អាការៈរមាស់ស្បែក គឺជារឿងដែលមនុស្សភាគច្រើនពិបាកក្នុងការទ្រាំ និងគ្មានអ្វីដែលអាចជួយបានច្រើន ក្រៅពីការអេះនៅកន្លែងដែលរមាស់នោះទេ។ ការរមាស់ ពិតជាផ្នែកមួយនៃយន្តការ ការពាររបស់រាងកាយប្រឆាំងនឹងការរលាក ប៉ុន្តែ ប្រសិនបើអ្នកមានទំលាប់នៃការអេះ វាអាច បង្កអោយមានភាពមិនស្រួលកាន់តែច្រើន។
ខាងក្រោមនេះ គឺជាវិធីសាស្ត្រមួយចំនួន ដែលអ្នកអាចសាកល្បងប្រើប្រាស់វត្ថុធាតុដែលមាននៅក្នុងផ្ទះបាយរបស់អ្នក ដើម្បីបំបាត់អាការៈរមាស់លើស្បែកបាន ៖
ប្រេងដូង ៖ ប្រេងដូង ល្អសម្រាប់ការរមាស់ស្បែក។ មិនថាដោយសារតែស្បែកស្ងួត ឬមានសត្វល្អិតខាំនោះទេ ប្រេងដូងអាចធ្វើការបានយ៉ាងអស្ចារ្យ។ វិធីដ៏ល្អបំផុតក្នុងការប្រើវា គឺជូតប្រេងដូងតិចតួចដោយផ្ទាល់ទៅលើកន្លែងដែលរមាស់។ ប្រសិនបើអ្នកមានការរមាស់ពេញខ្លួន ជាពិសេសក្នុងអំឡុងពេលរដូវរងារ សូមត្រាំខ្លួននៅក្នុងអាងទឹកក្តៅឧណ្ឌៗបន្ទាប់មកគ្រាន់តែជូតខ្លួនអោយស្ងួត ហើយលាបប្រេងពេញទាំងខ្លួន។ ប្រេងដូង មានប្រសិទ្ធិភាពយ៉ាងខ្លាំងនៅក្នុងជំងឺទូទៅមួយចំនួនដូចជា ដំបៅក្នុងមាត់ផងដែរ។
ក្រូចឆ្មារ ៖ ក្រូច សម្បូរទៅដោយវីតាមីន C ហើយគឺជាឱសថដ៏ល្អបំផុតសម្រាប់ការរមាស់ស្បែក។ ប្រេងដែលមាននៅលើសំបកក្រូចអាចធ្វើអោយអ្នកមានអារម្មណ៍ស្ពឹក ហើយក៏ល្អផងដែរក្នុងការប្រឆាំងនឹងការរលាក។ គ្រាន់តែកាត់ក្រូចជាពីរ ច្របាច់យកទឹកចេញតិចតួច រួចលាបនៅលើកន្លែងរមាស់នោះ ហើយទុកអោយស្ងួត នោះអ្នកនឹងឃើញថា បានធូរស្រាលភ្លាម។
ប្រទាលកន្ទុយក្រពើ ៖ ជាមួយនឹងការផ្តល់សំណើម ប្រទាលកន្ទុយក្រពើគឺជាផ្នែកមួយនៃភ្នាក់ងារធ្វើអោយស្បែករលោងយ៉ាងមានប្រសិទ្ធិភាពបំផុត។ ពេលដែលអ្នកលាបវានៅលើកន្លែងរមាស់ វាអាចជួយកាត់បន្ថយការរលាកស្បែកនៅក្នុងកន្លែងនោះ និងបំបាត់ការមាស់បានរហ័ស។ គ្រាន់តែបេះស្លឹកពីដើម កាត់វាតាមបណ្តោយដោយប្រើកាំបិត រួចប្រើស្លាបព្រាកោសយកសារធាតុអន្ធឹលៗនៅខាងក្នុង រួចយកទៅលាបលើកន្លែងរមាស់ និងទុកវាលើនោះពីរបីនាទីជាការស្រេច៕