ការឈឺចាប់ក្នុងអាងត្រគៀកសម្តៅទៅលើការឈឺចាប់ក្នុងពោះដែលស្ថិតនៅខាងក្រោមរន្ធផ្ចិត។ ការឈឺចាប់បែបនេះអាចទាក់ទងនឹងបញ្ហាជំងឺជាច្រើន។ វាប្រហែលជាសញ្ញាដែលគ្មានគ្រោះថ្នាក់ដល់លទ្ធភាពនៃការមានកូនបានទេ។ ខាងក្រោមនេះគឺជាមូលហេតុខ្លះៗដែលធ្វើអោយអ្នកឈឺក្នុងអាងត្រគៀក៖
ជំងឺរលាកខ្នែងពោះវៀន
រោគសញ្ញារបស់ជំងឺរលាកខ្នែងពោះវៀនមានដូចជា ឈឺចាប់ដូចគេចាក់នៅផ្នែកខាងក្រោម និងស្តាំនៃពោះ, ក្អួត និងក្តៅខ្លួន។ បើសិនជាអ្នកមានសញ្ញាអស់ទាំងនេះ ចូរពិគ្រោះជាមួយគ្រូពេទ្យភ្លាម។ ខ្នែងពោះវៀនដែលមានការបង្ករោគត្រូវតែធ្វើការវះកាត់វាចោល។ ប៉ុន្តែបើសិនជាទុកចោលរហូតដល់ វាធ្លាយ ហើយរាល់ដាលការបង្ករោគពេញពោះវិញ វាអាចនឹងមានផលវិបាកគ្រោះថ្នាក់ធ្ងន់ធ្ងរដល់អាយុជីវិតបាន។
ចង្កោមរោគសញ្ញានៃការរលាកពោះវៀន (IBS)
ចង្កោមរោគសញ្ញានៃការរលាកពោះវៀនគឺជាជំងឺលើប្រព័ន្ធរំលាយអាហារបែបរ៉ាំរ៉ៃ ដែលធ្វើអោយកើតមានការឈឺចាប់នៅក្បាលពោះម្តងហើយម្តងទៀត, ឈឺចាប់បែបរមួល, ហើមពោះ, រាគ ឬទល់លាមក។ គ្រូពេទ្យមិនបានដឹងថាមូលហេតុរបស់វាជាអ្វីនោះទេ ប៉ុន្តែមានវិធីសាស្ត្រជាច្រើនដែលគាត់អាចគ្រប់គ្រងរោគសញ្ញាបាន។ វិធីសាស្ត្រទាំងនោះមានដូចជា ការផ្លាស់ប្តូររបបអាហារ, ការគ្រប់គ្រងស្ត្រេស, និងការប្រើថ្នាំដើម្បីព្យាបាលអាការៈរាគ ឬទល់លាមក។
ការឈឺចាប់ខ្លាំងពេលផ្ទុះបែកអូវុល
បើសិនជាអ្នកមានការឈឺចាប់ខ្លាំងពេលពាក់កណ្តាលវដ្តរដូវ មានន័យថានោះគឺជាអារម្មណ៍នៃការឈឺចាប់របស់រាងកាយដោយសារតែការផ្ទុះបែកអូវុលហើយ។ ក្នុងដំណាក់កាលនេះ ក្រពេញអូវ៉ែត្រូវបញ្ចេញមេជីវិតញីមកជាមួយនឹងទឹក និងឈាមមួយចំនួនដែលវាប្រហែលជាអាចបង្កការរលាកដល់ភ្នាសកម្រាលរបស់ពោះបាន។ ការឈឺចាប់ប្រហែលជាមានការផ្លាស់ប្តូរពីមួយខែទៅមួយខែ។ អាការៈនេះមិនមានគ្រោះថ្នាក់អ្វីនោះទេ ហើយច្រើនតែបាត់ទៅវិញក្នុងរយៈពេលពីរបីម៉ោងក្រោយ។
កូនក្រៅស្បូន
ជំងឺនេះគឺជាជំងឺដែលអាចគំរាមគំហែងដល់អាយុជីវិតអ្នកជំងឺបាន ដូច្នេះត្រូវតែមានការព្យាបាលភ្លាមៗ។ វាអាចកើតឡើងបាននៅពេលដែលការកាច់សម្បុករបស់អំប្រ៊ីយ៉ុងចាប់ផ្តើមធ្វើឡើងនៅកន្លែងផ្សេងក្រៅពីស្បូន ដែលជាញឹកញាប់គឺនៅបំពង់ដៃស្បូនតែម្តង។ រោគសញ្ញារបស់វាមានដូចជា ការឈឺចាប់ក្នុងអាងត្រគៀកដូចគេចាក់ ឬឈឺចាប់បែបរមួល (ជាពិសេសកើតឡើងតែម្ខាង),ហូរឈាមតាមទ្វារមាស, ចង្អោរ, និងវិលមុខ។ ជំងឺនេះត្រូវតែមានការយកចិត្តទុកដាក់ និងព្យាបាលបន្ទាន់។
ជំងឺកាមរោគ
ការឈឺចាប់ក្នុងអាងត្រគៀកគឺជាសញ្ញាប្រកាសអាសន្នមួយរបស់ជំងឺកាមរោគមួយចំនួន។ ជំងឺកាមរោគពីរប្រភេទដែលគេជួបប្រទះជាញឹកញាប់នោះគឺជំងឺប្រមេះទឹកថ្លា និងប្រមេះទឹកបាយ ដែលវាច្រើនតែកើតឡើងជាមួយគ្នាតែម្តង។ ជំងឺទាំងនេះមិនមែនតែងតែបង្កជារោគសញ្ញារហូតនោះទេ ប៉ុន្តែនៅពេលវាមានរោគសញ្ញា ប្រហែលជាធ្វើអោយឈឺចាប់ក្នុងអាងត្រគៀក, ឈឺខ្លាំងពេលនោម,ហូរឈាមនៅចន្លោះពេលមករដូវ និងហូរទឹករំអិលពីទ្វារមាសមិនធម្មតា។ យកល្អគួរតែស្វែងរកការព្យាបាលដើម្បីបង្ការផលវិបាកធ្ងន់ធ្ងរ និងចៀសវាងឆ្លងដល់ដៃគូ៕
