តើអ្នកមានអារម្មណ៍ក្តៅៗចេញពីក្នុងខ្លួនដែរឬអត់? នេះអាចជាអារម្មណ៍ដ៏គួរឱ្យរំខានមួយ ដែលធ្វើឱ្យអ្នកមានការព្រួយបារម្ភពីស្ថានភាពសុខភាពរបស់ខ្លួនឯង។ តើវាបណ្តាលមកពីហេតុអ្វី? ថ្ងៃនេះ អ្នកនឹងបានស្គាល់។
១. ការឆ្លងមេរោគ
នៅរាល់ពេលអ្នកឆ្លងមេរោគណាមួយដូចជំងឺផ្ដាសាយ នោះរាងកាយនឹងបង្កើនសីតុណ្ហភាព ដើម្បីជួយកោសិកាប្រព័ន្ធភាពស៊ាំកម្ចាត់ពពួកមេរោគបាក់តេរីដែលចូលមកឈ្លានពានក្នុងរាងកាយ។ ការបង្កើនសីតុណ្ហភាពនេះហើយ ដែលធ្វើឱ្យអ្នកមានអារម្មណ៍ក្ដៅៗចេញពីក្នុង។ គ្រុនក្ដៅដោយសារការឆ្លងមេរោគណាមួយអាចមានរយៈពេលយូរពី ២ ឬ ៣ ថ្ងៃដល់មួយសប្តាហ៍។ ប្រសិនបើក្ដៅខ្លួនខ្លាំង ឬអាការៈក្ដៅខ្លួនមិនបាត់ទៅវិញក្នុងរយៈពេល ២ ឬ ៣ ថ្ងៃក្រោយ អ្នកត្រូវទៅជួបជាមួយនឹងគ្រូពេទ្យជាបន្ទាន់។
២. មានបញ្ហាក្រពេញទីរ៉ូអ៊ីត
បញ្ហាក្រពេញទីរ៉ូអ៊ីតសកម្មពេក ឬ កម្រិតអ័រម៉ូនទីរ៉ូអ៊ីតឡើងខ្ពស់ អាចបណ្ដាលឱ្យអ្នកមានអារម្មណ៍ក្ដៅចេញពីក្នុងខ្លួនជាប់ជានិច្ច។ ក្រពេញទីរ៉ូអ៊ីតសកម្មពេក កើតឡើងនៅពេលក្រពេញទីរ៉ូអ៊ីតផលិតអ័រម៉ូនទីរ៉ូអ៊ីតច្រើនពេក។ ស្ថានភាពនេះអាចជះផលប៉ះពាល់លើការគ្រប់គ្រងសីតុណ្ហភាពនៃរាងកាយ។
៣. ការអស់រដូវ
អារម្មណ៍ក្ដៅភាយៗពីមួយពេលទៅមួយពេល មិនមែនជារឿងប្លែកអ្វីឡើយសម្រាប់ស្ត្រីដែលមានវ័យចន្លោះពី ៤០ ទៅ ៥០ ឆ្នាំ នោះក៏ព្រោះតែបញ្ហានេះផ្សារភ្ជាប់នឹងការអស់រដូវ ឬជារោគសញ្ញាមុនពេលអស់រដូវ ដែលអាចកើតឡើងរយៈពេល ២ ទៅ ៣ ឆ្នាំ មុនពេលអស់រដូវ។ នេះគឺបង្កមកពីអតុល្យភាពនៃអរម៉ូន៕