គួរអាន! ទម្លាប់ងាយៗដែលអ្នកគួរប្រកាន់ខ្ជាប់ ដើម្បីកែប្រែជីវិតឱ្យកាន់តែប្រសើរ

ពេលខ្លះការកែប្រែ ឬយកចិត្តទុកដាក់សំខាន់លើរបៀបនៃការរស់នៅប្រចាំថ្ងៃ គឺជាអ្វីមួយដែលយើងគួរសាកល្បងអនុវត្តដើម្បីទទួលបានភាពផ្លាស់ប្ដូរវិជ្ជមានដ៏ប្រសើរមួយក្នុងជីវិត។ មនុស្សម្នាក់ៗមានទម្លាប់ជាច្រើនរៀងខ្លួនទាំងល្អ និងអាក្រក់? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែថាតើហេតុអ្វីមិនព្យាយាមកែប្រែទម្លាប់ទាំងនោះឱ្យក្លាយជាមានប្រយោជន៍ចំពោះសុខភាពទៅ? ឆ្ងល់ថាគួរធ្វើយ៉ាងណាដើម្បីអាចមានទម្លាប់ល្អប្រសើរមែនទេ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ងាយៗមួយចំនួនដែលអ្នកគួរប្រកាន់ខ្ជាប់ដើម្បីអាចផ្លាស់ប្ដូរជីវិតរស់នៅឱ្យកាន់តែប្រសើរឡើង ៖

១. ទទួលទានទឹកធម្មតា ១ កែវជាមួយក្រូចឆ្មារនៅពេលព្រឹក

ចូរបង្កើតទម្លាប់ល្អមួយដោយទទួលទានទឹកក្ដៅឧណ្ហៗលាយជាមួយទឹកក្រូចឆ្មារ និងម្ទេសក្រហមម៉ដ្ឋមួយចិបរាល់ថ្ងៃ។ ទម្លាប់នេះនឹងជួយបង្កើនភាពសកម្ម ក៏ដូចជាសម្រួលដល់ដំណើរការនៃការដុតរំលាយអាហារនៅពេលអ្នកចាប់ផ្ដើមទទួលទានអាហារពេលព្រឹក។ ទឹកក្រូចឆ្មារមានផ្ទុកសម្បូរទៅដោយវីតាមីន C ដែលនឹងបង្កើនប្រព័ន្ធភាពស៊ាំរាងកាយ ខណៈដែលម្ទេសក្រហមជួយពន្លឿនការដុតរំលាយអាហារ។ លើសពីនេះទៅទៀត ភេសជ្ជៈនេះក៏ជួយរក្សាសុខភាពស្បែកល្អប្រសើរផងដែរ។

២. គេងពាក់ស្រោមជើង

ក្រោយពេលងូតទឹកមុនពេលចូលគេង ចូរលាបម៉ាស្សាប្រេងដូងលាយជាមួយប្រេងជីអង្កាមប៉ុន្មានដំណក់លើប្រអប់ជើងឱ្យសព្វ សឹមពាក់ស្រោមជើងសម្រាប់រយៈពេលពេញមួយយប់។ ជាលទ្ធផលនៃទម្លាប់នេះ គឺនឹងធ្វើឱ្យប្រអប់ជើងរបស់អ្នកប្រែជាទន់រលោងស្រស់ស្អាត។ ហើយរយៈពេលមួយខែក្រោយអ្នកនឹងគ្មានបញ្ហាស្បែកកែងជើងគ្រើមៗទៀតឡើយ។ ជ្រើសរើសស្រោមជើងកប្បាស ឬ cotton សម្រាប់រដូវក្ដៅ ហើយស្រោមជើងធ្វើឡើងពីអំបោះឡែនសម្រាប់រដូវរងារ។

៣. ទទួលទានផ្លែប៉ោមមួយផ្លែ ក្រោយអាហារមួយពេល

ការទទួលទានផ្លែប៉ោមក្រោយអាហារជាវិធីដ៏ងាយបំផុតដើម្បីកម្ចាត់កំទេចកំទីអាហារជាប់ធ្មេញ។ ទម្លាប់នេះក៏ជួយបង្កើនចរន្តឈាមរត់ក្នុងអញ្ចាញ និងបន្សាបជាតិអាស៊ីតក្នុងមាត់ផងដែរ។ លើសពីនេះទៅទៀត ការទទួលទានបន្លែ និងផ្លែឈើស្រស់ៗជួយទប់ស្កាត់ជំងឺអញ្ចាញធ្មេញ។

៤. ដាក់ទឹកធម្មតាមួយដបលើតុ

មនុស្សភាគច្រើនមិនបានដឹងខ្លួនទេថា ពួកគេកំពុងទទួលរងបញ្ហាខ្សោះជាតិទឹកក្នុងរាងកាយ។ ប្រសិនបើអ្នកបានសម្រេចចិត្តថានឹងប្រកាន់នូវទម្លាប់ ឬរបៀបរស់នៅសុខភាពល្អហើយនោះ អ្វីដំបូងបំផុតដែលអ្នកគួរអនុវត្ត គឺទទួលទានទឹកឱ្យបានគ្រប់គ្រាន់ជាប្រចាំ។ ចូរព្យាយាមយកទឹកធម្មតាមួយដបតាមខ្លួនជានិច្ច ហើយកុំភ្លេចទុកវានៅលើតុធ្វើការ ឬតុរៀនផងដើម្បីឱ្យអ្នកអាចទទួលទានបានច្រើនគ្រប់គ្រាន់។

៥. ទទួលទានគ្រាប់ធញ្ញជាតិ

ការទទួលទានគ្រាប់ធញ្ញជាតិមិនតិចជាង ៥០ ក្រាមរាល់ថ្ងៃ គឺជាទម្លាប់ដ៏ល្អបំផុតមួយដើម្បីរក្សាបាននូវសុខភាពល្អប្រសើរ។ នោះក៏ព្រោះតែគ្រាប់ធញ្ញជាតិមានផ្ទុកសម្បូរទៅដោយអាស៊ីតខ្លាញ់អូមេហ្គា​ ៣ ជួយពង្រឹងរក្សាសសៃឈាមបេះដូង, សក់ និងក្រចក។ លើសពីនេះទៅទៀត គ្រាប់ធញ្ញជាតិក៏ជាប្រភពដ៏ប្រសើរនៃសារធាតុចិញ្ចឹមចាំបាច់ និងវីតាមីនសំខាន់ៗ រួមមានសេលេញ៉ូម, សារធាតុប្រឆាំងអុកស៊ីតកម្ម, វីតាមីន E , សារធាតុបញ្ចុះកម្រិតកូឡេស្តេរ៉ូលមិនល្អ plant sterols, ជាតិប៉ូតាស្យូម, កាល់ស្យូម, ជាតិដែក, ម៉ាញ៉េស្យូម និងស័ង្កសី។

៦. អានរាល់ថ្ងៃ

ការអានជួយបង្កើនការចងចាំ, ការគិត និងស្រមៃរបស់អ្នកបានយ៉ាងប្រសើរ។ ទម្លាប់នេះក៏ជួយកាត់បន្ថយហានិភ័យនៃជំងឺភ្លេចភ្លាំង និងវង្វេងស្មារតីផងដែរ។ ប្រសិនបើអ្នកទើបនឹងចាប់ផ្ដើមទម្លាប់នៃការអាន ចូរអានសម្រាប់រយៈពេលត្រឹមតែពី ១៥ ទៅ ២០ នាទី សិនក៏បាន ហើយសឹមចាប់ផ្ដើមកំឡុងពេលនៃការអានតាមក្រោយបន្តបន្ទាប់ទៀត៕