ការធ្វើមេតាប៉ូលីស ឬ ការដុតអាហារយកទៅធ្វើជាថាមពល គឺជាដំណើរការមួយដែលរាងកាយរបស់យើងបំលែងអ្វីដែលយើងញ៉ាំ និងផឹក ទៅជាថាមពល ។ ល្បឿននៃការដុតអាហារយកធ្វើជាថាមពល គឺអាស្រ័យទៅលើបុគ្គល និងមានការផ្លាស់ប្តូរទៅ តាមពេលវេលា ។ វាអាស្រ័យលើកត្តាដូចជា អាយុ ភេទ កម្រិតខ្លាញ់រាងកាយ ម៉ាសនៃសាច់ដុំ កម្រិតសកម្មភាព និងកត្តាពូជ ។ ការដុតអាហារបានលឿនជួយដល់ការស្រកទម្ងន់ និងធ្វើឱ្យមិនងាយធាត់ ។ ខាងក្រោមនេះ គឺជាវិធីធម្មជាតិក្នុងការជំរុញការធ្វើមេតាប៉ូលីសរបស់រាងកាយ តាមការចុះផ្សាយរបស់គេហទំព័រ Doctor NDTV ៖
១. មានប្រូតេអ៊ីនក្នុងរបបអាហាររបស់អ្នកឱ្យបានច្រើន ៖ វាមិនត្រឹមតែជួយអ្នកបង្កើនទំហំសាច់ដុំរបស់អ្នកទេ វាថែមទាំងជួយធ្វើឱ្យមេតាប៉ូលីសរបស់អ្នកមានសន្ទុះលឿនជាងមុន ក្រោយពីអ្នកទទួលទានប្រូតេអ៊ីន ។
២. ហាត់ប្រាណដុតខ្លាញ់ ៖ ការហាត់ប្រាណដុតខ្លាញ់ ដូចជាការរត់ ការហែលទឹក ការធាក់កង់ជាដើម ជួយដល់ការដុតបំផ្លាញ់ខ្លាញ់ ដោយសារតែវាពន្លឿនពេលក្នុងការរំលាយអាហារ ហើយនៅតែបន្តដុតខ្លាញ់ទោះបីជាឈប់ហាត់អស់រយៈពេលជាច្រើនម៉ោងក៏ដោយ ។
៣. កាត់បន្ថយការស្រ្តេស ៖ បន្ថយភាពតានតឹង ឬ ក៏ស្រ្តេស គឺពិបាកមិនដូចការនិយាយនោះទេ ។ រក្សាការរំលាយអាហារដែលមានសុខភាពល្អ ក៏ត្រូវបានផ្សារភ្ជាប់ទៅនឹងកម្រិតនៃភាពតានតឹងរបស់យើងដែរ ។ ការស្រាវជ្រាវបានបង្ហាញថា នៅពេលអ្នកស្ត្រេស ល្បឿននៃការធ្វើមេតាប៉ូលីសមានការថយចុះ ដែលធ្វើឱ្យការសម្រកទម្ងន់ក៏មិនអាចទៅរួចដែរ ។
៤. គេងលក់ស្រួល ៖ ការគេងមិនបានគ្រប់គ្រាន់ អាចធ្វើអោយការរំលាយអាហាររបស់អ្នកថយចុះ ។ ម្យ៉ាងវិញទៀត នៅពេលយើងមិនគេង យើងអាចនឹងចេះតែចង់ញ៉ាំនេះញ៉ាំនោះ ដែលធ្វើឱ្យងាយនឹងធាត់ ។ យើងគួរព្យាយាមគេង ៧-៨ ម៉ោងរាល់យប់ ។ នៅពេលគេង រាងកាយរបស់យើងបង្កើនការបញ្ចេញអរម៉ូនឈ្មោះថា ឡិបទីន (Leptin) ដែលវាធ្វើឱ្យយើងមានអារម្មណ៍ថាឆ្អែត ។
៥. ទទួលទានទឹកឱ្យបានច្រើន ៖ រាងកាយរបស់អ្នកត្រូវការជាតិទឹក ដើម្បីរំលាយ និងស្រូបយកសារធាតុចិញ្ចឹមនៅក្នុងអាហារដែលអ្នកញ៉ាំ ។ កោសិកា និងសរីរាង្គដែលមានជាតិទឹកមិនគ្រប់គ្រាន់ មិនដំណើរការដូចធម្មតានោះទេ ។ វាធ្វើឱ្យល្បឿននៃការធ្វើមេតាប៉ូលីសថយចុះ ។ ការទទួលទានទឹកនេះ គឺគួរតែជាទឹកពិសាបរិសុទ្ធធម្មតា ព្រោះវាល្អសម្រាប់សុខភាពជាងទឹកដែលមានជាតិផ្អែមៗ ៕