ការប្រែប្រួលអាកាសធាតុអាចបណ្ដាលឱ្យយើងងាយឈឺ និងចាប់ផ្ដាសាយ ជាពិសេសការឈឺបំពង់កដែលបង្កការរំខាន។ ថ្ងៃនេះយើងសូមបង្ហាញជូននូវឱសថធម្មជាតិ ៨ មុខ ដែលងាយស្រួលរក មានប្រសិទ្ធភាព និងចំណាយតិច ដើម្បីបំបាត់ការឈឺបំពង់កបានយ៉ាងឆាប់រហ័ស។
១. ទឹកអំបិលក្តៅឧណ្ហៗ
នេះជាវិធីបុរាណដែលគេនិយមប្រើតាំងពីយូរលង់ណាស់មកហើយ។ លាយអំបិល ១/៤ ស្លាបព្រាកាហ្វេ ជាមួយទឹកក្ដៅ ១ ពែង រួចខ្ពុរមាត់ជាប្រចាំ។ ទឹកអំបិលជួយសម្លាប់បាក់តេរីក្នុងបំពង់ក និងកាត់បន្ថយការឈឺចាប់។
២. ទឹកឃ្មុំ ក្រូចឆ្មា ខ្ញី និងទឹកក្តៅ
សម្រាប់អ្នកដែលឈឺបំពង់កខ្លាំង អាចសាកល្បងលាយទឹកឃ្មុំ ១ ស្លាបព្រាបាយ ទឹកក្រូចឆ្មារកន្លះផ្លែ ទឹកខ្ញី ១ ស្លាបព្រា និងទឹកក្តៅ។ ទឹកឃ្មុំមានលក្ខណសម្បត្តិប្រឆាំងមេរោគ ហើយក្រូចឆ្មារជួយរក្សាបំពង់កឱ្យមានសំណើម។
៣. ម្សៅម្ទេស និងទឹក
រូបមន្តនេះគឺសម្រាប់អ្នកចូលចិត្តរសជាតិហិរ។ លាយម្សៅម្ទេស ២ ស្លាបព្រាកាហ្វេ ជាមួយទឹកក្ដៅ ១ ពែង ហើយយកមកខ្ពុរមាត់។ កម្ដៅរបស់ម្ទេសដើរតួជាថ្នាំប្រឆាំងការរលាក ដែលអាចជួយបំបាត់ការឈឺចាប់បានយ៉ាងល្អ។
៤. ស្លឹកខ្ទឹម និងទឹក
យកស្លឹកខ្ទឹមស្ងួតដែលកិនរួច ២ ស្លាបព្រាបាយ លាយជាមួយទឹកក្ដៅ ១ ពែង រួចយកទៅខ្ពុរមាត់។ ស្លឹកខ្ទឹមមានលក្ខណសម្បត្តិប្រឆាំងបាក់តេរី ដែលអាចជួយកាត់បន្ថយការរលាកក្នុងបំពង់ក។
៥. រមៀត អំបិល និងទឹក
លាយម្សៅរមៀត ១ ស្លាបព្រា អំបិល ១ ស្លាបព្រា និងទឹកក្ដៅ ១ ពែង។ ខ្ពុរមាត់ជាមួយល្បាយនេះ។ រមៀតជាសារធាតុប្រឆាំងអុកស៊ីតកម្មដ៏ល្អ រីឯអំបិលជួយទប់ស្កាត់បាក់តេរី។
៦. ទឹកខ្មេះប៉ោម និងទឹក
សម្រាប់អ្នកដែលមានទាំងឈឺបំពង់ក និងក្អក អាចសាកល្បងលាយទឹកខ្មេះប៉ោម ១ ស្លាបព្រាកាហ្វេ ជាមួយទឹកក្ដៅ ១ ពែង ហើយខ្ពុរមាត់។ ទឹកខ្មេះប៉ោមជួយសម្លាប់បាក់តេរី និងមេរោគក្នុងបំពង់ក និងកាត់បន្ថយអាការក្អក។
៧. តែបៃតងក្តៅ
តែបៃតងមានសារធាតុប្រឆាំងអុកស៊ីតកម្ម និងជួយកាត់បន្ថយការឆ្លងមេរោគ។ ឆុងតែបៃតងឱ្យខ្លាំង ហើយពិសាជាប្រចាំ។ ទឹកក្ដៅឧណ្ហៗជួយបន្ធូរស្លេស្ម និងបំបាត់ការឈឺចាប់។
៨. តែ Raspberry
ក្រៅពីតែបៃតង តែ Raspberry ក៏ជាជម្រើសដ៏ល្អផងដែរ។ វាមានក្លិនឈ្ងុយឆ្ងាញ់ ហើយមានលក្ខណសម្បត្តិជួយការពារ និងព្យាបាលជំងឺផ្ដាសាយ តឹងច្រមុះ និងការឈឺបំពង់ក។ អ្នកអាចពិសាជាប្រចាំ ឬខ្ពុរមាត់ក៏បាន។
ចំណុចសម្គាល់
វិធីទាំងនេះអាចជាជម្រើសល្អសម្រាប់ព្យាបាលអាការឈឺបំពង់កកម្រិតស្រាល។ ទោះជាយ៉ាងណាក៏ដោយ ប្រសិនបើអាការៈមិនបានធូរស្រាល ឬកាន់តែធ្ងន់ធ្ងរ សូមប្រញាប់ទៅពិគ្រោះជាមួយគ្រូពេទ្យដើម្បីទទួលបានការព្យាបាលត្រឹមត្រូវ៕