះខ្ជាយពេលវេលា ឬការបង្ហាញអារម្មណ៍មិនល្អរបស់អ្នក។ ការនិយាយបែបនេះអាចធ្វើឱ្យស្ថានភាពបានប្រសើរឡើង។
- រៀន “អភ័យទោស”: ក្នុងស្ថានភាពតូចតាចមួយចំនួន ការអភ័យទោសអាចដោះស្រាយបញ្ហាបានយ៉ាងលឿន។ ការបណ្តោយឱ្យរឿងតូចតាចកន្លងផុតទៅអាចជួយឱ្យអ្នកមានជីវិតសប្បាយរីករាយជាងមុន។
- ទុកឱ្យច្បាប់ដោះស្រាយ: កុំប្រើកម្លាំងបាយដោះស្រាយបញ្ហា។
ប្រសិនបើអ្នកជឿជាក់ថាខ្លួនឯងមិនបានធ្វើខុសទេ សូមទុកចិត្តលើច្បាប់ដើម្បីដាក់ទោសអ្នកប្រព្រឹត្ត។ ការប្រើអារម្មណ៍លើសពីច្បាប់អាចធ្វើឱ្យអ្នកបាត់បង់ប្រយោជន៍ និងត្រូវទទួលខុសត្រូវលើផលប៉ះពាល់ដែលបានកើតឡើង៕