ចេក គឺជាផ្លែឈើម្យ៉ាង ដែលផ្តល់ផលល្អចំពោះសុខភាព សម្រាប់អ្នកដែលបានទទួលទានវា។ មិនត្រឹមតែប៉ុណ្ណោះ សម្បករបស់វា ក៏មានអត្ថប្រយោជន៍ ដែលអ្នកមិននឹកស្មានដល់នោះដែរ។ អត្ថបទខាងក្រោម នឹងបង្ហាញថា តើអ្នកអាចប្រើសម្បកចេកធ្វើអ្វីខ្លះ មុននឹងអ្នកបកវាចោល ?
១. ជួយសម្រាលភាពរមាស់ ដោយសារសត្វល្អិតខាំ ឬទិច
ប្រើសម្បកចេកមកត្រដុស នៅលើកន្លែងដែលមានសត្វល្អិតទិច ឬខាំ នោះវានឹងជួយធ្វើឲ្យស្បែក មិនហើមប៉ោង និងបំបាត់អាការៈរមាស់។
២. បំបាត់ស្នាមជាំ
ដោយសារតែសម្បកចេក មានសមាសធាតុ ជួយឲ្យត្រលប់មករកសភាពដើមវិញ នោះវាអាចជួយរំសាយដុំឈាម និងបំបាត់ស្នាមជាំ បានយ៉ាងមានប្រសិទ្ធិភាព។
៣. ជួយឲ្យធ្មេញស
យកសម្បកចេក មកត្រដុសលើធ្មេញ អោយបាន ២ ទៅ ៣ នាទីជារៀងរាល់ថ្ងៃ នោះវានឹងជួយឲ្យធ្មេញអ្នក សស្អាតជាងមុន តែអ្នកក៏ចាំបាច់ ត្រូវធ្វើការដុសសម្អាតធ្មេញផងដែរ។
៤. បំបាត់មុន
សម្បកចេក អាចជួយបំបាត់នូវអាការៈរមាស់ និងការរលាក ដែលបណ្តាលមកពីមុន។ វាអាចជួយទប់ស្កាត់ ការរីករាលដាលរបស់មុន ដោយអ្នកគ្រាន់តែយកវា មកជូតនៅលើមុខ និងដងខ្លួនជារៀងរាល់យប់។
៥. ជួយសម្រាលអាការៈឈឺក្បាល
អ្នកគ្រាន់តែបកយកសម្បកចេក ចេញប៉ុន្មានបន្ទះ មកបិទលើថ្ងាស ហើយបិទភ្នែកសម្រាកបន្តិច នោះវាក៏អាចជួយឲ្យអាការៈឈឺក្បាលរបស់អ្នក ប្រសើរជាងមុនបានដែរ។
៦. អាចប្រើមកខាត់ស្បែកជើង ឬសម្ភារៈស្បែក ឲ្យភ្លឺរលោងបាន
អ្នកអាចប្រើសម្បកចេក មកខាត់ស្បែកជើង ឬកាបូបស្បែក ឲ្យភ្លឺរលោងបាន ដោយអ្នកគ្រាន់តែយកវា មកជូតនៅលើសម្ភារៈទាំងនោះ ហើយជូតសម្អាត ជាមួយនឹងក្រណាត់ទន់ស្អាតវិញ ជាការស្រេច៕
