ដង្កូវស៊ីធ្មេញគឺជាជំងឺមួយដែលបំផ្លាញជាលិកាធ្មេញ។ ធ្មេញគឺជាសរីរាង្គមួយ ផ្សំឡើងពីសារធាតុរឹងមួយបែបហៅថាភ្លុកធ្មេញឬដង់ទីន ដែលរុំព័ទ្ធទៅដោយសាច់រឹងងរលោងនៃធ្មេញ ហៅថាកាចា។ ផ្នែកខាងក្នុងរបស់ធ្មេញមានប្រហោងមួយពោរពេញទៅដោយបណ្តូលធ្មេញ ដែលជាជាលិកាមួយមានកោសិកាជាសរសៃ។
ដង្កូវស៊ីធ្មេញគឺជាបាតុភូតមួយដែលធ្វើឱ្យជាលិការឹងរបស់ធ្មេញបាត់បង់អស់ជាតិរ៉ែ អាស្រ័យដោយវត្តមានរបស់អាស៊ីតដែលកើតចេញពីជាតិស្ករនៅក្នុងចំណីអាហារ រួមផ្សំជាមួយនឹងការមានបាក់តេរីខ្លះ ផងដែរ។ តាមពិតទៅ របបហូបចុកចំណីអាហារគឺជាមូលហេតុធំជាងគេនៅក្នុងការធ្វើឱ្យមានដង្កូវស៊ីធ្មេញ។
តទៅនេះគឺជាវិធីមួយចំនួន ដែលអាចជួយឱ្យដើម្បីជៀសវាងកុំឱ្យដង្គុវស៊ីធ្មេញបាន៖
១- ញ៉ាំអាហារដែលសម្បូរទៅដោយជាតិកាល់ស្យូម
គេបានធ្វើការសិក្សាទៅលើមនុស្សចំនួន១៤៥នាក់ ដែលមានវ័យមធ្យម៧១ឆ្នាំ អស់ពេល៥ឆ្នាំ។ គេចែកមនុស្សទាំងអស់នោះជា២ក្រុម រួចគេផ្តល់ជាតិកាល់ស្យូម(១ក្រាមក្នុង១ថ្ងៃ)និងវីតាមីនD ឱ្យក្រុមទី១ ឯក្រុមទី២វិញគេផ្តល់តែម្សៅគ្មានជាតិថ្នាំ។ ពីរឆ្នាំក្រោយមក គេសង្កេតឃើញថាក្រុមទី១មានអត្រាខូចខាតធ្មេញតិចជាងក្រុមទី២ចំនួន៤០%។
២- ញ៉ាំចំណីអាហារដែលសម្បូរទៅដោយវីតាមីនK និងD
វីតាមីនK និងDនេះមានតួនាទីជួយសម្រួលមេតាបូលីសជាតិកាល់ស្យូម ហើយធ្វើឱ្យធ្មេញរឹងឡើង។ ក៏ប៉ុន្តែដើម្បីឱ្យវីតាមីនK មានប្រសិទ្ធភាព វាទាល់តែមានវត្តមានរបស់វីតាមីនD និងជាតិកាល់ស្យូម ផងដែរ។ និយាយឱ្យខ្លីទៅ គឺគេត្រូវញ៉ាំអាហារដែលសម្បូរទៅដោយជាតិរ៉ែ។
៣- កាត់បន្ថយការញ៉ាំគ្លុយស៊ីត និងស្ករ
ការសិក្សាជាច្រើនបានបង្ហាញថាវាមានទំនាក់ទំនងគ្នារវាងការញ៉ាំគ្លុយស៊ីត ជាមួយនឹងជំងឺដង្កូវស៊ី ធ្មេញ។ គេបានរកឃើញថាគ្លុយស៊ីតចូលចិត្តបង្កប់ខ្លួននៅចន្លោះធ្មេញ រួចបង្កទៅជាដង្កូវស៊ីធ្មេញ។ ម្យ៉ាងទៀត ការញ៉ាំចំណីអាហារជាប់ៗគ្នាបង្កើនចំនួនបាក់តេរី ដែលធ្វើឱ្យគ្លុយស៊ីតផ្អូមជូរ ទៅជាអាស៊ីតទៅ។
ចំពោះការញ៉ាំស្ករវិញ វាក៏បង្កឱ្យមានដង្កូវស៊ីធ្មេញដែរ។
៤- ផឹកទឹក
ទឹកសំខាន់ណាស់ចំពោះសព៌ាង្គកាយ។ ទឹកក៏ជួយធ្វើឱ្យចំណែករបស់ចំណីអាហារដែលនៅសេសសល់ក្នុងមាត់ឆាប់រលាយ និងបន្សាបជាតិអាស៊ីត ផងដែរ។ គេត្រូវផឹកទឹកឱ្យបានយ៉ាងតិច៦កែវក្នុង១ថ្ងៃៗ។
៥- ញ៉ាំស៊ុបបន្លែ
ស៊ុបជួយឱ្យរាងកាយរក្សាបាននូវលំនឹងអាហារូបត្ថម្ភ និងកាត់បន្ថយការឡើងធាត់។ ត្រូវឧស្សាហ៍ញ៉ាំស៊ុបបន្លែ ដែលសម្បូរទៅដោយវីតាមីនK និងD ដើម្បីធ្វើឱ្យធ្មេញរឹង ជៀសវាងដង្កូវស៊ីធ្មេញ។
៦- ដុសធ្មេញ២ដងក្នុង១ថ្ងៃ
ដុសធ្មេញសំខាន់ណាស់ក្នុងការជៀសវាងកុំឱ្យមានដង្កូវស៊ីធ្មេញ។ តែត្រូវឧស្សាហ៍ប្តូរច្រាសផង យ៉ាងហោចណាស់៣ខែម្តង ឬនៅពេលណាដែលសរសៃច្រាសលែងត្រង់ស្មើគ្នាហើយ។