របបអាហារផ្តល់សុខភាព
ចូរញ៉ាំរបបអាហារណា ដែលស្ថិតក្នុងរបបអាហារទាំងបួនប្រភេទ ដូចជា ផលិតផលធ្វើពីគ្រាប់ធញ្ញជាតិ ផ្លែឈើ បន្លែ និងសាច់។ ដូច្នេះ ចូរអ្នកចាប់ផ្តើមបង្កើត នូវរបបអាហារផ្តល់សុខភាព និងអាហារសម្រន់ដែលអាចបង្ការ និងបន្ថយការប្រឈមនឹង ជំងឺបេះដូងទាំងនេះទៅ។
កុំជក់បារី
គេបាននិយាយ និងអះអាងថា ការជក់បារី នឹងបង្កើនការប្រឈមនឹង ជំងឺដាច់សរសៃឈាមខួរក្បាល និងជំងឺគាំងបេះដូង។ កាលណាអ្នកផ្តាច់បារីកាន់តែលឿន អ្នកនឹងទទួលបានអត្ថប្រយោជន៍ ចំពោះសុខភាពកាន់តែលឿនវិញដែរ។ តាមការស្រាវជ្រាវក៏បានអះអាងដែរថា អ្នកដែលផ្តាច់បារី គឺអាចបន្ថយការប្រឈមនឹង ជំងឺរបស់ពួកគេបានរហូតដល់ ៤០ ភាគរយក្នុងរយៈពេល ៥ ឆ្នាំ។
មានភាពសកម្ម
ការរស់នៅដោយរក្សាភាពសកម្ម និងការធ្វើសកម្មភាពរាងកាយ គ្រប់រូបភាពទាំងអស់ សុទ្ធតែត្រូវបានគេដឹងថា អាចកាត់បន្ថយការប្រឈមនឹង បញ្ហាសុខភាពធំៗជាង ២៥ មុខឯណោះ រួមទាំងជំងឺដាច់សរសៃឈាមខួរក្បាល និងជំងឺបេះដូងដែរ។ ចូរបន្ថែមនូវការធ្វើសកម្មភាពរាងកាយ ទៅក្នុងទម្លាប់ប្រចាំថ្ងៃរបស់អ្នកទៅ តាមរយៈការដើរជំនួសឲ្យការបើកបរ ការឡើងជណ្តើរជំនួសឲ្យការប្រើជណ្តើរយន្ត និងកាត់បន្ថយពេលវេលានៃការមើលទូរទស្សន៍ជាដើម។ ជាមួយគ្នានេះដែរ ចូរផ្តល់ឲ្យបេះដូងរបស់អ្នក មានសុខភាពល្អទ្វេដង តាមរយៈការហាត់ប្រាណ ពីកម្រិតមធ្យមទៅខ្លាំងក្លា រយៈពេលយ៉ាងហោចណាស់ ១ ទៅ ២ ម៉ោងជារៀងរាល់សប្តាហ៍។
បន្ថយស្ត្រេស
ការដែលមានស្ត្រេសច្រើនពេក គឺជាកត្តាមួយដែលនាំឲ្យមានជំងឺបេះដូង កើនជាតិកូឡេស្តេរ៉ុលខ្ពស់ សម្ពាធឈាមខ្ពស់ ញ៉ាំគ្រឿងស្រវឹងច្រើន និងញ៉ាំអាហារគ្មានផ្តល់សុខភាព។ ចូរកាត់បន្ថយស្ត្រេសរបស់អ្នក តាមរយៈការសម្គាល់ឲ្យដឹងថា អ្វីទៅកំពុងតែធ្វើឲ្យអ្នកថប់បារម្ភ។ ការជជែកលេងជាមួយមិត្តភក្តិ និងក្រុមគ្រួសារ ការហាត់ប្រាណរាល់ថ្ងៃ ការញ៉ាំអាហារផ្តល់ជីវជាតិ និងផ្តល់ពេលវេលាសម្រាប់ខ្លួនឯង ដើម្បីបន្ធូរអារម្មណ៍ ពិតជាអាចបំបាត់ស្ត្រេសបានយ៉ាងល្អ។
គេងឲ្យបានគ្រប់គ្រាន់
ការគេងតិច ឬមិនបានគ្រប់គ្រាន់ សុទ្ធតែអាចធ្វើឲ្យអ្នក មានជំងឺបេះដូងបាន។ ការគេងមិនបានគ្រប់គ្រាន់ ទំនងជាងាយនឹងមានបញ្ហាទម្ងន់ ជំងឺទឹកនោមផ្អែម និងសម្ពាធឈាមឡើងខ្ពស់ ហើយវាសុទ្ធតែជាកត្តា ដែលនាំឲ្យកើតជំងឺបេះដូងបានទាំងអស់។ ការគេងគួរតែធ្វើយ៉ាងណា ឲ្យបានយ៉ាងហោចណាស់ ៧ ម៉ោងក្នុងមួយយប់ ទើបអាចកាត់បន្ថយប្រឈមនឹងជំងឺបេះដូងបាន៕