ស្វែងយល់អំពីរោគសញ្ញានៃការបង្ករោគនៅផ្លូវទឹកម៉ូត្រ

បើសិនជាអ្នកមានការបង្ករោគនៅផ្លូវទឹកម៉ូត្រ (Urinary Tract Infection, UTI) អ្នកប្រហែលជាមានអាការដូចតទៅ៖

• ឈឺ ឬក្រហាយពេលនោម
• ឈឺនៅពោះផ្នែកខាងក្រោម នៅលើប្លោកនោម
• ចេះតែចង់នោមបន្ទាន់ និងជាញឹកញាប់
• គ្រាន់តែអាចនោមចេញតិចៗប៉ុណ្ណោះពេលនោមម្តងៗ
• ឈឺចង្កេះ

ទឹកនោមអ្នកអាចមានលក្ខណៈដូចជា៖

• ល្អក
• ឈាម
• ក្លិនស្អុយ

បុរសវិញក៏អាចមានជំងឺ UTI នេះដែរ ដោយមានអាការៈបន្ថែមដូចជា៖

• ឈឺនៅក្រោយថង់ពងស្វាស
• ឈឺពេលចេញទឹកកាម ឬមានឈាមក្នុងទឹកកាម (កម្រ)

បើសិនជាអ្នកមានរោគសញ្ញាដូចជា ក្តៅខ្លួន គ្រុន ឬចង្អោ វាប្រហែលជាការបង្ករោគកាន់តែធ្ងន់ធ្ងរដូចជា ការប្ករោគនៅតម្រងនោម ដូច្នេះត្រូវទៅជួបពេទ្យភ្លាម។ 

ជំងឺ UTI ក្នុងពេលមានផ្ទៃពោះគឺជារឿងដែលត្រូវបារម្ភខ្លាំង។ បើសិនជាអ្នកមានរោគសញ្ញាដូចខាងលើ ចូរទៅជួបគ្រូពេទ្យឲ្យបានលឿនបំផុតតាមតែអាចធ្វើទៅបាន។ ក្នុងពេលពិនិត្យសុខភាពផ្ទៃពោះ អ្នកនឹងត្រូវធ្វើការពិនិត្យទឹកនោមជាទៀងទាត់ដើម្បីពិនិត្យរកមើលជំងឺ UTI នេះឯង។ 

ចូរទាក់ទងទៅគ្រូពេទ្យភ្លាមបើសិនជា៖

• មានការឈឺចាប់ ក្រហាយ ឬបញ្ហាផ្សេងៗគ្រប់ប្រភេទនៅពេលនោម
• សម្គាល់ឃើញឈាមក្នុងទឹកនោម
• ចាប់ផ្តើមនោមញឹក និងមានទឹកនោមតិចៗ
• ចេះតែចង់នោមខ្លាំង
• ឈឺនៅខ្នង ឬកន្លែងណាមួយនៅលើប្លោកនោម
• សម្គាល់ឃើញថា ទឹកនោមល្អក ឬខាប់ ឬមានក្លិនមិនល្អ
• ក្តៅខ្លួន ឬគ្រុន៕