ក្នុងមួយខែឧសភា ឆ្នាំ២០១៨ យ៉ាងហោចណាស់មានករណីបោះបង់កូនទើបកើតយ៉ាងតិចចំនួនបីករណី ក្នុងនោះមានមួយករណីបានស្លាប់ និងពីរករណីកំពុងសម្រាកព្យាបាលនៅមន្ទីរពេទ្យ ដែលករណីនេះ អ្នកច្បាប់ថាការបោះបង់កូនចោលគឺមានទោសតាមក្រមព្រហ្មទណ្ឌ។
កាលពីថ្ងៃទី១៩ ខែឧសភា ទារកម្នាក់ត្រូវគេប្រទះឃើញនៅក្នុងបន្ទប់ទឹកក្នុងរោងចក្រស្បែងជើងមួយនៅក្នុងខេត្តកំពង់ស្ពឺ។ អត្តសញ្ញាណរបស់ម្តាយទារករូបនេះមិនមានអ្នកណាម្នាក់បានដឹងនោះទេ ដោយគ្រាន់តែដឹងថាជាកម្មារិនីនៅក្នុងរោងចក្រ ហើយបានគេចខ្លួនក្រោយបង្កើតទារកនេះរួច។ ទោះយ៉ាងណាទារកខាងលើត្រូវបានកម្មារិនីម្នាក់ទៀតនិងស្វាមីទទួលធ្វើជាកូនចិញ្ចឹមភ្លាមៗនិងបានយកមកទទួលការព្យាបាលនៅមន្ទីរពេទ្យកុមារជាតិ។ បច្ចុប្បន្នទារករូបនេះកំពុងស្ថិតក្នុងការព្យាបាលនៅឡើយ ដោយថាមានសុខភាពខ្សោយព្រោះកើតមិនគ្រប់ខែ។
សម្រាប់ករណីទីពីរទារកម្នាក់ត្រូវគេប្រទះឃើញថាស្លាប់នៅក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញនារសៀលថ្ងៃទី២៣ ខែឧសភា ឆ្នាំ២០១៨។ ទារកខាងលើត្រូវគេបោះចោលនៅលើគំនរសំរាមតាមដងផ្លូវ ដោយដាក់ចោលក្នុងថង់ប្លាស្ទិកធំមួយ និងមានរុំកន្សែងផង។
ដោយឡែកករណីមួយទៀតបានកើតឡើងនៅយប់ថ្ងៃទី៣១ ខែឧសភា ឆ្នាំ២០១៨ ទារិកាទើបកើតម្នាក់ទៀតត្រូវអ្នករើសអេតចាយប្រទះឃើញនៅលើគំនរសំរាមក្បែរផ្លូវមួយកន្លែងក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។ អ្នករើសអេតចាយខាងលើបានផ្តល់ដំណឹងដល់ប្រជាពលរដ្ឋនៅជិតនោះ ហើយសមត្ថកិច្ចមូលដ្ឋានបានទៅដល់នឹងបញ្ជូនទារិកាខាងលើទៅសង្គ្រោះនៅមន្ទីរពេទ្យកាល់ម៉ែត្រ។
បុគ្គលិកមន្ទីរពេទ្យកាល់ម៉ែត្រម្នាក់បានបញ្ជាក់ប្រាប់ Sabay នៅព្រឹកថានេះទារិកាខាងលើកំពុងសម្រាកព្យាបាលនៅមន្ទីរពេទ្យនៅឡើយ។ បុគ្គលិកដដែលបន្តថា៖ «ខ្ញុំអធ្យាស្រ័យបងដែរ ខ្ញុំប្រាប់បានតែប៉ុណ្ណឹង [ទារិកា]កំពុងនៅមន្ទីរពេទ្យនៅឡើយ»។
ទាក់ទងនឹងការបោះបង់កូនចោលបែបនេះ លោកមេធាវី សុក សំអឿន លើកឡើងថាតាមក្រមព្រហ្មទណ្ឌត្រង់មាត្រា៣២១ បទ បោះបង់អនីតិជនអាយុតិចជាង១៥ឆ្នាំ អ្នកដែលបោះបង់ត្រូវផ្តន្ទាទោសដាក់ពន្ធនាគារពីមួយឆ្នាំដល់ប្រាំឆ្នាំ។ ចំពោះករណីធ្វើឲ្យអនីតិជនរូបនោះគ្រោះថ្នាក់ដល់បាត់បង់ជីវិតលោកថាតាមមាត្រា៣៣៨ ត្រូវផន្ទាទោសជាប់ពន្ធនាគារពីប្រាំពីរឆ្នាំដល់១៥ឆ្នាំ។
ការបោះបង់កូនចោលដូចក្នុងករណីទាំងនេះ លោកមេធាវិថាប្រហែលជាឪពុកម្តាយនៅវ័យក្មេងនិងមិនបានយល់ដឹងពីច្បាប់ដែលត្រូវផ្តន្ទាទោសរហូតជាប់ពន្ធនាគារបែបនេះ។ លោកថាក្នុងករណីស្រ្តីវ័យក្មេងមានផ្ទៃពោះដោយគ្មានការគ្រោងទុក ហើយមិនចង់ទុកកូន គឺថាអាចរកការប្រឹក្សាផ្នែកច្បាប់ដើម្បីរំលូតកូនក្នុងលក្ខខណ្ឌណាមួយដែលច្បាប់អនុញ្ញាត៕
ប្រភព៖ sabay.com.kh