មិនមានភស្តុតាងគ្រប់គ្រាន់ដើម្បីបង្ហាញថា ការញ៉ាំជាតិខ្លាញ់ច្រើនពេកនឹងបង្កើនហានិភ័យនៃជំងឺមហារីកនោះទេ។ របាយការណ៍ដែលធ្វើឡើងដោយមូលនិធិស្រាវជ្រាវជំងឺមហារីកសកលឆ្នាំ ២០០៧ បានរកឃើញភស្តុតាងនៃទំនាក់ទំនងវាងការបរិភោគអាហារដែលមានជាតិខ្លាញ់សត្វ និងជំងឺមហារីកពោះវៀន តែភស្តុតាងននោះនៅមានកំណត់។
ដូចគ្នានេះផងដែរ មានភស្តុតាងខ្លះបានបង្ហាញពីទំនាក់ទំនងរវាងការទទួលទានជាតិខ្លាញ់ និងជំងឺមហារីកសុដន់ចំពោះស្ត្រីដែលបានអស់រដូវ ប៉ុន្តែ ភស្តុតាងនេះក៏នៅតែមានកំណត់ផងដែរ។
ទោះជាយ៉ាងណា ការបរិភោគអាហារដែលមានខ្លាញ់ខ្ពស់ទៀងទាត់ អាចធ្វើអោយប៉ះពាល់ដល់សុខភាពរបស់លោកអ្នក។ ឧទាហរណ៍ ប្រសិនបើលោកអ្នកបរិភោគអាហារដែលមានជាតិខ្លាញ់ខ្ពស់ និងមានកាឡូរីច្រើន នោះលោកអ្នកអាចនឹងធាត់លើសទម្ងន់ជាមិនខានឡើយ។
ការលើសទម្ងន់ ឬធាត់ខ្លាំងអាចបង្កើនហានិភ័យនៃជំងឺមហារីកមួយចំនួនដែលក្នុងនោះមានដូចជា ៖
• ជំងឺមហារីកពោះវៀន
• ជំងឺមហារីកលំពែង
• ជំងឺមហារីកបំពង់អាហារ
• ជំងឺមហារីកសុដន់ ប្រសិនបើលោកអ្នកជាស្ត្រីដែលអស់រដូវ
• ជំងឺមហារីកស្បូន
• ជំងឺមហារីកតម្រងនោម។
ការបរិភោគរបបអាហារដែលមានសុខភាពល្អជាមួយកម្រិតខ្លាញ់ទាប អាចជួយលោកអ្នករក្សាបាននូវទម្ងន់ដែលមានសុខភាពល្អ ហើយមហារីកក៏អាចនៅឆ្ងាយពីលោកអ្នកផងដែរ៕