មន្ទីរពេទ្យបង្អែកស្អាង បានប្រកាសកាលពីថ្ងៃទី១២ ខែកក្កដានេះថា ជំងឺគ្រោះថ្នាក់សរសៃឈាមខួរក្បាល អាចបណ្ដាលឲ្យយើងស្លាប់ ឬធ្លាក់ខ្លួនពិការបាន(Stroke) ។
យោងតាមរបាយការណ៍របស់អង្គការសុខភាពពិភពលោកចំនួននៃអ្នកកើតជំងឺគ្រោះថ្នាក់សរសៃឈា.មខួរក្បាលក្នុងមួយឆ្នាំៗមានចំនួនប្រហែល១៥លាននាក់ ហើយក្នុងនោះមាន៥លាននាក់ អាចប្រឈមដល់អាយុជីវិតបាន ។
ការស្គាល់ពីរោគសញ្ញានៃជំងឺនេះទាំងអស់គ្នា ដើម្បីឆាប់បញ្ជូនអ្នកជំងឺមកកាន់មន្ទីរពេទ្យឲ្យបានលឿនបំផុត គឺជាមធ្យោបាយប្រសើរបំផុតតែមួយគត់ដែលនាំអោយជីវិតមួយត្រូវបានជួយសង្គ្រោះទាន់ពេលវេលា។
រោគសញ្ញាសំខាន់ៗរួមមាន៖
– ពិបាកនិយាយភ្លាមៗ រឺនិយាយមិនបាន
– ទន់ដៃ ជើង មួយចំហៀងភ្លាមៗ (ពាក្យខ្មែរយើងថាស្លាប់មួយចំហៀងខ្លួន)
– វៀចមុខភ្លាមៗ
ប្រសិនបើអ្នកជំងឺបានមកដល់មន្ទីរពេទ្យ ក្នុងថេរៈវេលា៤ម៉ោងដំបូង ក្នុងករណីស្ទះសរសៃឈាមខួរក្បាល គាត់អាចទទួលបានការព្យាបាលដោយឱសថទំនើបចុងក្រោយ(Thrombolysis) ដែលអាចរំលាយដុំកំណកឈាមនោះបាន (ប្រសិនបើអ្នកជំងឺ មិនមានកត្តារំខានផ្សេងៗទៀតចំពោះការ ប្រើប្រាស់ថ្នាំនេះទេ)។ ការយឺតយ៉ាវក្នុងការព្យាបាល ជំងឺគ្រោះថ្នាក់សរសៃឈាមខួរក្បាល អាចឲ្យយើងធ្លាក់ខ្ឡួនពិការបាន ដែលជាការខាតបង់ធំធេងចំពោះខ្លួនយើង គ្រួសារ ក៏ដូចជាសង្គមជាតិយើងទាំងមូល។
ជាស្តង់ដារសាកលថែទាំ-ព្យាបាលដែលផ្តល់ជូនប្រសិទ្ធិភាព និងសុវត្ថិភាពខ្ពស់បំផុត គ្រប់អ្នកជំងឺគ្រោះថ្នាក់សរសៃឈាមខួរក្បាល ត្រូវតែបានទទួលការព្យាបាលនៅក្នុងបន្ទប់ព្យាបាលបន្ទាន់នៃជំងឺនេះ(Stroke Unit) ដែលមានគ្រប់ផ្នែកជំនាញឯកទេសពាក់ព័ន្ធ ដូចជាខាងសង្គ្រោះបន្ទាន់ ខាងរូបភាពវេជ្ជសាស្រ្ត ខាងប្រសាទសាស្រ្ត សរសៃឈាមខួរក្បាល ខាងវះកាត់ប្រព័ន្ធប្រសាទ និងខាងព្យាបាលដោយចលនា ៕