ការទទួលទានផ្លែត្របែកត្រាំ និងផ្លែឈើត្រាំផ្សេងទៀត បាននិងបង្កជាក្តីបារម្ភយ៉ាងខ្លាំងចំពោះសុខភាពសាធារណៈ។ ការសិក្សាមួយបានរកឃើញថា ផ្លែឈើទាំងនេះមានផ្ទុកមេរោគ សារធាតុកខ្វក់ និងសារធាតុគីមីគ្រោះថ្នាក់រហូតដល់ ៦៤% ដែលអាចបង្កផលប៉ះពាល់ធ្ងន់ធ្ងរដល់រាងកាយ។ នេះបើយោងតាមសារព័ត៌មានថៃ។
អ្នកជំនាញបានរកឃើញថា ផ្លែត្របែកត្រាំទឹក ជាពិសេសប្រភេទពណ៌ក្រហម ឬបៃតង គឺមានផ្ទុកមេរោគខ្ពស់ជាងគេ។ ការចម្លងរោគទាំងនេះរួមមាន អតិសុខុមប្រាណ បាក់តេរី coliform (ដែលបង្ហាញពីវត្តមានលាមក) ពណ៌សំយោគ ផ្សិត និងសារធាតុគីមីផ្សេងទៀត ដែលសុទ្ធតែជាភ្នាក់ងារបង្កគ្រោះថ្នាក់ដល់សុខភាព។
ប្រជាពលរដ្ឋទូទៅដែលនិយមបរិភោគផ្លែឈើត្រាំគឺសុទ្ធតែជាក្រុមមនុស្សដែលប្រឈមមុខនឹងហានិភ័យសុខភាពនេះ។ កុមារ និងអ្នកដែលមានប្រព័ន្ធភាពស៊ាំចុះខ្សោយ អាចកាន់តែងាយរងគ្រោះ។
បញ្ហាភាគច្រើនត្រូវបានគេរកឃើញលើផ្លែឈើត្រាំដែលលក់ចេញពីរទេះតាមដងផ្លូវ ឬតូបលក់ផ្លែឈើដែលមិនមានអនាម័យត្រឹមត្រូវ ជាពិសេសគឺផ្លែត្របែកត្រាំ។
ការរកឃើញនេះជាការព្រមានមួយអំពីបញ្ហាសុខភាពដែលកើតឡើងជាបន្តបន្ទាប់ពីការបរិភោគផ្លែឈើកខ្វក់ ហើយអាចបង្កផលប៉ះពាល់រយៈពេលវែង ប្រសិនបើទទួលទានជាប្រចាំ។
ការបរិភោគផ្លែឈើដែលមានមេរោគអាចបង្កឱ្យមានរោគសញ្ញាជាច្រើនដូចជា៖
- បញ្ហាប្រព័ន្ធរំលាយអាហារ: រាគ ចង្អោរ ក្អួត វិលមុខ និងអាចឈានដល់ជំងឺរាគរូសធ្ងន់ធ្ងរ។
- រោគសញ្ញាទូទៅ: ធីនីតឹស (ឮសូរក្នុងត្រចៀក), ក្តៅខ្លួន, ដកដង្ហើមដង្ហក់, និងភាពទន់ខ្សោយ។
- ផលប៉ះពាល់រយៈពេលវែង: ការកាត់បន្ថយភាពធន់ទ្រាំនឹងជំងឺ និងអាចជាកត្តាបង្កឱ្យកើតជំងឺមហារីក ប្រសិនបើទទួលទានក្នុងរយៈពេលយូរ។
ដើម្បីការពារសុខភាពផ្ទាល់ខ្លួន អ្នកប្រើប្រាស់គួរតែ៖
- ជ្រើសរើសប្រភពដែលមានអនាម័យ: ទិញផ្លែឈើពីអ្នកលក់ណាដែលអ្នកមានទំនុកចិត្តថាមានអនាម័យល្អ។
- ផ្លាស់ប្តូរអ្នកលក់: ជៀសវាងការបរិភោគផ្លែឈើពីអ្នកលក់ដដែលជារៀងរាល់ថ្ងៃ។
- រៀបចំដោយខ្លួនឯង: ប្រសិនបើមានពេលទំនេរ គួរទិញផ្លែឈើពីផ្សារ ហើយយកមកលាងសម្អាត និងកាត់ដោយខ្លួនឯងនៅផ្ទះ ដើម្បីធានាបាននូវអនាម័យខ្ពស់បំផុត៕