ខេត្តសៀមរាប៖ កុមារីកម្សត់មួយរូបមានជំងឺសរសៃឈាមមិនប្រក្រតីពីកំណើត ទទួលបានការព្យាបាលជោគជ័យ នៅមន្ទីរពេទ្យជ័យវរ្ម័នទី៧ កាលពីពេលថ្មីៗនេះ។
បើតាមមន្ទីរពេទ្យជ័យវរ្ម័នទី៧ ក្រុមគ្រូពេទ្យបានរកឃើញករណីដ៏កម្រមួយលើកុមារីឈ្មោះ និន សុជាតា ភេទស្រី អាយុ១ឆ្នាំ១ខែជនជាតិខ្មែរ មកពីភូមិ៤ ឃុំ បឹងកេងកងទី២ សង្កាត់បឹងកេងកង ក្រុងភ្នំពេញ។
កុមារីអាយុ១ឆ្នាំ១ខែដែលបានមកមន្ទីរពេទ្យដោយសារមានបញ្ហាទាក់ទងជាមួយជើងចាប់ពីត្រគាកឆ្វេងនិងភ្លៅរីកធំខុសប្រក្រតី។ កុមារីត្រូវបានបញ្ជូនមកមន្ទីរពេទ្យជ័យវ័រ្មនទី៧ នៅពាក់កណ្ដាលខែកក្កដាកន្លងមកនេះដោយដាក់សម្រាកនៅសាលសង្រ្គោះបន្ទាន់ផ្នែកបេះដូងនិងសរសៃឈាម។ កុមារីត្រូវបានដាក់ឲ្យសម្រាក និងព្យាបាលដោយយកចិត្តទុកដាក់ខ្ពស់នៅមន្ទីរពេទ្យជ័យវរ្ម័នទី៧ គន្ធបុប្ផាសៀមរាប។
ក្រោមការដឹកនាំព្យាបាលដោយថ្នាក់ដឹកនាំនៃមន្ទីរពេទ្យជ័យវរ្ម័នទី ៧ រួមជាមួយក្រុមគ្រូពេទ្យឯកទេសវះកាត់កុមារ ក្រុមគ្រូពេទ្យសង្គ្រោះបន្ទាន់បេះដូងកុមារ និងក្រុមគ្រូពេទ្យផ្នែករូបភាពវេជ្ជសាស្ត្រនិងអន្តរាគមន៍វេជ្ជសាស្ត្រ បានខិតខំកំណត់យន្តការរួមនៃការព្យាបាលជាដំណាក់កាល។
បន្ទាប់ពីស្ថានភាពអ្នកជំងឺមានភាពប្រសើរឡើងជាលំដាប់ ក្រុមគ្រូពេទ្យមន្ទីរពេទ្យគន្ធបុប្ផាសៀមរាបបានអនុញ្ញាតឲ្យកុមារីរូបនេះត្រឡប់ទៅផ្ទះវិញជាមួយនឹងស្នាមញញឹម។ ទោះជាយ៉ាងណា កុមាររូបនេះនឹងត្រូវបន្តព្យាបាល និងបន្តតាមដាន និងណាត់ជួបក្នុងរយៈពេល ២ ខែទៀត ដើម្បីវាយតម្លៃលទ្ធផលជាក់ស្ដែងនៃការព្យាបាល៕