កូនយើងកូនគេ! ឃើញហើយអាណិតណាស់ កុមារាម្នាក់អាយុ៤ឆ្នាំ កើតជំងឺដុំសរសៃឈាមពកនៅអណ្តាត ត្រូវបានសង្គ្រោះ

កុមារាម្នាក់អាយុ៤ឆ្នាំ កើតជំងឺដុំសរសៃឈាមពកនៅអណ្តាត ត្រូវបានសង្គ្រោះ ហើយអនុញ្ញាតឲ្យត្រឡប់ទៅផ្ទះវិញ បន្ទាប់ពីទទួលការព្យាបាលអស់រយៈពេលមួយខែពេញ។

យោងតាមមន្ទីរពេទ្យគន្ធបុបា បានឲ្យដឹងថាកុមារាម្នាក់អាយុ៤ឆ្នាំមកពីខេត្តបាត់ដំបងបានសម្រាកព្យាបាលនៅមន្ទីពេទ្យជ័យវរ្ម័នទី៧នៅថ្ងៃទី០២ខែមិថុនាឆ្នាំ២០២៥ដោយសារជំងឺដុំសរសៃឈាមពកនៅអណ្តាត ​ដ៏ធំដែលកើតមានអស់រយៈពេលជាច្រើនខែមកហើយ ព្រមទាំងមានការរំខានក្នុងការញាំអាហារជាខ្លាំង។

ប្រភពបានឲ្យដឹងទៀតថាអ្នកជំងឺត្រូវបានគេធ្វើរោគវិនិច្ឆ័យដោយការថតឆ្លុះម៉ាស៊ីន MRI និង ច្រឹបសាច់ទៅវិភាគ ​ហើយបានទទួលការព្យាបាលដោយការប្រើប្រាស់ថ្នាំ Propranolol ។ បន្ទាប់ពីទទួលការព្យាបាលអស់រយៈពេលមួយខែពេញ អ្នកជំងឺមានការវិវត្តល្អណាស់ គឺដុំសរសៃឈាមពកនៅអណ្តាត ​នោះបានរួមតូចមកវិញដូចធម្មតាយ៉ាងគួរឲ្យកត់សម្គាល់។

កុមារារូបនេះត្រូវបានអនុញ្ញាតឲ្យត្រឡប់ទៅផ្ទះវិញនៅថ្ងៃទី០២ខែកក្កដា ឆ្នាំ២០២៥ ប្រកបដោយសុខភាពល្អ មិនរំខានដល់ការញុំាអាហារទៀតទេ និង បន្តប្រើប្រាស់ថ្នាំ Propranolol នៅផ្ទះ។ ប៉ុន្ដែអ្នកជំអឺរូបនេះត្រូវនៅបន្តការតាមដានដោយការណាត់ជួបរៀងរាល់២ខែម្តង​៕