តើអ្នកកំពុងតែមានគម្រោង ចង់យកកូនមែនដែរទេ? វាជាការប្រសើរសម្រាប់អ្នក ក្នុងការអាន និង ស្វែងយល់នូវរឿងរ៉ាវទាំងឡាយ ដែលអ្នកត្រូវតែធ្វើការពិចារណា មុនពេលអ្នកសម្រេចចិត្តថា នឹងយក កូន និង ចាប់ផ្តើមនូវជីវិតគ្រួសារមួយដ៏ពិតប្រាកដ។
១. បំលាស់ប្តូរ
ការមានទារកម្នាក់ នៅក្នុងផ្ទះនឹងផ្លាស់ប្តូរនូវ ជីវភាពរស់នៅជាប្រចាំថ្ងៃរបស់អ្នក តែយ៉ាងណាក៏ដោយ បំលាស់ប្តូរនេះ នឹងឆ្ពោះទៅរកភាពល្អប្រសើរ។ វាចាប់ផ្តើមតាំងពីពេលវេលាសម្រាករបស់អ្នក រហូតដល់ ការបរិភោគអាហារ គឺគ្មានអ្វី ដែលអាចនឹងនៅដូចដើមទៀតបាននោះទេ នៅក្នុងជីវិតរបស់អ្នក។ អ្នកក៏ ប្រហែលជាមិនអាច នឹងមានឱកាសតាមដានខ្សែភាពយន្តនៅក្នុងពេលយប់ជ្រៅ ឬ មានដំណើរកំសាន្ត ផ្សងព្រេងទៅកាន់ទីឆ្ងាយណា ទៀតបាននោះដែរ។
២. ថាមពល
ការចិញ្ចឹមបីបាច់ទារកម្នាក់ អាចនឹងត្រូវការទាំងកម្លាំងចិត្ត និង កម្លាំងកាយរបស់អ្នកជាច្រើន។ ទារក ម្នាក់ដែលទើបនឹងកើត គឺហាក់ប្រឈមនឹងពិភពថ្មីខាងក្រៅមួយ ដែលនឹងតម្រូវអោយអ្នកជា ឳពុកម្តាយ ចាំបាច់ត្រូវតែ ចំណាយពេលថែរក្សា និង យកចិត្តទុកដាក់ចំពោះពួកគេ ជាប្រចាំ យ៉ាងហោចណាស់ ក៏អ្នកត្រូវធ្វើវា នៅក្នុងរយៈពេលនៃដំណាក់កាលដំបូងរបស់ពួកគេផងដែរ។ ទំនាក់ទំនងរវាងអ្នក និង ដៃគូ អាចនឹងហាក់ ជាមិនសូវសំខាន់ដូចមុន នៅក្នុងរយៈពេល ពីរបីខែដំបូង ឬ រហូតដល់ប៉ុន្មានឆ្នាំ ក្រោយមក ។ អ្នកនឹងត្រូវ តែផ្តល់សិទ្ធិជាអាទិភាពចំពោះ រាល់តម្រូវការរបស់កូនតូចអ្នក ។
៣. បញ្ហាហិរញ្ញវត្ថុ
ការថែរក្សាទារក អោយរីកធំធាត់នៅក្នុងមជ្ឈដ្ឋានមួយ ដែលមានអនាម័យល្អ និង ផ្តល់ផលល្អចំពោះ សុខភាព អាចនឹងត្រូវអោយអ្នកចំណាយថវិការដ៏ចាំបាច់មួយចំនួន។ វាចាប់គិត តាំងពីខោទឹកនោមរបស់ ពួកគេ រហូតដល់អាហារ និង ម្ស៉ៅទឹកដោះគោ សម្រាប់ពួកគេជាដើម។ រាល់អ្វីៗទាំងអស់ អាចនឹងមាន តម្លៃថ្លៃ ហើយវាថែមទាំងអាច ចាយលើសដែនកំណត់នូវ ថវិការដែលអ្នកមាន ដែលនឹងអាចចំណាយនូវ ប្រាក់ជាច្រើន រាប់រយដុល្លា។ ដូច្នេះ អ្នកត្រូវប្រាកដថា អ្នកអាចរៀបចំខ្លួនឯង ក្នុងការប្រឈមនឹង ការចាយវាយផ្សេងៗ ចំពោះពួកគេ ។
៤. គិតពីអនាគតរបស់ទារកអ្នក
អ្នកត្រូវតែមានគម្រោងក្នុងការសន្សំលុយ ដើម្បីធ្វើអោយប្រាកដថា ពួកគេនឹងមានសុវត្ថិភាពផ្នែក ហិរញ្ញវត្ថុ នៅក្នុងថ្ងៃអនាគត។ ការចំណាយទៅលើការសិក្សានៅ សាលារៀន និង មហាវិទ្យាល័យ គឺនឹង ត្រូវការចំណាយនូវថវិការជាច្រើន។ ដូច្នេះ អ្នកនឹងត្រូវធ្វើការចាប់ផ្តើម សន្សំលុយក្នុងពេលឥលូវនេះ ប្រសិនបើអ្នក ចង់អោយកូនៗរបស់អ្នក ទទួលបាននូវការអប់រំដ៏ល្អប្រសើរមួយ ។
៥. ការគាំទ្រផ្នែកផ្លូវចិត្ត
អ្នកនឹងទទួលបាននូវ អារម្មណ៍ផ្សារភ្ជាប់ទៅនឹងទារកអ្នក បើទោះជាអ្នកចូលចិត្ត ឬ មិនសូវចូលចិត្តវា ក៏ដោយ។ ទារកអ្នកនឹងជឿជាក់លើអ្នកដោយស្មោះស្ម័គ្រ ហើយអ្នកនឹងមានអារម្មណ៍ថា នឹងទទួលខុស ត្រូវគ្រប់បែបយ៉ាង ចំពោះការ ការពារពួកគេ។ អ្នកត្រូវតែអាច ចេះទប់អារម្មណ៍ និង អត់ធ្មត់ ដោយការ គោរពចំពោះទារកតូចរបស់អ្នក ។ អ្នកត្រូវតែចងចាំថា ការ ការពារពួកគេខ្លាំងពេក ឬ ធ្វេសប្រហែស ដោយមិនយកចិត្តទុក ចំពោះពួកគេទាល់តែសោះ គឺសុទ្ធតែអាចបំផ្លាញអនាគតរបស់ពួកគេបាន ដូចគ្នា។
៦. ការផ្សារភ្ជាប់ទំនាក់ទំនង
អ្នកត្រូវតែសម្រេចចិត្តអោយបានច្បាស់លាស់ មុនពេលដែលអ្នកត្រូវយកកូនជាមួយនឹងមនុស្ស ណា ម្នាក់ ចូរប្រាកដថាគេ ជាមនុស្សដែលអ្នកស្រលាញ់។ ដូច្នេះ អ្នកត្រូវច្បាស់ក្នុងចិត្តថា អ្នក និងដៃគូ គឺបាន ត្រៀមខ្លួនរួចរាល់ចំពោះ ការទំនុកបម្រុងកូនតូច ហើយទំនាក់ទំនងរបស់អ្នកទាំងពីរ គឺនឹងមានស្ថេរភាព។ ការមានកូន គឺនឹងមានន័យថា អ្នកទាំងពីរនឹងត្រូវតែ មានភាពចាស់ទុំ និង ចេះមានទំនួលខុសត្រូវចំពោះ គ្នា និង គ្នា។ អ្នកមិនត្រូវផ្តេកផ្តួល ទៅតាមការតបត ឬ ឈ្លោះប្រកែកគ្នាដោយមិន ចេះគិតពិចារណានោះ ទេ។ អ្នកទាំងពីរ នឹងត្រូវតែផ្សារភ្ជាប់ទំនាក់ទំនង និង ស្រលាញ់គ្នាអោយបានកាន់តែរឹងមាំថែមទៀត តាមដែលវានឹង ធ្វើអោយទារកអ្នកធំធាត់ និង រីកលូតលាស់នៅក្នុងមជ្ឈដ្ឋានមួយដែល ប្រកបដោយ ក្តីស្រលាញ់ និង អាចមានសុភមង្គលជានិរន្តរ៍បាន ៕