ពោតជាប្រភពដ៏ល្អនៃសារធាតុចិញ្ចឹមជាច្រើនដែលផ្តល់អត្ថប្រយោជន៍ដ៏មហាសាលសម្រាប់សុខភាពរបស់យើង។ មិនថាពោតបារាំង ពោតដំណើប ឬពោតស្ងោរ ពោតលីងទេ គ្រាប់ពោតទាំងនេះពិតជាមិនគួរឲ្យមើលរំលងឡើយចំពោះរបបអាហារប្រចាំថ្ងៃរបស់អ្នក។
ចំពោះអត្ថប្រយោជន៍សំខាន់ៗនៃផ្លែពោតចំពោះសុខភាពដូចជា សម្បូរជាតិសរសៃដែលមានសារៈសំខាន់ណាស់សម្រាប់សុខភាពប្រព័ន្ធរំលាយអាហារ។ ជាតិសរសៃជួយសម្រួលដល់ចលនាពោះវៀន ការពារការទល់លាមក និងជួយរក្សាតុល្យភាពបាក់តេរីល្អក្នុងពោះវៀន។ លើសពីនេះ វាក៏ជួយឲ្យអ្នកឆ្អែតបានយូរ កាត់បន្ថយចំណង់អាហារ និងអាចជួយដល់ការគ្រប់គ្រងទម្ងន់ទៀតផង។
វាមានផ្ទុកសារធាតុប្រឆាំងអុកស៊ីតកម្មខ្ពស់ ដែលសារធាតុទាំងនេះជួយប្រឆាំងនឹងរ៉ាឌីកាល់សេរីដែលបង្កឲ្យមានការខូចខាតកោសិកា និងជាមូលហេតុនៃជំងឺរុំារ៉ៃជាច្រើន ដូចជាជំងឺមហារីក ជំងឺបេះដូង និងជំងឺភ្នែក។
ជាពិសេសវាផ្តល់ថាមពលដល់រាងកាយ ដោយសារពោតជាប្រភពដ៏ល្អនៃបណ្ដុំកាបូអ៊ីដ្រាតដែលជាប្រភពថាមពលចម្បងរបស់រាងកាយ។ ការទទួលទានពោតអាចជួយផ្តល់ថាមពលឲ្យអ្នកធ្វើការងារប្រចាំថ្ងៃ និងជួយឲ្យអ្នកមានអារម្មណ៍ថាមានកម្លាំងពេញមួយថ្ងៃ។
ជាមួយគ្នានេះ ពោតសម្បូរវីតាមីន និងសារធាតុរ៉ែសំខាន់សម្រាប់ការបំប្លែងថាមពល និងមុខងារប្រព័ន្ធប្រសាទ ហើយ ជាពិសេសចំពោះស្ត្រីមានផ្ទៃពោះ។ លើសពីនេះជួយដល់សុខភាពឆ្អឹង សាច់ដុំ ហើយនិងជួយរក្សាតុល្យភាពជាតិទឹក និងសម្ពាធឈាម៕