បើសិនជាអ្នកធ្លាប់មានអារម្មណ៍ថា អស់កម្លាំងជាងធម្មតា វាប្រហែលជាដល់ពេល ដែលត្រូវបង្កើនកម្រិតថាមពលវិញហើយ។ អ្នកអាចធ្វើវាបាន តាមរបៀបធម្មជាតិ ពីការផ្លាស់ប្តូររបបអាហារ របៀបរស់នៅ ញ៉ាំថ្នាំបំប៉ន ហាត់យូហ្គា និងចៀសវាងរឿងទាំងឡាយណា ដែលអាចឆាប់ឱ្យអ្នកអស់កម្លាំង។ ខាងក្រោមនេះ យើងខ្ញុំនឹងបង្ហាញអំពីរបៀប នៃការញ៉ាំអាហារ តាមបែបធម្មជាតិ ដើម្បីឱ្យឆាប់មានកម្លាំង។
ញ៉ាំអាហារពេលព្រឹក រាល់ថ្ងៃ
ការញ៉ាំអាហារពេលព្រឹក មានន័យថា ជាការប៉ះប៉ូវនូវអ្វី ដែលបាត់បង់ពេលសម្រាក។ នៅពេលភ្ញាក់ពីគេង រាងកាយត្រូវការថាមពលដើម្បីធ្វើការ និងសកម្មភាពជាទម្លាប់។ ពិតណាស់ ចូរព្យាយាមកុំបង្អត់អាហារអី ព្រោះវាអាចនឹងធ្វើឱ្យរាងកាយចុះខ្សោយបាន។ ទោះបីជាយ៉ាងណាក៏ដោយ មិនត្រូវញ៉ាំច្រើនពេកទេ ព្រោះវាអាចនឹងបន្ថយថាមពលវិញ។
ញ៉ាំបន្លែ និងផ្លែឈើឱ្យបានច្រើន
បន្លែ និងផ្លែឈើ សម្បូរទៅដោយប្រភពថាមពលណាស់។ ជាតិស្ករពីធម្មជាតិ ដែលមានក្នុងបន្លែ និងផ្លែឈើ អាចបង្កើនថាមពលបានយ៉ាងល្អ ជាងការញ៉ាំជាតិស្ករពីនំខេក ឬភេសជ្ជៈប៉ូវកម្លាំងទៅទៀត។ នេះដោយសារតែជាតិស្ករពីធម្មជាតិ ងាយស្រួលឱ្យរាងកាយ បឺតស្រូបទៅប្រើប្រាស់។ ផ្លែឈើដែលជួយបង្កើនថាមពល មានដូចជា ចេក ក្រូច ទំពាំងបាយជូរ ផ្លែប៉ោម ល្ហុង ក្រូចឆ្មារ ផ្លែឈើរី ឪឡឹក និងបឺរីពណ៌ខៀវ។ បន្លែដែលជួយបង្កើនថាមពល មានដូចជា ការ៉ុត ប្រូខូលី ដំឡូងផ្អែម ស្ពៃស្ពីណាច និងត្រសក់។
អាហារសម្រន់
សណ្តែកដី មានប្រូតេអ៊ីនម្យ៉ាង ដែលជាប្រភពដ៏ល្អមួយនៃថាមពល នោះគឺ Coenzyme Q10 សម្រាប់ជួយជំរុញដល់កោសិកាផលិតថាមពល។ សណ្តែកដី ក៏ជាប្រភពនៃអាស៊ីតខ្លាញ់អូមេហ្គាបីដែរ ក្នុងការបង្កើនថាមពលរាងកាយ។ ក្រៅពីនេះ ក៏មានអាហារសម្រន់ផ្សេងៗទៀត ដែលជួយផ្តល់ថាមពលដែរដូចជា ៖
• ផ្លែអាល់ម៉ុន
• គ្រាប់ស្វាយចាន់ទី។
ញ៉ាំខ្លាញ់ដែលផ្តល់សុខភាព
រាងកាយអ្នកប្រើប្រាស់ខ្លាញ់ ជាប្រភពនៃថាមពលដែរ។ ទោះបីជាយ៉ាងណាក៏ដោយ មានខ្លាញ់តែប៉ុន្មានប្រភេទប៉ុណ្ណោះ ដែលល្អក្នុងការបង្កើនថាមពល។ ខ្លាញ់ដែលបានមកពីអាហារមិនល្អ គួរតែចៀសវាង ប៉ុន្តែ គួរតែញ៉ាំអាហារ ដូចខាងក្រោមនេះវិញ ៖
• អាហារមានជាតិខ្លាញ់អូមេហ្គាបីដូចជា ត្រី សណ្តែកដី និងប្រេងខានណូឡា
• ខ្លាញ់ប្រភេទ Monounsaturated ដូចជាប្រេងអូលីវ ផ្លែប័រ ផ្លែអាល់ម៉ុន និងប័រសណ្តែក
• ខ្លាញ់ប្រភេទ Polyunsaturated ដូចជាប្រេងសណ្តែកសៀង ទឹកសណ្តែកសៀង និងតៅហ៊ូ។
រក្សាជាតិទឹក ក្នុងខ្លួនឱ្យបានគ្រប់គ្រាន់
ការញ៉ាំទឹកបានតិច នឹងធ្វើឱ្យខ្សោះជាតិទឹក ហើយវាក៏ជាហេតុផលនាំឱ្យអស់កម្លាំងដែរ។ ដើម្បីបង្កើនថាមពលរាងកាយ យកល្អ គួរតែធ្វើយ៉ាងណា បង្គ្រប់ជាតិទឹកក្នុងខ្លួនឱ្យបានគ្រប់គ្រាន់។ វិធីដ៏ល្អបំផុតនោះ គឺការញ៉ាំទឹកច្រើនជាងរៀងរាល់ថ្ងៃ។ ចូរញ៉ាំទឹកឱ្យបានយ៉ាងហោចណាស់ ពីមួយលីត្រកន្លះទៅពីរលីត្រជារៀងរាល់ថ្ងៃ។ នៅពេលហាត់ប្រាណ ចូរក្រេបទឹកញ៉ាំឱ្យបានរាល់ ១៥ នាទីម្តង ដើម្បីជំនួសនូវជាតិទឹក ដែលអ្នកបាត់បង់ ពីការហាត់ប្រាណ។ ចូរបង្កើនចំនួននៃការញ៉ាំទឹក នៅពេលអាកាសធាតុកាន់តែក្តៅ៕
