រាងកាយរបស់ស្ត្រីនឹងមានការប្រែប្រួលយ៉ាងសំខាន់ៗជាច្រើនក្នុងពេលមានផ្ទៃពោះ ហើយក៏ត្រូវខិតខំធ្វើការខ្លាំងណាស់ដែរក្នុងពេលសម្រាលកូនម្តង។ នៅពេលក្លាយខ្លួនជាម្តាយគេម្នាក់ក្នុងផ្ទះហើយ ស្ត្រីពិតជាមានអារម្មណ៍សប្បាយចិត្តយ៉ាងខ្លាំង ប៉ុន្តែនាងប្រហែលជាមិនពេញចិត្តចំពោះរូបរាងរបស់នាងឡើយ។ ក្នុងដំណើរការថែរក្សារាងកាយ រាល់ស្ត្រីជាម្តាយ គួររក្សាខ្លួនឯងអោយមានសុខភាពល្អ ត្រូវការចំណាយពេលវេលាតិចតួច ហើយក៏គួរតែធ្វើបន្តិចម្តងៗ និងអោយសមហេតុសមផលដែរ។
ដើម្បីរក្សារាងអោយនៅស្អាតក្រោយពីមានផ្ទៃពោះរួច យកល្អធ្វើការសម្រកទម្ងន់អោយបានយឺតៗ។ អ្នកគួរតែមានកំណត់គោលដៅលើខ្លួនឯងក្នុងរយៈពេល ៦ខែធ្វើយ៉ាងអោយទទួលបានរាងកាយដូចពេលមិនទាន់មានផ្ទៃពោះវិញ មុនពេលសម្រេចចិត្តសាកល្បងបង្អត់អាហារ។ ក្នុងពេលក្លាយជាម្តាយគេភ្លាមៗ រាងកាយរបស់អ្នកត្រូវការថាមពល និងជីវជាតិបន្ថែមមួយចំនួនដើម្បីបំពេញនូវតម្រូវការនៃការញ៉ាំអាហារ និងថែរក្សាខ្លួន។
ដើម្បីរក្សារាងអោយបានស្អាតក្រោយពីមានផ្ទៃពោះរួច យើងមានវិធីសាស្ត្រសាមញ្ញៗជាច្រើនដែលទើបតែក្លាយខ្លួនជាម្តាយថ្មីៗគ្រប់រូបគួរតែធ្វើតាម ហើយទោះបីជាយ៉ាងណាក៏ដោយ អ្វីដែលពិបាកនោះគឺការឆ្លៀតពេលចេញពីតម្រូវការរបស់កូនរបស់អ្នកដែលទើបនឹងកើត ហើយអ្វីដែលនាងគួរតែសាកល្បងនោះមានដូចជា៖
1. ញ៉ាំអាហារគ្រប់ប្រភេទដូចជា ទឹកដោះគោ, ហ្វ្រូម៉ាស, ទឹកដោះគោយ៉ាអួ, ស៊ុត, គ្រាប់ធញ្ញជាតិ, បន្លែនិងផ្លែឈើស្រស់ៗ, ត្រី និងសាច់គ្មានខ្លាញ់។
2. ញ៉ាំទឹកអោយបានច្រើន។
3. ចៀសវាងការមិនញ៉ាំអាហារ ជាពិសេសនៅពេលព្រឹកតែម្តង។
4. ញ៉ាំអាហារអោយទៀងពេល។
5. ធ្វើយ៉ាងណាអោយអាហារដែលត្រូវញ៉ាំ និងអាហារសម្រន់មានតុល្យភាព, កុំអោយមានស្ករ ឬខ្លាញ់ច្រើនពេក ហើយចំពោះអាហារពេលថ្ងៃត្រង់ និងពេលយប់ត្រូវតែមានជីវជាតិច្រើន។
របៀបធ្វើអោយក្បាលពោះស្រកមកសភាពដើមវិញ
សាច់ដុំក្រពះ និងស្បែកនឹងក្លាយទៅជាតឹង និងយឺតក្នុងពេលមានផ្ទៃពោះ និងសម្រាលកូន ហើយវានឹងត្រូវការមានភាពរស់រវើកផងដែរ។ ការហាត់ប្រាណលើកម្រាលអាងត្រគៀកក្នុងពេលមានផ្ទៃពោះ ជួយអោយសាច់ដុំឆាប់វិលត្រឡប់មកសភាពដើមវិញក្រោយពីសម្រាលកូនរួច។
បត់ជើងធំអោយទៀងទាត់
ពេលខ្លះការបន្ទោរបង់អាចមានភាពមិនទៀងទាត់ក្រោយពីសម្រាលកូនខ្ចីរួច។ ការញ៉ាំអាហារសម្បូរជាតិសរសៃដូចជា គ្រាប់ធញ្ញជាតិនៅពេលព្រឹក, ផ្លែឈើ និងបន្លែ។ល។ ការផឹកទឹកអោយបានច្រើន និងការហាត់ប្រាណថ្នមៗមួយចំនួនដូចជាការដើរ សុទ្ធតែអាចជួយអោយប្រព័ន្ធក្នុងរាងកាយធ្វើការបានយ៉ាងទៀងទាត់។
ការហាត់ប្រាណជាមូលដ្ឋានចំនួនបីដែលជួយអោយស្ត្រីទទួលបានរាងស្អាតមកវិញយ៉ាងសម្បើមក្រោយពីមានផ្ទៃពោះហើយនោះមានដូចជា៖
- The Hundreds: មានន័យថា ចូរដេកផ្ងាជាមួយនឹងដៃដាក់តម្រេតធម្មតា ហើយលើកជើងអោយបានមុំ ៤៥ដឺក្រេ។ ព្យាយាមងើបក្បាល និងស្មាឡើងដោយចង្ការអោយចូលទៅក្នុង។ ចូរចាប់ផ្តើមធ្វើចលនាដៃទាំងពីររបស់អ្នកចុះឡើងៗទៅ។ រាល់សកម្មភាពនីមួយៗត្រូវធ្វើអោយបាន ១០០ដង។
- Side Leg Lift: មានន័យថា ចូរដេកផ្អៀងព្រមទាំដាក់ដាក់ម្ខាងទ្រក្បាល, ជើងទាំងពីរផ្អិបជាប់គ្នារួចលើកឡើងទៅលើ។ ចូរធ្វើយ៉ាងណាអោយភ្លៅ និងកំប៉េះគូថតឹង ព្រមទាំងប្រឹកទប់សាច់ដុំទាំងអស់នោះអោយបាន៥វិនាទី។ ពេលធ្វើមួយចំហៀងចប់ហើយ ចូរមកធ្វើមួយចំហៀងទៀតអោយបាន ១០ដងក្នុងមួយចំហៀង។
- Criss Cross Obliques: មានន័យថា ចូរដេកផ្ងាធម្មតា តែដៃទាំងពីដាក់ពីក្រោមក្បាលដើម្បីអោយកែងដៃបើកបានធំ។ ពន្ទុចជង្គង់មួយឆ្ពោះមកកាន់ដើមទ្រូង ហើយជើងមួយទៀតលាអោយបានធំ។ ព្យាយាមលើកក្បាល និងស្មាទាំងពីរឡើងឆ្ពោះទៅកាន់ជង្គង់ដែលបត់ ហើយយកកែងដៃដែលផ្ទុយពីជង្គង់ដែលបត់នោះប៉ះគ្នា។ បន្ទាប់មកចូរធ្វើជើង និងកែងដៃម្ខាងទៀត។ ចូរធ្វើវាម្តងហើយម្តងទៀតអោយបាន ១០ ទៅ ១៥ដងទាំងសងខាង។
សូមចាំថា អ្នកគួរតែហាត់ប្រាណក្នុងកម្រិតមធ្យមបានក្រោយពីរាងកាយរបស់អ្នកវិលមករកសភាពធម្មតាវិញ (ជាធម្មតាគឺ ២ខែ) ដើម្បីទទួលបានរាងស្អាតក្រោយពីមានផ្ទៃពោះ។ ហើយត្រូវតែទៅពិនិត្យជាមួយគ្រូពេទ្យជានិច្ចមុនពេលអ្នកចាប់ផ្តើមហាត់ប្រាណ៕
