មានបញ្ហាភ្នែកជាច្រើន ដែលឧស្សាហ៍កើតនៅលើមនុស្សនៅពេលដែលយើងមានអាយុកាន់តែចាស់។
- ជំងឺភ្នែកស្ងួត ៖ ជំងឺនេះកើតឡើងនៅពេលដែលក្រពេញបង្ហូរទឹកភ្នែកមិនអាចផលិតទឹកភ្នែកអោយបានគ្រប់គ្រាន់ ឬផលិតទឹកភ្នែកបានតិចពេក។ ភ្នែកស្ងួតអាចធ្វើអោយមិនស្រួលនៅក្នុងភ្នែកដូចជា បណ្តាលអោយរមាស់ ក្រហាយ ឬករណីកម្រខ្លះ វាអាចធ្វើអោយមើលមិនឃើញ។
- ជំងឺហៀរទឹកភ្នែក ៖ បញ្ហានេះអាចមកពីភ្នែកអ្នកមានប្រតិកម្មជាមួយនឹងពន្លឺ ខ្យល់ ឬការផ្លាស់ប្តូរសីតុណ្ហភាព។ ការការពារភ្នែករបស់អ្នកដោយបាំងភ្នែក ឬពាក់វ៉ែនតាពេលខ្លះអាចដោះស្រាយបញ្ហានេះបាន។ ហៀរទឹកភ្នែកក៏អាចមានន័យថា អ្នកមានបញ្ហាដ៏ធ្ងន់ធ្ងរជាច្រើនទៀតដូចជា ការឆ្លងមេរោគភ្នែក ឬស្ទះបំពង់បង្ហូរទឹកភ្នែក។
- ជំងឺភ្នែកឡើងបាយ ៖ វាគឺជាការឡើងចំណុចសៗល្អក់នៅក្នុងកែវភ្នែក។ នៅពេលដែលជំងឺភ្នែកឡើងបាយកើតមានឡើង ពន្លឺមិនអាចឆ្លងកាត់កញ្ចក់ភ្នែកបានស្រួលដូចមុននោះទេ ដែលជាហេតុធ្វើអោយអ្នកមើលមិនសូវច្បាស់។ ជំងឺភ្នែកឡើងបាយគឺគ្មានការឈឺចាប់ មិនក្រហមភ្នែក ឬមានទឹកនៅក្នុងភ្នែកនោះទេ។ ប្រសិនបើវានៅតូច នោះវាមិនប៉ះពាល់ដល់ការមើលនោះទេ ប៉ុន្តែ ប្រសិនបើវាក្លាយទៅជាធំ ឬក្រាស់វិញ ជាធម្មតាគ្រូពេទ្យនឹងសុំធ្វើការវះកាត់យកវាចេញ។
- ជំងឺរលាកកញ្ចក់ភ្នែក ៖ វាជាការរលាកទៅលើជាលិកាខាងក្នុងត្របកភ្នែក និងរលាកកញ្ចក់ភ្នែក។ ពេលខ្លះ វាត្រូវបានគេហៅថា “ជំងឺភ្នែកពណ៌ផ្កាឈូក” ឬ “ជំងឺភ្នែកក្រហម”។ វាអាចបណ្តាលអោយឡើងក្រហម រមាស់ ក្រហាយ ហូរទឹកភ្នែក មានអាចម៍ភ្នែក ឬមានអារម្មណ៍ថាមានរបស់អ្វីមួយនៅក្នុងភ្នែក។ ជំងឺរលាកកញ្ចក់ភ្នែកកើតឡើងចំពោះមនុស្សគ្រប់វ័យ ហើយវាអាចបង្កឡើងដោយការឆ្លងមេរោគ ការប៉ះពាល់ទៅនឹងសារធាតុគីមី ឬអាលែកស៊ី៕
