មូលហេតុ៣យ៉ាងអ្នកហាត់ប្រាណចូលចិត្តទទួលទានទ្រូងមាន់

តើអ្នកមានឆ្ងល់ទេថា​ ហេតុអ្វីបានជាអ្នកហាត់ប្រាណដើម្បីសុខភាព ចូលចិត្តទទួលទានសាច់មាន់បែបនេះ? ភាគច្រើនគឺគេទទួលទានទ្រូងមាន់ នៅពេលដែលហាត់ប្រាណយកសាច់ដុំនិងរាងស្អាត។ តើហេតុអ្វីទៅបានជាសាច់មាន់ ត្រូវបានគេយកមកញ៉ាំសម្រាប់អ្នកហាត់ប្រាណអ៊ីចឹង? ថ្ងៃនេះអ្នកនឹងបានស្គាល់ពីមូលហេតុ៣យ៉ាង។

១. ជាអាហារសំបូរប្រូតេអ៊ីន

នៅពេលដែលគេហាត់ប្រាណយកសាច់ដុំ គេត្រូវបំពេញប្រូតេអ៊ីនឱ្យបានច្រើនទៅដល់សាច់ដុំ។ សាច់មាន់មានប្រូតេអ៊ីនល្អៗជាច្រើន។ ក្រៅពីសំខាន់សម្រាប់សាច់ដុំហើយនោះ ថាតើអ្នកធ្លាប់ដឹងទេថាប្រូតេអ៊ីនក៏ចាំបាច់ចំពោះសុខភាពរាងកាយទាំងមូលផងដែរ? ជាឧទាហរណ៍រាងកាយត្រូវការប្រូតេអ៊ីនដើម្បីផលិតអរម៉ូន។ ប្រូតេអ៊ីនថែមទាំងសំខាន់សម្រាប់រក្សាសុខភាពសក់ ក្រចក និងស្បែកគួរឱ្យកត់សម្គាល់។

២. ទប់ស្កាត់ជំងឺពុកឆ្អឹង

វាជាការពិតដែលជាតិកាល់ស្យូម គឺចាំបាច់ណាស់សម្រាប់ពង្រឹងសុខភាពឆ្អឹង ប៉ុន្តែតើអ្នកធ្លាប់ដឹងទេថារាងកាយក៏ត្រូវការប្រូតេអ៊ីនគ្រប់គ្រាន់ផងដែរដើម្បីរក្សាសុខភាពឆ្អឹងរឹងមាំ។ អ្នកក៏គួររួមបញ្ចូលអាហារសម្បូរប្រូតេអ៊ីនដូចជាសាច់មាន់ក្នុងរបបអាហារផង។ ជាតិខ្លាញ់ទាបនៃសាច់មាន់ក៏មិនធ្វើឱ្យអ្នកកើនទម្ងន់ដែលមិនល្អសម្រាប់ឆ្អឹងនិងស​ន្លាក់ដែរ។ ម្យ៉ាងវិញទៀតសាច់មាន់ក៏មានផ្ទុកជាតិរ៉ែផូស្វ័រ ដែលសំខាន់សម្រាប់ពង្រឹងសុខភាពឆ្អឹងនិងធ្មេញ។

៣. ជម្រុញការដុតខ្លាញ់

កំពុងព្យាយាមសម្រកទម្ងន់ដែលលើសមែនទេ? ងាយណាស់! កុំភ្លេចរួមបញ្ចូលសាច់ទ្រូងមាន់ក្នុងរបបអាហារប្រចាំថ្ងៃ។ សាច់មាន់ជាប្រភពដ៏ល្អនៃប្រូតេអ៊ីននិងវីតាមីន B6 ដែលផ្ដល់ថាមពលបន្ថែម ព្រមទាំងជួយពន្លឿនការដុតរំលាយអាហារ។ សាច់មាន់ជួយឱ្យឆាប់ឆ្អែតចៀសផុតការទទួលទានច្រើនហួស៕