បើសិនជាអ្នកចង់ថែរក្សាភាពល្អរបស់ខួរក្បាលមែននោះ អ្នកគួរតែធ្វើរឿងមួយចំនួនច្រើនជាងការញ៉ាំអាហារផ្តល់សុខភាព និងថែរក្សាខួរក្បាលទៅទៀត នោះគឺចៀសវាងទម្លាប់ទាំងឡាយណាដែលអាចបង្កគ្រោះថ្នាក់ដល់សរសៃប្រសាទតែម្តង។ ទម្លាប់មួយកើតឡើងគឺត្រូវឆ្លងកាត់បីដំណាក់កាល។
ដំណាក់កាលទីមួយ ឬហៅថា Cue មានន័យថា ជាអ្វីមួយដែលនាំឱ្យមានការចាប់ផ្តើមទម្លាប់។ ឧទាហរណ៍ ទម្លាប់នៃការបើកឡានគឺមានការដាស់ស្មារតីមនុស្សម្នាក់ភ្លាមៗដើម្បីឱ្យទៅយកកូនសោរ។
ដំណាក់កាលទី២ គឺជាការធ្លាប់ ឬហៅថា Routine។ ក្នុងពេលបើកឡានវាតែងតែមានដំណើរការតូចៗជាច្រើនទៀតក្នុងនោះដូចជា ការបញ្ឆេះម៉ាស៊ីន ការផ្លាស់ប្តូរលេខ សម្លឹងទៅមុខឱ្យត្រង់ និងរៀបចំកញ្ចក់ឆ្លុះក្រោយ ជាន់ហ្គែ និងហ្វ្រាំងជាដើម។
ដំណាក់កាលចុងក្រោយ ឬហៅថា Reward គឺជាលទ្ធផលនៃចុងបញ្ចប់របស់ទម្លាប់។ ករណីនៃការបើកឡាន ការទៅដល់គោលដៅដ៏សុវត្ថិភាព និងជួបជុំជាមួយមនុស្សជាទីស្រឡាញ់សម្រាប់ញ៉ាំអាហារពេលយប់ អាចត្រូវបានគេចាត់ទុកថាជា Reward របស់ទម្លាប់នោះ។
ចាប់តាំងពីយើងបានបង្ហាញនូវអ្វីដែលជាទម្លាប់មក វាប្រហែលជាដល់ពេលដែលត្រូវពិភាក្សាទៅលើដើមហេតុមួយចំនួនដែលជះឥទ្ធិពលអវិជ្ជមានដល់ខួរក្បាលយើងហើយដូចជា៖
មិនញ៉ាំអាហារពេលព្រឹក
ដូចអ្នកធ្លាប់ដឹងរួចមកហើយថា អាហារពេលព្រឹកត្រូវបានគេចាត់ទុកថាជាពេលវេលាអាហារដ៏ល្អបំផុតសម្រាប់ការចាប់ផ្តើមថ្ងៃថ្មី ព្រោះវានឹងផ្តល់ជាជីវជាតិដំបូងគេសម្រាប់បម្រើសេចក្តីត្រូវការរបស់រាងកាយ។ ការញ៉ាំអាហារពេលព្រឹកក៏អាចចៀសផុតពីទម្លាប់នៃការទៅធ្វើការយឺត ឬសាលារៀនយឺតបានដែរ។
ខណៈពេលដែលទៅដល់កន្លែងទាន់ពេលវេលា វាអាចនឹងជួយអ្នកទទួលបានការចាប់អារម្មណ៍ដំបូងគេយ៉ាងល្អមួយ។ ផ្ទុយទៅវិញ បើសិនជាមិនបានញ៉ាំអាហារពេលព្រឹកទេ វានឹងធ្វើឱ្យអ្នកដូចស្ថិតក្នុងផ្នូរខ្មោចអញ្ជឹង ព្រោះតែមិនបានញ៉ាំអីសោះ ដូច្នេះអ្នកក៏ងាយនឹងមានបញ្ហាដល់សុខភាពច្រើនដែរដូចជា លើសសម្ពាធឈាម ធាត់ជ្រុល និងកើនឡើងជាតិខ្លាញ់ដែលមិនផ្តល់សុខភាពដល់រាងកាយទៀត។
ក្រៅពីនេះ ខួរក្បាលប្រៀបដូចជាមជ្ឈមណ្ឌលបញ្ជាកណ្តាលសម្រាប់ការងារប្រចាំថ្ងៃរបស់អ្នកអញ្ជឹង ហើយវាប្រហែលជាមិនអាចធ្វើការល្អឡើងនៅពេលដែលក្នុងពោះគ្មានអ្វីសោះនោះ ជាពិសេសព្រឹកឡើងតែម្តង។
ញ៉ាំអាហារច្រើនជ្រុល និងញ៉ាំផ្អែមពេក
មនុស្សយើងគឺមានតម្រូវការជីវជាតិប្រែប្រួលទៅតាមអាយុ កម្ពស់ និងភេទ ប៉ុន្តែអ្នកមានដឹងទេថា របៀបរស់នៅ និងការងាររបស់មនុស្សម្នាក់ក៏ជាកត្តាមួយដែលត្រូវពិចារណាថាពេលណាដែលត្រូវញ៉ាំច្រើន និងតិចដែរទេ? នេះដោយសារតែអ្នកញ៉ាំច្រើនជាងតម្រូវការរបស់រាងកាយដែលបានចាយថាមពល វានឹងធ្វើឱ្យខ្លាញ់កើនឡើងច្រើន និងជាហេតុនាំឱ្យធាត់ជ្រុល ឬធាត់លើសទម្ងន់ធម្មតា។
ក្រៅពីនេះ ខ្លាញ់ដែលមិនបានរំលាយក្នុងរាងកាយដោយសារតែញ៉ាំច្រើនពេកក៏នឹងបង្កើនការប្រឈមជំងឺលើសជាតិកូឡេស្តេរ៉ុល និងស្ករក្នុងខ្លួនដែរ។ ជំងឺទាក់ទងនឹងខួរក្បាលដែលពេញនិយម ហើយកើតលើអ្នកហាត់ប្រាណហើយញ៉ាំច្រើននោះគឺជំងឺដាច់សរសៃឈាមខួរក្បាលតែម្តង។
ជក់បារី
ប្រហែលជាអ្នកធ្លាប់ដឹងហើយថា ការជក់បារីគឺជារឿងមួយដែលអាចនាំឱ្យញៀនបាន។ នៅពេលវាក្លាយទៅជាទម្លាប់ហើយនោះ វាក៏បង្កើតជាចង្វាក់នៃហេតុការណ៍អាក្រក់ៗដែលនាំឱ្យគ្រោះថ្នាក់ដល់ជីវិតបាន នោះគឺជំងឺទាក់ទងនឹងការជក់បារីតែម្តង។ ប៉ុន្តែការគ្រោះថ្នាក់ទាំងនេះអាចបង្ការបានបើសិនជាអ្នកដឹងអំពីឥទ្ធិពលរបស់ជំងឺនេះ និងផ្តាច់វាបាន។
ក្រៅពីឥទ្ធិពលអាក្រក់របស់បារីចំពោះសួត ការជក់បារី និងការពុលផ្សែងរបស់វាអាចប៉ះពាល់ដល់ខួរក្បាលដែលជាសរីរាង្គត្រូវការអុកស៊ីសែនខ្លាំងជាងគេបំផុតដែរ។ ចាប់តាំងពីការស្រូបផ្សែងបារី និងការពុលផ្សែងរបស់វាកាត់បន្ថយការផ្គត់ផ្គង់អុកស៊ីសែនក្នុងរាងកាយមក ការជក់បារីត្រូវបានគេយល់ថាជាទម្លាប់មួយដែលអាចបំផ្លាញខួរក្បាលបាន។
ធ្វើការងារច្រើនពេក
ការស្រាវជ្រាវបានរកឃើញថា អត្រាប្រជាជនដែលការធ្វើការងារ ជាពិសេសអ្នកមានបំណងចង់ក្លាយជាអ្នកមាន និងជោគជ័យចំពោះមុខរបររបស់ខ្លួន គឺងាយនឹងជួបបញ្ហាស្វិតខួរក្បាលណាព្រោះតែពួកគេត្រូវបំពេញការងារច្រើនពេក។ យោងទៅតាមការសិក្សាបានឱ្យដឹងថា វានឹងល្អវិញសម្រាប់អ្នកដែលធ្វើការងារប្រកាន់ខ្ជាប់ទៅតាមកាលវិភាគ និងរៀបចំវាក្នុងមធ្យោបាយមួយដែលមិនរំខានដល់ខួរក្បាលត្រូវការពេលសម្រាក៕