ក្រៅពីភាពល្បីល្បាញខាងរសជាតិ ទុរេនក៏មានផ្ទុកនូវសារធាតុចិញ្ចឹមជាច្រើនដែលមានអត្ថប្រយោជន៍ចំពោះសុខភាពផងដែរ។
ទុរេនមានផ្ទុកសារធាតុ Tryptophan ដែលជាអាស៊ីតអាមីណូដែលរាងកាយបំប្លែងទៅជា Serotonin (អ័រម៉ូនដែលធ្វើឱ្យអារម្មណ៍ល្អ) និង Melatonin (អ័រម៉ូនដែលជួយឱ្យគេងលក់ស្រួល)។ ដូច្នេះ ការទទួលទានទុរេនក្នុងបរិមាណសមល្មមអាចជួយសម្រួលដល់ការគេង។
ដោយឡែក ទុរេនសម្បូរទៅដោយវីតាមីន B មួយចំនួនដូចជា Thiamine (B1), Riboflavin (B2), Niacin (B3) និង Folate (B9) ដែលមានសារៈសំខាន់សម្រាប់ដំណើរការមេតាប៉ូលីស ថាមពល និងសុខភាពប្រព័ន្ធប្រសាទ។
ចំណុចសម្គាល់៖ ទោះបីជាទុរេនមានអត្ថប្រយោជន៍ច្រើនក៏ដោយ ក៏វាមានកាឡូរី និងជាតិស្ករខ្ពស់ដែរ។ ដូច្នេះ ការទទួលទានក្នុងបរិមាណច្រើនពេកអាចបណ្ដាលឲ្យឡើងទម្ងន់។ អ្នកដែលមានជំងឺទឹកនោមផ្អែម ឬអ្នកដែលកំពុងគ្រប់គ្រងទម្ងន់ គួរទទួលទានក្នុងកម្រិតមធ្យម។ ម្យ៉ាងវិញទៀត ទុរេនក៏អាចបណ្ដាលឲ្យមានអារម្មណ៍ក្ដៅក្នុងខ្លួនចំពោះអ្នកខ្លះផង៕