ការធ្វើលំហាត់ប្រាណជាទៀងទាត់អាចជួយគ្រប់គ្រង ឬការពារបញ្ហាសុខភាពចំពោះមនុស្សវ័យចំណាស់។
ជំងឺបេះដូង កម្រិតកូឡេស្តេរ៉ុលខ្ពស់ ជំងឺទឹកនោមផ្អែម ជំងឺពុកឆ្អឹង ការខ្សោយសាច់ដុំ ជំងឺមហារីកមួយចំនួន ជំងឺធ្លាក់ទឹកចិត្ត និងជំងឺដាច់សរសៃឈាមក្នុងខួរក្បាល គឺជាបញ្ហាសុខភាពមួយចំនួនដែលត្រូវបានគេជួបទូទៅ ហើយដែលការធ្វើលំហាត់ប្រាណប្រចាំថ្ងៃ អាចផ្តល់ប្រយោជន៍ជាច្រើនដល់អ្នកជំងឺ។
អត្ថប្រយោជន៍នៃសុខភាពដទៃទៀត ចំពោះមនុស្សវ័យចំណាស់រួមមាន ៖
- រក្សាទម្ងន់ និងដុតកាឡូរីបន្ថែម
- ផ្តល់ភាពប្រសើរឡើងនូវសមាមាត្រនៃកូឡេស្តេរ៉ុលអាក្រក់ និងកូឡេស្តេរ៉ុលល្អ
- បង្កើតភាពរឹងមាំនៃរាងកាយ
- សុខភាពបេះដូង សួត និងប្រព័ន្ធសរសៃឈាមបានប្រសើរឡើង
- ផ្តល់ភាពប្រសើរឡើងដល់ការចែកចាយអុកស៊ីសែន និងសារជាតិចិញ្ចឹមទៅកាន់ជាលិកា
- រក្សាសុខភាពឆ្អឹង និងសាច់ដុំ
- បន្ថយហានិភ័យនៃការដួល និងជំងឺរលាកសន្លាក់
- មានអារម្មណ៍ល្អ
- ផ្តល់ភាពប្រសើរឡើងដល់គុណភាព និងរយៈពេលនៃការគេង។
លំហាត់ប្រាណជាទៀងទាត់ ៣ ទៅ ៥ ដងក្នុងមួយសប្តាហ៍ យ៉ាងហោចណាស់ ៣០ នាទី គឺជាអ្វីដែលគ្រូពេទ្យបានណែនាំចំពោះមនុស្សចាស់។ លំហាត់ប្រាណដ៏មានប្រសិទ្ធភាព គឺជាលំហាត់ប្រាណដែលនឹងបង្កើនចង្វាក់បេះដូងបានគ្រប់គ្រាន់ប្រហែល ៧៥% នៃចង្វាក់បេះដូងអតិបរមា។
ការដើរ ការហែលទឹក និងការធ្វើលំហាត់ប្រាណដោយប្រើម៉ាស៊ីន ជាទូទៅ គឺផ្តល់នូវសុវត្ថិភាព និងអាចជួយអោយអ្នកអោយដល់នៅគោលដៅ។ លំហាត់ប្រាណដែលផ្តល់នូវលំនឹង លំហាត់ប្រាណដែលមានភាពបត់បែន និងលំហាត់ប្រាណ ដូចជាការលើកដុំដែកជាដើមក៏អាចផ្តល់ប្រយោជន៍ផងដែរ។
ការប្រុងប្រយ័ត្នជាទូទៅ
ប្រសិនបើរោគសញ្ញាដូចជា ឈឺទ្រូង ណែនទ្រូង ដកដង្ហើមខ្លីៗ ឬវិលមុខ កើតមានអំឡុងពេល ឬក្រោយពេលធ្វើលំហាត់ប្រាណ សូមអ្នកឈប់ធ្វើលំហាត់ប្រាណភ្លាម ហើយត្រូវទៅជួបគ្រូពេទ្យជាបន្ទាន់៕
