ការគេងគ្រប់គ្រាន់គឺជាផ្នែកមួយដ៏សំខាន់ដើម្បីមានសុខភាពល្អ។ នៅពេលអ្នកគេង រាងកាយនឹងធ្វើការជួសជុលអ្វីដែលខូចខាតដោយខ្លួនឯង ដូច្នេះ ខួរក្បាល និងរាងកាយអាចធ្វើការបានយ៉ាងល្អនៅពេលភ្ញាក់ឡើង។(អាន៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែតើអ្នកមានដឹងទេថា ការដែលទទួលបានការគេងគ្រប់គ្រាន់ ក៏អាចការពារមិនឲ្យឈឺក្បាលបានដែរ?
ខាងក្រោមនេះគឺជារយៈពេលគេងដែលអ្នកគួរតែគេងឲ្យបានគ្រប់ទៅតាមអាយុ៖
- អាយុចាប់ពី ៣ខែចុះ ត្រូវការគេង ១៤ ទៅ ១៧ម៉ោង
- អាយុ ៤ទៅ ១១ខែ ត្រូវការគេង ១២ ទៅ ១៥ម៉ោង
- អាយុ ១ ទៅ ២ឆ្នាំ ត្រូវការគេង ១១ ទៅ ១៤ម៉ោង
- អាយុ ៣ ទៅ ៥ឆ្នាំ ត្រូវការគេង ១០ ទៅ១៣ម៉ោង
- អាយុ ៦ ទៅ ១៣ឆ្នាំ ត្រូវការគេង ៩ ទៅ ១១ម៉ោង
- អាយុ ១៤ ទៅ១៧ឆ្នាំ ត្រូវការគេង ៨ ទៅ១១ម៉ោង
- អាយុ ១៨ ទៅ ៦៤ឆ្នាំ ត្រូវការគេង ៧ ទៅ ៩ម៉ោង
- អាយុចាប់ពី ៦៥ឆ្នាំឡើងត្រូវការគេង ៧ ទៅ ៨ម៉ោង
ខាងក្រោមនេះគឺជារឿងមួយចំនួនតូចដែលអ្នកអាចធ្វើបានដើម្បីគ្រប់គ្រងការឈឺក្បាលបែប Tension ដែលកើតឡើងដោយសារតែគេងមិនបានគ្រប់គ្រាន់៖
- បន្ថយស្រ្តេសតាមរយៈការហាត់ប្រាណ បន្ធូរអារម្មណ៍ ឬព្យាបាលការបន្ធូរអារម្មណ៍
- ចូរស្អំទឹកត្រជាក់ ឬក្តៅលើក្បាលរយៈពេល ៥ ទៅ ១០នាទីក្នុងមួយដង ដើម្បីបន្ថយការឈឺចាប់
- អ្នកក៏អាចប្រើវិធីម៉ាស្សាក្បាលបានដែរ។
ខាងក្រោមនេះប្រហែលជាអាចជួយសម្រួលដល់ការឈឺក្បាលបែបប្រកាំងក្រោយពីគេងមិនបានគ្រប់គ្រាន់ដែរ៖
- ប្រើវិធីបន្ធូរអារម្មណ៍
- ចូរសម្រាកក្នុងបន្ទប់ងងឹត ស្ងាត់នៅពេលមានអារម្មណ៍ថាជិតឈឺក្បាល
- ចូរស្អំទឹកកកកនៅលើកញ្ចឹងក និងម៉ាស្សាថ្នមៗនៅលើថ្ងៃ ឬកន្លែងដែលមានការឈឺចាប់ខ្លាំង(អាន៖ ថ្នាំងងុយគេងពេលអ្នកគួរប្រើ)
- ម៉ាស្សា ឬចាក់ម្ជុរវិទ្យាសាស្រ្ត
- លេបថ្នាំបំប៉នប្រភេទ Vitamin B-2, Coenzyme Q10 និង ម៉ាញ៉េស្យូម។
មធ្យោបាយដ៏ងាយស្រួលបំផុតក្នុងការបង្ការការឈឺក្បាល គឺរក្សាឲ្យបាននូវទម្លាប់នៃការគេងប្រកបដោយសុខភាពល្អ។ ខាងក្រោមនេះខ្ញុំសូមបង្ហាញវិធីសាស្រ្តខ្លះៗដើម្បីរក្សាអនាម័យល្អក្នុងពេលគេង៖
- ហាត់ប្រាណជាទៀងទាត់ តែកុំហាត់ប្រាណជិតម៉ោងគេងពេក ព្រោះអាចធ្វើឲ្យគេងមិនលក់បាន។ ចូរព្យាយាមហាត់ប្រាណយ៉ាងហោចណាស់ មុនពេលគេង ៣ម៉ោង
- ញ៉ាំអាហារតិចៗនៅពេលយប់
- ចូរគេងឲ្យទៀងម៉ោង និងភ្ញាក់ទៀងម៉ោងដែរ
- ចូរប្រាកដថា អ្នកបានប៉ះពាល់នឹងពន្លឺខ្លះៗនៅពេលថ្ងៃ ព្រោះការខ្វះការប៉ះពាល់នឹងពន្លឺថ្ងៃអាចធ្វើឲ្យអ្នកមានអារម្មណ៍អស់កម្លាំង និងរំខានដល់ការគេងបាន
- ចូរចៀសវាងការញ៉ាំគ្រឿងស្រវឹង នីកូទីន និងកាហ្វេអ៊ីនរយៈពេល ៤ ទៅ៦ម៉ោងមុនគេង ព្រោះវាអាចរំខានការគេងបាន
- ចូរប្រាកដថា បន្ទប់គេងអ្នកងងឹត ត្រជាក់ ស្ងាត់ និងមានផាសុកភាព
- ចូរយកចេញពីបន្ទប់គេងឲ្យអស់នូវអ្វីដែលរំខានដល់ការគេង ឬធ្វើឲ្យអ្នកស្រ្តេសមុនគេង ដូចជា គ្រឿងអេឡិចត្រូនិច។ ចូរកាត់បន្ថយសកម្មភាពក្នុងបន្ទប់គេងរួមទាំងការរួមភេទដែរ
- ចូរបង្កើតទម្លាប់មុនពេកគេង ដូចជាការតាំងសមាធិ អានសៀវភៅ ឬងូតទឹកជាដើម
- ចូរចូលគេងនៅពេលមានអារម្មណ៍ថាអស់កម្លាំងចៀសជាងការបង្ខំខ្លួនឯងឲ្យគេង
- មិនត្រូវញ៉ាំទឹកច្រើនពេកមុនពេលគេងឡើយ៕
