ខ្ទឹមសដែលត្រាំក្នុងទឹកឃ្មុំផ្តល់អត្ថប្រយោជន៍ជាច្រើនដល់សុខភាព។ អ្នកអាចប្រើវាជារៀងរាល់ថ្ងៃ ដើម្បីបង្កើនភាពស៊ាំរបស់អ្នក និងការពារជំងឺមួយចំនួន។
ប្រសិទ្ធភាពនៃខ្ទឹមសត្រាំក្នុងទឹកឃ្មុំ
ខ្ទឹមសគឺជាគ្រឿងទេសដែលធ្លាប់ស្គាល់នៅក្នុងផ្ទះបាយគ្រួសារ។ តាំងពីបុរាណកាលមក មនុស្សបានប្រើប្រាស់ខ្ទឹមសក្នុងឱសថបុរាណ ដើម្បីជួយការពារ និងព្យាបាលជំងឺ។ ការស្រាវជ្រាវបែបវិទ្យាសាស្ត្រទំនើបបង្ហាញថាខ្ទឹមសមានផ្ទុកនូវសារធាតុដែលមានប្រយោជន៍ច្រើនចំពោះសុខភាព។ ខ្ទឹមសមានផ្ទុកនូវវីតាមីន C វីតាមីន B6 ម៉ង់ហ្គាណែស និងសេលេញ៉ូមជាច្រើន ដើម្បីជួយពង្រឹងសុខភាព។ ជាពិសេស សារធាតុ Allicin ក្នុងខ្ទឹមស មានឥទ្ធិពលប្រឆាំងបាក់តេរី មេរោគ ពង្រឹងប្រព័ន្ធការពាររាងកាយ និងការពារជំងឺសរសៃឈាមបេះដូង។
ទន្ទឹមនឹងនេះ ទឹកឃ្មុំមានវីតាមីន សារធាតុរ៉ែ សារធាតុប្រឆាំងបាក់តេរី និងអង់ស៊ីមជាច្រើន ដែលជួយការពារអុកស៊ីតកម្ម ការពារភាពចាស់ និងការពាររាងកាយពីការខូចខាត។
ការផ្សំខ្ទឹមស និងទឹកឃ្មុំចូលគ្នាបង្កើតជាឱសថដែលនាំមកនូវអត្ថប្រយោជន៍ជាច្រើនចំពោះសុខភាព។
-បំបាត់ការក្អក
ខ្ទឹមសមានសារធាតុប្រឆាំងអុកស៊ីតកម្ម និងប្រឆាំងនឹងការរលាក រួមផ្សំជាមួយនឹងទឹកឃ្មុំ ដើម្បីកាត់បន្ថយការក្អក និងឈឺបំពង់ក ក្នុងករណីផ្តាសាយ និងការឆ្លងមេរោគបាក់តេរី និងវីរុសទូទៅ។
អ្នកត្រូវប្រើខ្ទឹមស និងទឹកឃ្មុំ ១-២ ស្លាបព្រាបាយ (ប្រើដូចគ្នានឹងការប្រើស៊ីរ៉ូក្អក) ដើម្បីបំបាត់ការឈឺបំពង់ក។
-ពង្រឹងសុខភាពសរសៃឈាមបេះដូង
ការស្រាវជ្រាវបង្ហាញថា អាហារសម្បូរខ្ទឹមសមានប្រសិទ្ធភាពក្នុងការកាត់បន្ថយកូឡេស្តេរ៉ុល ជាពិសេសកូលេស្តេរ៉ុលអាក្រក់ក្នុងរាងកាយ។ លើសពីនេះ ខ្ទឹមសក៏ជួយកាត់បន្ថយសម្ពាធឈាម កាត់បន្ថយខ្លាញ់អាក្រក់ក្នុងឈាម និងធ្វើឱ្យសុខភាពសរសៃឈាមបេះដូងប្រសើរឡើង។
-រក្សាលំនឹងជាតិស្ករក្នុងឈាម
ខ្ទឹមសមានផ្ទុកសារធាតុ Allicin ដែលមានឥទ្ធិពលប្រឆាំងអុកស៊ីតកម្មខ្លាំង និងរួមចំណែកក្នុងការរក្សាលំនឹងជាតិស្ករក្នុងឈាម។ ទឹកឃ្មុំមានសារធាតុផ្អែម ប៉ុន្តែមិនដូចជាតិផ្អែមផ្សេងទៀតទេ វាក៏មានផ្ទុកសារធាតុប្រឆាំងអុកស៊ីតកម្មដែលអាចការពាររាងកាយផងដែរ។ ការស្រាវជ្រាវបានបង្ហាញថាការប្រើប្រាស់ទឹកឃ្មុំឱ្យបានត្រឹមត្រូវអាចជួយបង្កើនកម្រិត adiponectin ដែលជាអរម៉ូនដែលកាត់បន្ថយការរលាក និងធ្វើអោយប្រសើរឡើងនូវការគ្រប់គ្រងជាតិស្ករក្នុងឈាម។
ចំណាំ៖ ទឹកឃ្មុំប្រហែលជាល្អជាងស្ករបន្តិច ប៉ុន្តែអ្នកជំងឺទឹកនោមផ្អែមគួរតែនៅតែប្រើអាហារនេះដោយប្រុងប្រយ័ត្ន។
-កាត់បន្ថយការឈឺចាប់សន្លាក់
ខ្ទឹមសមានសារធាតុប្រឆាំងអុកស៊ីតកម្មដែលជួយកាត់បន្ថយការឈឺចាប់សន្លាក់។ ការសិក្សាមួយដែលត្រូវបានចេញផ្សាយនៅក្នុងទិនានុប្បវត្តិ International Journal of Clinical Practice បានបង្ហាញថាស្ត្រីដែលមានជំងឺរលាកសន្លាក់ជង្គង់ដែលប្រើខ្ទឹមសជារៀងរាល់ថ្ងៃរយៈពេល 12 សប្តាហ៍មានការថយចុះ 26% នៃការឈឺចាប់ និង 13% នៃការឡើងរឹងនៃសន្លាក់។
-ល្អសម្រាប់ខួរក្បាល
ខ្ទឹមស និងទឹកឃ្មុំមានសារធាតុប្រឆាំងអុកស៊ីតកម្មជាច្រើន ដែលជួយពង្រឹងភាពស៊ាំ ក៏ដូចជាការពារជំងឺ ប្រឆាំងរ៉ាឌីកាល់សេរី ដែលបំផ្លាញកោសិកា ការពារខួរក្បាល និងការពារជំងឺវង្វេងដោយសារភាពចាស់ និងជំងឺភ្លេចភ្លាំង។
វិធីធ្វើខ្ទឹមសត្រាំទឹកឃ្មុំ
អ្នកត្រូវរៀបចំខ្ទឹមសស្រស់ ទឹកឃ្មុំសុទ្ធ និងក្រឡកែវមួយ។
ក្រឡត្រូវរម្ងាប់មេរោគដោយទឹកពុះ ហើយស្ងួតមុនពេលប្រើ។
បកសំបកខ្ទឹមស លាងទឹកអោយស្អាត រួចទុកអោយស្ងួត។ បន្ទាប់មកកាត់ខ្ទឹមសជាចំណិតស្តើងៗ ឬបុក។
ដាក់ខ្ទឹមសក្នុងក្រឡកែវ។ ចាក់ទឹកឃ្មុំចូលក្នុងក្រឡឱ្យលិចខ្ទឹមសទាំងអស់។ បិទគម្របក្រឡ ហើយទុកក្នុងកន្លែងត្រជាក់ និងស្ងួត។ បន្ទាប់ពីនោះប្រហែល 20 ថ្ងៃវាអាចប្រើបាន។ ដើម្បីរក្សាវាឱ្យបានយូរ អ្នកគួរដាក់ខ្ទឹមសទឹកឃ្មុំក្នុងទូទឹកកក។ រាល់ពេលដែលអ្នកប្រើវា អ្នកត្រូវតែប្រើស្លាបព្រាស្អាតមួយដើម្បីដួសខ្ទឹមសទឹកឃ្មុំចេញ។
វិធីប្រើខ្ទឹមសត្រាំក្នុងទឹកឃ្មុំ
-ប្រើដោយផ្ទាល់
អ្នកអាចយកខ្ទឹមសត្រាំទឹកឃ្មុំមួយស្លាបព្រា ញ៉ាំវាដោយផ្ទាល់មុនពេលអាហារដើម្បីជំរុញការរំលាយអាហារ បង្កើនរសជាតិ និងបង្កើតចំណង់អាហារ។
-លាយទឹកផឹក
លាយខ្ទឹមសទឹកឃ្មុំ ចូលក្នុងទឹកក្តៅឧណ្ហៗ ឬតែ ហើយប្រើដោយផ្ទាល់។
-ប្រើជាទឹកជ្រលក់សាឡាដ
អ្នកអាចប្រើខ្ទឹមសត្រាំកទឹកឃ្មុំផ្សំជាមួយគ្រឿងទេសផ្សេងៗដើម្បីធ្វើទឹកជ្រលក់លាយជាមួយបន្លែ។
ចំណាំនៅពេលប្រើខ្ទឹមសត្រាំទឹកឃ្មុំ
កុំប្រើខ្ទឹមសត្រាំទឹកឃ្មុំច្រើនពេក ព្រោះវាអាចបង្កើនជាតិស្ករក្នុងឈាម។ លើសពីនេះ ការផឹកខ្ទឹមស និងទឹកឃ្មុំច្រើនពេក ក៏បង្កើនហានិភ័យនៃការស្តើង អេម៉ូក្លូប៊ីន ធ្វើឱ្យឈាមស្តើង។
អ្នកដែលមានអាឡែស៊ីទៅនឹងសារធាតុផ្សំ (ឬទាំងពីរ) ឬអ្នកដែលមានប្រព័ន្ធរំលាយអាហារមិនល្អ មិនគួរប្រើវាឡើយ ដើម្បីចៀសវាងប្រតិកម្មអវិជ្ជមានលើរាងកាយ៕
