ក្មេងស្រី អាយុ៣ឆ្នាំម្នាក់ បានពុលថ្នាំមូសស្លាប់នៅពេលបញ្ជូនទៅកាន់មន្ទីរពេទ្យ បន្ទាប់ពីម្ដាយជាប់រវល់បោកខោអាវ ហើយកូនស្រីបានយកកំពូលថ្នាំមូសខាំលេង បណ្ដាលឲ្យបែក ហើយទឹកថ្នាំមូសចូលក្នុងមាត់។
ហេតុការណ៍នេះបានកើតឡើង កាលពីវេលាម៉ោង៦ល្ងាច ថ្ងៃទី១៤ខែកក្កដា ឆ្នាំ២០២៥ នៅចំណុចផ្ទះមួយល្វែង សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។
តាមនគរបាលមូលដ្ឋានបានឲ្យដឹងថា នៅលាម៉ោងប្រមាណ៦ ល្ងាចថ្ងៃទី១៤ ខែកក្កដា ឆ្នាំ២០២៥ ខណៈពេលដែលឪពុកម្ដាយមកពីធ្វើការក៏បានទៅយកកូនដែលផ្ញើរទុកនៅសាលាឯកជនមួយកន្លែង ដើម្បីទៅផ្ទះ ។ ខណៈពេលត្រឡប់មកដល់ផ្ទះវិញក៏រៀបចំបោកខោអាវ ហើយកូនបានយកអំពូលថ្នាំមូស ដែលទុកក្នុងទូរមកខាំលេង បណ្ដាលឲ្យបែក ហើយទឹកថ្នាំមូសបានចូលមាត់ក្មេង បណ្តាលអោយពុល ។
ភ្លាមៗក្រុមគ្រួសារបានបញ្ជូនក្មេងរងគ្រោះទៅមណ្ឌលសុខភាពពន្សាំង រួចក៏បញ្ជូនទៅកាន់មន្ទីរពេទ្យមិត្តភាពតេជោសន្តិភាព ហើយត្រូវក្រុមគ្រូពេទ្យលាងក្រពះ តែអកុសលជាតិពុលជ្រាបពេញខ្លួនស្លាប់បាត់បង់ជីវិតនៅវេលាម៉ោងបប្រមាណ៨និង៣០នាទីយប់ ។
ទាក់ទិនទៅនឹងករណីដ៏សោកសង្រេងនេះ នៅព្រឹកថ្ងៃទី ១៥ ខែកក្កដា ឆ្នាំ ២០២៥ នេះ រដ្ឋបាលសង្កាត់ពន្សាំង បានអោយដឹងថា តាមការអះអាងរបស់ម្តាយកុមាររងគ្រោះ គឺកុមារនេះបានផឹកទឹកថ្នាំមូស បណ្តាលឱ្យពុលស្លាប់ ដោយគ្រូពេទ្យមិនអាចជួយសង្គ្រោះបាន រស់នៅភូមិឧសភា សង្កាត់ពន្សាំង ខណ្ឌព្រែកព្នៅ ។
ក្នុងនាមរដ្ឋបាលសង្កាត់ សូមចូលរួមសោកស្តាយ ដូចនេះស្នើសុំ មេភូមិគ្រប់ភូមិ ជួយផ្សព្វផ្សាយដល់ប្រជាជន ឱ្យប្រុងប្រយ័ត្នកុំឱ្យករណីបែបនេះកើតមានទៀត ។