អ្នកវិទ្យាសាស្ត្របានរកឃើញថា ប្រេងដូង គឺបានជួយជម្រុញដល់ប្រព័ន្ធភាពសុំាំ ប្រឆាំងនឹងការបង្ករោគ និងជួយទ្រទ្រង់ ដល់សុខភាពរបស់សរីរៈ នៅក្នុងរាងកាយមនុស្ស។ អត្ថប្រយោជន៍ទាំងនេះ ក៏បានជួយផងដែរ ដល់សុខភាពមាត់ធ្មេញ។ ការប្រើប្រេងដូង មកដុសសម្អាតមាត់របស់អ្នកជារៀងរាល់ថ្ងៃ ក៏ជួយបានផងដែរ ក្នុងការកម្ចាត់ចេញ នូវសារធាតុពុលចេញពីមាត់ និងរាងកាយ។ ការប្រើប្រាស់វាជាប្រចាំថ្ងៃ នឹងជួយធ្វើឲ្យមាត់ធ្មេញ និងអញ្ចាញមានសុខភាពល្អ ខ្យល់ដង្ហើមស្រស់ថ្លា និងកាត់បន្ថយផលរំខាននៃជាតិពុល ដែលមាននៅក្នុងផលិតផលថ្នាំដុសធ្មេញ។
អ្នកអាចបង្កើតថ្នាំដុសធ្មេញ ផលិតចេញពីប្រេងដូងបានដោយខ្លួនឯង ដោយវាមានតម្លៃថោក និងងាយស្រួលធ្វើ។ វាត្រូវការតែគ្រឿងផ្សំតែប៉ុន្មានមុខប៉ុណ្ណោះ នោះអ្នកនឹងអាចប្រើវាបានច្រើនដង និងអាចចែករំលែក ជាមួយនឹងសមាជិកក្នុងក្រុមគ្រួសាររបស់អ្នកបាន។
វិធីធ្វើថ្នាំដុសធ្មេញ ផ្សំពីប្រេងដូង
• ក្រឡស្អាត ដែលមានគម្របបិទជិតល្អ។
• លាយប្រេងដូង ១ ផ្នែកជាមួយនឹង ម្សៅ Baking Soda ១ ផ្នែក ដែលអ្នកអាចរកទិញពួកវាបាននៅតាមផ្សារទំនើប។
• បន្ថែមទឹកក្រូចឃ្វិច ៣ ទៅ ៥ តំណក់ ជីអង្កាម ឬប្រេងសម្រាប់ដាក់ក្នុងអាហារដទៃទៀត ដើម្បីបង្កើតរសជាតិ។
• ទុកល្បាយនេះឲ្យត្រជាក់ ហើយច្រកវាចូលក្នុងក្រឡស្អាត ដែលបានត្រៀមទុក។
អ្នកអាចប្រើវាដាក់នៅលើច្រាស់ដុសធ្មេញ ហើយដុសសម្អាតធ្មេញរបស់អ្នក ដូចថ្នាំដុសធ្មេញធម្មតា។ ប្រេងដូងតែមួយមុខ ក៏អាចជួយបំបាត់ក្លិនមាត់បានផងដែរ។ ថ្នាំដុសធ្មេញផ្សំពីប្រេងដូង ដែលអ្នកបានធ្វើដោយខ្លួនឯងនេះ គឺអាចជួយសម្អាត និងជួយឲ្យធ្មេញសស្អាតល្អ ដែលមានម្សៅ Baking Soda ក៏ជាភ្នាក់ងារ ជួយកាត់សម្អាតជាតិកំបោរ តាមអញ្ចាញធ្មេញបានដែរ។ វានឹងជួយប្រឆាំងនឹងជំងឺអញ្ចាញធ្មេញ និងធ្មេញពុក។ វាគឺជាប្រភេទថ្នាំដុសធ្មេញធម្មជាតិ ដែលគ្មានផ្ទុកសារធាតុគីមី ប៉ះពាល់សុខភាពឡើយ មិនត្រឹមតែប៉ុណ្ណោះ គឺវាមានភាពងាយស្រួលក្នុងការធ្វើ និងមានតម្លៃសមរម្យ។ ហេតុអ្វីអ្នកមិនសាកល្បងធ្វើវាសាកមើល ?
