របួសគ្រាំទ្រូង-សួត គឺជាការប៉ះទង្គិចមួយប្រភេទដែលអាចបង្កគ្រោះថ្នាក់ដល់អាយុជីវិត ដែលទាមទារឱ្យមានការព្យាបាលបន្ទាន់និងត្រឹមត្រូវ។ យោងតាមមន្ទីរពេទ្យកាល់ម៉ែត បានឱ្យដឹងថា របួសនេះកើតឡើងដោយសារការប៉ះទង្គិចទៅលើតំបន់ទ្រូង រហូតដល់ប៉ះពាល់ដល់សរីរាង្គសំខាន់ៗដូចជា សួត បេះដូង និងសរសៃឈាមធំ។
មូលហេតុចម្បងនៃរបួសនេះ គឺបណ្តាលមកពី គ្រោះថ្នាក់ចរាចរណ៍ ដែលមានជាង ៥០% នៃករណីទាំងអស់។ មូលហេតុផ្សេងទៀតរួមមាន គ្រោះថ្នាក់ការងារ ជម្លោះ ឬគ្រោះថ្នាក់នៅតាមលំនៅឋាន។ ក្នុងចំណោមអ្នករងរបួសដោយគ្រោះថ្នាក់ចរាចរណ៍ ៣៨% មានកម្រិតសុរាក្នុងឈាមខ្ពស់ ដែលជាហេតុបង្កើនហានិភ័យរបួសកាន់តែខ្លាំង។
ក្រុមមនុស្សដែលប្រឈមមុខ ខ្លាំងជាងគេគឺ បុរស ដែលមានរហូតដល់ទៅ ៧៨% ហើយភាគច្រើនជាមនុស្សដែលមានអាយុក្រោម ៥០ ឆ្នាំ។ លើសពីនេះ របួសគ្រាំទ្រូង-សួត តែងតែកើតមានឡើងរួមផ្សំជាមួយរបួសធ្ងន់ៗផ្សេងទៀតដូចជា របួសក្បាល (៤០%) របួសបាក់បែកសាច់ដុំ (៣១%) ឬរបួសសរីរាង្គក្នុងពោះ (២១%)។
រោគសញ្ញាសំខាន់ៗ នៃរបួសនេះរួមមាន៖
- ឈឺចាប់ក្នុងទ្រូង
- ដកដង្ហើមញាប់ និងហត់
- ទឹកមុខស្លេកស្លាំង
- ថប់ដង្ហើម
ប្រសិនបើមិនបានព្យាបាលទាន់ពេលទេ វានឹងអាចបង្កជា ផលវិបាក ធ្ងន់ធ្ងរដូចជា សម្ពាធឈាមចុះទាប កម្រិតអុកស៊ីសែនថយចុះ ឬអាចបណ្តាលឱ្យអ្នកជំងឺសន្លប់ថែមទៀតផង។
ការព្យាបាល គឺតម្រូវឱ្យមានការសង្គ្រោះបន្ទាន់ដូចជា ការចោះបូមបង្ហូរអ្វីដែលរំខានដល់ដំណកដង្ហើម ការដាក់អុកស៊ីសែន ព្រមទាំងប្រើប្រាស់ថ្នាំបំបាត់ការឈឺចាប់និងថ្នាំអង់ទីប៊ីយូទិក។ អ្នកជំងឺត្រូវសម្រាក និងតាមដានយ៉ាងដិតដល់នៅក្នុងមន្ទីរពេទ្យ។
ដើម្បី ការពារ ពីរបួសគ្រាំទ្រូង-សួត ប្រជាពលរដ្ឋគ្រប់រូបគួរតែ គោរពច្បាប់ចរាចរណ៍ និង កុំបើកបរក្រោមឥទ្ធិពលគ្រឿងស្រវឹង។ ប្រសិនបើមានរបួសនេះកើតឡើង សូមប្រញាប់ទៅពិគ្រោះជាមួយគ្រូពេទ្យឯកទេសនៅមន្ទីរពេទ្យឱ្យបានទាន់ពេលវេលាដើម្បីទទួលបានការព្យាបាលប្រកបដោយប្រសិទ្ធភាពខ្ពស់៕