មានកូនក្មេងខ្លះមិនចូលចិត្តរៀនធ្វើអ្វីឡើយ ដោយសារតែឳពុកម្តាយការពារគេជ្រុលពេក ធ្វើឲ្យគេពឹងផ្អែកតែលើអ្នក ហើយមិនចេះធ្វើអ្វីសោះ។ ដូចនេះយើងខ្ញុំនឹងប្រាប់អ្នកពីល្បិចទាំង៣ដែលអាចធ្វើឲ្យកូនចង់រៀនធ្វើគ្រប់បែបយ៉ាង។ តើមានអ្វីខ្លះទៅ?
ឲ្យគេធ្វើដោយផ្ទាល់ដៃ
នៅពេលដែលកូនចង់ធ្វើអ្វីតែម្នាក់ឯង អ្នកមិនត្រូវហាមឃាត់គេទេ អ្នកត្រូវតែឲ្យគេប្រើខួរក្បាលដើម្បីអនុវត្តសកម្មភាពមួយចំនួនដូចជា ៖ ឡើងជណ្តើរដោយខ្លួនឯង លាងដៃដោយខ្លួនឯង កាន់កែវទឹក ឬពាក់ស្រោមជើងដោយខ្លួនឯង ទើបកូនអ្នកមានខួរក្បាលឆ្លាត ហើយចេះគ្រប់បែបយ៉ាង ប៉ុន្តែនៅពេលដែលកូនធ្វើសកម្មភាពទាំងនោះ អ្នកត្រូវតែនៅក្បែរ ដើម្បីចៀសវាងកុំឲ្យគេមានគ្រោះថ្នាក់ផ្សេងៗបាន។
អ្នកអាចឆ្លងតាមការលេងល្បែងដើម្បីឲ្យកូនចង់រៀន
អ្នកអាចប្រើល្បែងផ្សេងៗដែលទាក់ទងនឹងការរៀនសូត្រយកមកលេងជាមួយកូនបាន ដូចជា ក្តារបន្ទះរៀបអក្សរជាដើម ដោយមិនត្រូវបង្ខំឲ្យគេអង្គុយរៀននោះទេ ព្រោះវាអាចធ្វើឲ្យកូនបាត់នូវអារម្មណ៍ចង់រៀនបាន ប៉ុន្តែប្រសិនជាអ្នកលេងល្បែងដែលទាក់ទងនឹងអក្សរ គេនឹងចូលចិត្ត ហើយចង់រៀនដោយខ្លួនឯង។
ត្រូវតែមានចិត្តអំណត់
គ្មានកូនក្មេងណាដែលមិនដែលធ្វើខុសឡើយ ដូចនេះនៅពេលដែលគេធ្វើខុស អ្នកមិនត្រូវស្តីបន្ទោសឲ្យគេ ហើយប្រាប់គេឲ្យធ្វើតាមអ្នកឡើយ ព្រោះវាអាចធ្វើឲ្យកូនមិនចង់រៀន ដោយអ្នកត្រូវតែមានចិត្តអំណត់បង្រៀនគេតាមសម្រួល ទើបកូនអាចរៀនចេះពីកំហុសរបស់ខ្លួន នោះកូនអាចនឹងក្លាយជាមនុស្សដែលពូកែម្នាក់នៅថ្ងៃអនាគត៕