បុគ្គលដែលនៅជុំវិញអ្នកដែលមានជំងឺបាក់ទឹកចិត្តអាចជាអ្នកជួយជម្រុញឲ្យគេកាន់តែគិតខ្លី ហើយក៏ជាអ្នកដែលអាចជួយសង្គ្រោះជីវិតរបស់ពួកគេផងដែរ។ ជាពិសេស ពាក្យសម្តីមិនប្រយ័ត្នរបស់អ្នកមួយម៉ាត់ អាចធ្វើឲ្យជីវិតមួយបាត់បង់យ៉ាងលឿន។ ដូចនេះ ខាងក្រោមនេះ យើងខ្ញុំនឹងបង្ហាញអ្នកពីវិធីក្នុងការជួយអ្នកដែលមានជំងឺបាក់ទឹកចិត្តឲ្យមានសង្ឃឹមវិញ។ តើមានអ្វីខ្លះទៅ?  (អាន:ថ្នាំងងុយគេង ពេលអ្នកគួរប្រើ)

  1. ដំបូង នៅពេលដែលអ្នកសង្កេតឃើញបងប្អូន មិត្តភក្តិ ឬនរណាម្នាក់មានអាការៈមិនប្រក្រតី អ្នកគួរតែហ៊ានសួរពួកគាត់ថាតើមានរឿងអ្វីកើតឡើង។ អ្នកគួរតែផ្តល់កម្លាំងចិត្ត និងជួយលើកទឹកចិត្តគាត់ ហើយធ្វើឲ្យគាត់ដឹងថាអ្នកអាចជាប្រិយមិត្តដែលអាចស្តាប់រឿងគាត់បាន។ ក្រោយពេលដែលពួកគាត់ព្រមនិយាយ អ្នកគួរតែបង្វែលអារម្មណ៍របស់អ្នកទាំងស្រុងទៅលើពួកគាត់។
  2. បន្ទាប់មក អ្នកគួរតែសួរសំណួរដល់ពួកគាត់ ដោយសួរសំណួរដែលល្អ។ អ្នកអាចសួរឲ្យពួកគាត់និយាយរឿងទាំងឡាយប្រាប់អ្នកឲ្យកាន់តែច្បាស់ ដោយមិនគួរសួរសំណួរដែលបញ្ឈឺឲ្យពួកគាត់កាន់តែអស់សង្ឃឹមនោះទេ។
  3. បន្ទាប់មកទៀត អ្នកគួរតែស្តាប់ដោយយកចិត្តទុកដាក់ ហើយផ្តោតអារម្មណ៍ទាំងមូលលើពួកគាត់ ព្រោះការស្តាប់ដោយយកចិត្តទុកដាក់ ទើបអាចធ្វើឲ្យគាត់និយាយចេញមកអស់ពីចិត្ត មិនធ្វើឲ្យពួកគាត់ទុកក្នុងចិត្ត ហើយគ្មានកន្លែងបន្ធូរ ដោយគិតតែចង់សម្លាប់ខ្លួន។
  4. ក្រោយពេលដែលពួកគាត់និយាយអស់ អ្នកអាចសម្រាយពីបញ្ហារបស់ពួកគាត់ចេញមក ថាតើពួកគាត់កំពុងតែមានបញ្ហាអ្វី ដោយសម្រាយឲ្យបានច្បាស់ និងត្រឹមត្រូវ។
  5. ចុងក្រោយ អ្នកអាចផ្តល់គំនិតរបស់អ្នកដល់ពួកគាត់បាន ដោយផ្តល់គំនិតល្អ មិនមែនបញ្ឈឺឲ្យគាត់គិតខ្លីនោះទេ។ អ្នកគួរតែធ្វើឲ្យពួកគាត់ដឹងថា បញ្ហាទាំងឡាយសុទ្ធតែអាចដោះស្រាយបាន ហើយជីវិតគឺមានតម្លៃណាស់ មិនមែនជាសម្រាមនោះទេ។ ដូចនេះ អ្នកគួរតែជួយនិយាយជាមួយពួកគាត់រហូតដល់ពួកគាត់យល់ពីតម្លៃនៃជីវិត ហើយយល់ពីបញ្ហាទាំងឡាយរបស់ពួកគាត់ គឺអាចដោះស្រាយបាន ទើបពួកគាត់មានសង្ឃឹមរស់បន្តទៅទៀត៕ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)