ខណៈពេលដែលការសម្រកទម្ងន់ហាក់បីដូចជាមិនអាចធ្វើទៅបានលើមនុស្សមួយចំនួន ប៉ុន្តែក៏មានអ្នកផ្សេងទៀតអាចធ្វើបានដែរ។ ដូច្នេះតើមានអ្វីដែលនៅពីក្រោយការបរាជ័យនេះ? ដូច្នេះចូរក្រពិនិត្យមើលកំហុសដែលកើតមានជាញឹកញាប់មួយចំនួនដែលមនុស្សបានធ្វើក្នុងពេលព្យាយាមសម្រកទម្ងន់របស់ពួកគេ។
មិនមានគម្រោងការរបបអាហារ
នៅពេលមនុស្សសម្រេចចិត្តសម្រកទម្ងន់ ពួកគេច្រើនតែគិតនូវអ្វីៗដែលអាចធ្វើបានដើម្បីអាចដូចបំណង ប៉ុន្តែនៅតែធ្វើវាមិនបានត្រឹមត្រូវទៀត។ ការប្រើប្រាស់វិធីហាត់ប្រាណមួយចំនួនច្រើនពេក ពួកគេនឹងភ្លេចពីការយកចិត្តទុកដាក់ចំពោះរបបអាហារបាន។ តាមពិតគឺថា របបអាហារគឺជារឿងដែលសំខាន់ជាងអ្វីៗផ្សេងទៅទៀតក្នុងការសម្រកទម្ងន់។ មនុស្សមួយចំនួនមិនបានរៀបចំគម្រោងរបបអាហារទេ ហើយបែរជាញ៉ាំអ្វីៗតាមតែចិត្តនឹកឃើញទៅវិញ។ ដូច្នេះវាប្រៀបបានដូចជាការធ្វើសង្គ្រាមមួយដោយគ្មានគម្រោងរៀបចំបានត្រឹមត្រូវអញ្ចឹង។ មធ្យោបាយដ៏ល្អបំផុតដើម្បីអាចយកឈ្នះបញ្ហានេះបានគឺពិភាក្សារឿងនេះជាមួយអ្នកឯកទេស និងរៀបចំរបបអាហារផ្ទាល់ខ្លួនដែលអាចធ្វើអោយអ្នកឆាប់សម្រេចគោលបំណង។ គម្រោងគួរតែធ្វើអោយបាន ព្រមទាំងប្តេជ្ញាចិត្តថានឹងធ្វើវាដល់ទីបញ្ចប់។
បង្កើនការញ៉ាំអាហារសរសៃ
មនុស្សជាច្រើនយល់ថា ការបង្កើនការញ៉ាំអាហារមានជាតិសរសៃនឹងធ្វើអោយពួកគេឆាប់ឆ្អែត និងជួយកុំអោយញ៉ាំច្រើនលើសចំណុះបាន ប៉ុន្តែពួកគេច្រើនតែមិនបានយកចិត្តទុកដាក់ក្នុងការបង្កើនការទទួលទានទឹកជាមួយអាហារសរសៃទាំងនោះ ដែលជាហេតុនាំអោយមានបញ្ហាដូចជាហើមពោះ និងទល់លាមកបាន។ មធ្យោបាយដ៏ត្រឹមត្រូវដើម្បីបង្កើនការទទួលទានអាហារសរសៃ នោះគួរតែធ្វើផ្សំគ្នានឹងការទទួលទានទឹកដែរ។
មិនញ៉ាំអាហារមានជាតិខ្លាញ់
ការសិក្សាមួយនៅចក្រភពអង់គ្លេសបានរកឃើញថា គម្រោងនៃការសម្រកទម្ងន់ជាច្រើនបានក្លាយទៅជាផលិតផលដែលគ្មានជាតិខ្លាញ់ ឬកាឡូរីទាប។ អាហារគ្មានជាតិខ្លាញ់ និងកាឡូរីទាបប្រើប្រាស់ជាតិស្ករសម្បនិមិត្ត និងសារធាតុថែរក្សាអាហារអោយបានយូរជាច្រើនដែលអាចមានគ្រោះថ្នាក់ច្រើនជាងការញ៉ាំអាហារមានជាតិខ្លាញ់ ឬស្ករនៅក្នុងខ្លួនរបស់ពួកគេទៅទៀត។ ដូច្នេះ យកល្អគួរតែរៀបចំគម្រោងរបបអាហារជាមួយអ្នកជំនាញខាងអាហារូបត្ថម្ភ។
ហាត់ប្រាណពង្រឹងបេះដូងច្រើនពេក
អ្នកដែលចង់សម្រកទម្ងន់ច្រើនតែចំណាយពេលច្រើនម៉ោងក្នុងការហាត់ប្រាណដើម្បីពង្រឹងដល់ប្រព័ន្ធបេះដូង-សរសៃឈាម។ ការហាត់ប្រាណទាំងនេះពិតជារំលាយជាតិខ្លាញ់បាន ប៉ុន្តែអ្វីដែលគួរអោយបារម្ភនោះគឺថាវាមានសម្ពាធលើរាងកាយក្នុងពេលកំហាត់។ ការដែលហាត់ប្រាណបែបនេះច្រើនពេក វានឹងបង្កើនការផលិតអ័រម៉ូន Cortisol ដែលជាហេតុនាំអោយបង្កើនជាលិការខ្លាញ់ និងមានគ្រោះថ្នាក់ច្រើនជាងផលល្អ។ មធ្យោបាយសម្រាប់បញ្ហានេះគឺត្រូវមានពេលសម្រាកខ្លះទើបជាការប្រសើរ។ ការហាត់ប្រាណដែលមានចន្លោះពេល ដូចជាការជិះកង់ក្នុងល្បឿនលឿនរយៈពេល ៥នាទីគឺមានប្រសិទ្ធភាពជាងការដើរលើម៉ាស៊ីនហាត់កីឡារយៈពេល ៣០នាទីទៅទៀត៕
