យើងអាចរក្សាទុកអាហារដែលញ៉ាំសល់បានបីទៅបួនថ្ងៃនៅក្នុងទូទឹកកក។ ដូច្នេះ ត្រូវប្រាកដថា អ្នកបានបរិភោគវាអស់ក្នុងអំឡុងពេលនេះ តែបើអ្នកមិនប្រាកដថាអ្នកនឹងអាចបរិភោគអាហារដែលញ៉ាំនៅសល់អស់ក្នុងរយៈពេលនេះទេ សូមដាក់អោយវាកកភ្លាមៗទើបជាការល្អ។
ការពុលអាហារបង្កឡើងដោយបាក់តេរីដែលមាននៅក្នុងអាហារកខ្វក់។ អ្នកមិនអាចដឹងទេថា អាហារនោះខូចគុណភាព ឬមានគ្រោះថ្នាក់ទេ ដោយសារតែបាក់តេរី ជាធម្មតាមិនធ្វើអោយផ្លាស់ប្តូររសជាតិ ក្លិន និងការមើលពីខាងក្រៅរបស់អាហារឡើយ។ ដូច្នេះ ប្រសិនបើអ្នកស្ថិតនៅក្នុងការសង្ស័យពីសុវត្ថិភាពអាហារទាំងនោះ ជាការល្អបំផុត គឺបោះវាចោលតែម្តងទៅ។ យ៉ាងណាមិញ ការរៀបចំទុកដាក់ និងចំអិនអាហារបានល្អអាចការពារបញ្ហាពុលអាហារបាន។
ដើម្បីមានសុវត្ថិភាពចំពោះចំនីអាហារដែលងាយខូច ដូចជាសាច់មាន់ ត្រី ទឹកដោះគោ និងស៊ុត សូមអ្នកកុំទុកវានៅខាងក្រៅច្រើនជាងពីរម៉ោង នៅសីតុណ្ហភាពច្រើនជាង ៣២ អង្សារសេ។ អាហារដែលមិនត្រូវការការចំអិន ដូចជាសាឡាត់ ឬសាំងវិច អ្នកគួរតែបរិភោគវាភ្លាមៗ ឬដាក់ក្នុងទូទឹកកកអោយបានឆាប់។
គោលដៅរបស់អ្នក គឺកាត់បន្ថយពេលវេលាដែលអាហារស្ថិតនៅក្នុងតំបន់គ្រោះថ្នាក់ (សីតុណ្ហភាពចន្លោះពី ៤ ទៅ ៦០ អង្សារសេ បាក់តេរីអាចបង្កើតកូនចៅបានយ៉ាងឆាប់រហ័ស)។
នៅពេលដែលអ្នកចង់បរិភោគអាហារនៅសល់វិញ សូមកំដៅអាហារទាំងនោះនៅលើចង្ក្រាន ឬនៅក្នុងមីក្រូវេវ រហូតដល់សីតុណ្ហភាព ៧៤ អង្សារសេ។ ដោយសារតែមិនអាចផ្តល់កំដៅបានគ្រប់គ្រាន់ ចង្ក្រានធម្មតាមិនត្រូវបានគេណែនាំអោយប្រើ ដើម្បីកំដៅអាហារដែលញ៉ាំនៅសល់នោះទេ៕