នៅពេលបច្ចុប្បន្ននេះ យើងចូលចិត្តឆាប់ឃើញលទ្ធផលមិនថា ការសម្រកទម្ងន់ ឬក៏ការធ្វើអ្វីមួយនោះទេ ។ តែតើអ្នកដឹងទេថា ការសម្រកទម្ងន់ មិនគួរធ្វើឡើងឱ្យឆាប់ឃើញលទ្ធផលពេកនោះទេ? នេះក៏ព្រោះតែវាអាចធ្វើឱ្យខូចសុខភាព ដែលអ្នកនឹងបានស្គាល់នៅថ្ងៃនេះ ។
១. អស់កម្លាំង
របបអាហារដើម្បីសម្រកទម្ងន់លឿនឆាប់រហ័សច្រើន តែគ្មានផ្ទុកជាតិកាបូអ៊ីដ្រាតឡើយ ប៉ុន្តែអ្នកត្រូវចាំថារាល់សាច់ដុំក្នុងរាងកាយដំណើរការបានប្រសើរនៅពេលទទួលបានជាតិកាបូអ៊ីដ្រាតគ្រប់គ្រាន់។
ប្រសិនបើរបបអាហាររបស់អ្នកគ្មានផ្ទុកគ្រាប់ធញ្ញជាតិ បន្លែ និងផ្លែឈើទេនោះ ហានិភ័យនៃការបាត់បង់ថាមពល គឺងាយនឹងកើតឡើងណាស់ ។ លើសពីនេះទៅទៀត អ្នកក៏អាចប្រឈមមុខនឹងបញ្ហាទល់លាមកផងដែរ ដោយសារកង្វះនៃជាតិសសៃនិ ងជាតិខ្លាញ់។
២. ស្រកសាច់ដុំ
នៅពេលដែលអ្នកធ្វើការសម្រកទម្ងន់លឿនពេក សាច់ដុំរបស់អ្នកមិនអាចសម្របខ្លួនទៅទាន់នោះទេ ។ នេះក៏ព្រោះតែវាមិនត្រឹមតែធ្វើឱ្យអ្នកស្រកខ្លាញ់នោះទេ ។ វាស្រកទាំងសាច់ដុំរបស់អ្នកថែមទៀតផង។ វាដោយសារតែរបបអាហារដែលអ្នកទទួលទាន។ ដើម្បីអាចឱ្យស្រកលឿន របបអាហាររបស់អ្នកប្រាកដជាមិនមានជីវជាតិគ្រប់គ្រាន់ហើយ។
៣. ខ្វះសារធាតុចិញ្ចឹមរាងកាយ
វីតាមីននិងជាតិរ៉ែ គឺចាំបាច់ណាស់សម្រាប់រាងកាយក្នុងការរក្សាបាននូវសុខភាពរឹងមាំប្រសើរ និងជួយដល់រាល់សរីរាង្គឱ្យដំណើរការមុខងារបានត្រឹមត្រូវ។ ភាគច្រើននៅពេលតមអាហារដើម្បីស្រកទម្ងន់ឆាប់រហ័ស អ្នកប្រាកដជាដកអាហារមួយចំនួនចេញដែលជាហេតុធ្វើឱ្យរាងកាយងាយនឹងជួបប្រទះបញ្ហាខ្វះវីតាមីននិងជាតិរ៉ែចាំបាច់មួយចំនួន៕