ការចងដៃស្បូន គឺជាវិធីសាស្ត្របែបវិជ្ជសាស្ត្រមួយប្រភេទ សម្រាប់ពន្យារកំណើតមួយជីវិត។ ការចងដៃស្បូន មានន័យថា ជាវិធីដើម្បីបង្ការ កុំឲ្យមេជីវិតញី ធ្វើដំណើរចូលទៅក្នុងស្បូន ដើម្បីបង្កកំណើត ហើយក៏មិនឲ្យមេជីវិតឈ្មោល ធ្វើដំណើរទៅកាន់ដៃស្បូន ដើម្បីជួបមេជីវិតញីបានដែរ។ ការចងដៃស្បូន មិនប៉ះពាល់ដល់ការមករដូវ របស់មនុស្សស្រីឡើយ។
ការចងដៃស្បូន អាចធ្វើបានគ្រប់ពេល ទាំងក្រោយសម្រាលកូន ឬប្រើរួមគ្នា ជាមួយដំណើរការនៃការវះកាត់នៅពោះ ដូចជា ការសម្រាលកូនដោយវះកាត់ជាដើម។ ការចងដៃស្បូន គឺជាវិធីសាស្ត្រវះកាត់ ដើម្បីបញ្ឈប់ការមានផ្ទៃពោះ ហើយក៏អាចជួយកាត់បន្ថយ ការប្រឈមនឹង ជំងឺមហារីកក្រពេញអូវ៉ែបានដែរ។
ការចងដៃស្បូនពន្យារកំណើត គឺជាការវះកាត់នៅលើពោះ ដោយការប្រើថ្នាំស្ពឹក ដូច្នេះ ការប្រឈមមុខរបស់វា អាចនឹងកើតមានដែរ ដូចជា ៖
• ខូចខាតដល់ពោះវៀន ប្លោកនោម ឬសរសៃឈាមធំៗ
• មានប្រតិកម្មនឹងថ្នាំស្ពឹក
• របួសជាមិនបានល្អ ឬមានការបង្ករោគ
• ឈឺចាប់ក្នុងអាងត្រគាក ឬក្នុងពោះរយៈពេលយូរ។
អ្នកប្រហែលជាប្រឈមកាន់តែខ្លាំង នឹងផលវិបាកនៃការចងដៃស្បូន បើសិនជា ៖
• អ្នកធ្លាប់វះកាត់ក្នុងអាងត្រគាក ឬក្នុងពោះពីមុនមក
• អ្នកធ្លាប់មានប្រវត្តិធាត់ជ្រុល ឬជំងឺទឹកនោមផ្អែម។
ការចងដៃស្បូន នឹងមិនអាចការពារអ្នក ពីជំងឺកាមរោគបានទេ។ ក្នុងរយៈពេលមួយឆ្នាំដំបូង ក្រោយពីចងដៃស្បូនរួច គេឃើញថា ស្ត្រីមិនដល់ម្នាក់ផង ក្នុងចំណោមស្ត្រី ១០០ នាក់ នឹងមានផ្ទៃពោះ ក្រោយពីចងដៃស្បូនរួច។ កាលណាអ្នកចងដៃស្បូន នៅអាយុកាន់តែក្មេង នោះឱកាសនៃការមិនអាចមានកូនរហូតនោះ ក៏បរាជ័យកាន់តែច្រើនដែរ។ បើសិនជាអ្នក ពិតជាមានផ្ទៃពោះមែន ក្រោយពីចងដៃស្បូនមែននោះ ឱកាសច្រើនណាស់ដែលថា ការមានផ្ទៃពោះនោះ គឺកូននៅក្រៅស្បូន៕