តើអ្នកកំពុងតែអស់សង្ឃឹមនឹងវិធីផ្តាច់បារីដែលមិនមានប្រសិទ្ធភាពមែនទេ? ចុះអ្នកចង់ដឹង ឬសាកល្បងប្រើប្រាស់អាហារមួយចំនួនដើម្បីជួយអោយអ្នកអាចយកឈ្នះរឿងនេះដែរទេ? យើងដឹងថា រឿងនេះស្តាប់មើលទៅដូចជាមិនងាយស្រួលធ្វើដូចនិយាយនោះទេ ប៉ុន្តែមានអាហារ និងបន្លែមួយចំនួនប្រហែលជាអាចជួយបានមួយចំនួនដែរ។
បារីមួយដើមមានសារធាតុគីមីប្រហែល ៤៨០០ប្រភេទ ហើយក្នុងនោះមាន ៦៩ប្រភេទធ្វើអោយកើតជាជំងឺមហារីក។ អ្នកដែលស្រូបផ្សែងបារីពីគេក៏ទទួលបានជាតិគីមី។ ដូច្នេះការជក់បារីមិនគ្រាន់តែផ្តល់ផលរំខានដល់អ្នកជក់បុណ្ណោះទេ ប៉ុន្តែក៏ធ្វើបាបដល់អ្នកជុំវិញខ្លួនផងដែរ។ ការជក់បារីធ្វើអោយមានជំងឺមហារីកសួត, ជំងឺបេះដូង-សរសៃឈាម,ជំងឺ Emphysema ព្រមទាំងមានបញ្ហាដល់លទ្ធភាពនៃការមានកូនទៀតផង។
ទឹកដោះគោ
បើយោងទៅតាមការស្រាវជ្រាវដែលធ្វើឡើងដោយសាកលវិទ្យាល័យ Duke បានអោយដឹងថា ទឹកដោះគោអាចជួយកាត់បន្ថយការស្រេកឃ្លានជក់បារីបាន។ អ្នកស្រាវជ្រាវបានប្រាប់អោយដឹងថា ទឹកដោះគោនៅសល់រស់ជាតិក្នុងមាត់របស់អ្នកជក់បារីក្រោយពីញ៉ាំទឹកដោះគោរួចដើម្បីអាចអោយពួកគេអាចផ្តាច់បារីបាន។ ជាមួយគ្នានេះដែរ ចំនួនប្រូតេអ៊ីនដ៏ខ្ពស់ក្នុងទឹកដោះគោមានប្រយោជន៍ក្នុងការផ្តល់ជាថាមពលនៅពេលអ្នកអស់សង្ឃឹមដោយសារតែការស្រេកឃ្លានជាតិនីកូទីន។ ដូច្នេះគ្រប់ពេលដែលអ្នកមានអារម្មណ៍ចង់ជក់បារី ចូរជំនួសវិញដោយការផឹកទឹកដោះគោវិញ។ ទឹកដោះគោយ៉ាអួ ឬដុំហ្វ្រូម៉ាតក៏មានគុណភាពល្អស្មើគ្នានឹងទឹកដោះគោដែរ។
ការ៉ុត
វេជ្ជបណ្ឌិត ជែម អេ ឌូក (James A. Duke, PhD) អ្នកឯកទេសខាងរុក្ខសាស្ត្រនៅឯ USDA’s Agricultural Research Service ក្នុងរដ្ឋម៉ារីឡែន និយាយថា “បើសិនជាបារីគឺជាអ្នកបង្កជំងឺមហារីក ការ៉ុតអាចប្រើជាថ្នាំប្រឆាំងនឹងជំងឺបែបនេះបាន”។ ទម្លាប់ផ្ទាល់ខ្លួនរបស់គាត់តែម្តងនោះគឺជក់បារីរហូតដល់ ៣កញ្ចប់ក្នុងមួយថ្ងៃ។ គាត់បានប្រាប់អោយដឹងថា ការ៉ុតដើរតួនាទីយ៉ាងសំខាន់ក្នុងការជួយផ្តាច់ការជក់បារី។ សមាសធាតុដែលមានឈ្មោះថា Carotenoids ក្នុងការ៉ុតមិនគ្រាន់តែជួយអោយអ្នកផ្តាច់បារីបានទេ ប៉ុន្តែវាក៏ជួយអ្នកពីជំងឺមហារីកបានដែរ។
គ្រាប់ផ្កាឈូករ័ត្ន
អ្នកស្រាវជ្រាវបានប្រាប់អោយដឹងថា គ្រាប់ផ្កាឈូករ័ត្នមានឥទ្ធិពលចំពោះការផ្តាច់បារី ដូចជាវាជួយបង្កើនការផលិតអ័រម៉ូន Adrenaline។ គ្រាប់ផ្កាឈូករ័ត្នមិនគ្រាន់តែមានឥទ្ធិពលជួយអោយអារម្មណ៍ស្ងប់ស្ងាត់ប៉ុណ្ណោះទេ ប៉ុន្តែវាក៏ផ្ទុកទៅដោយវីតាមីន Bកំផ្លេចសម្រាប់ជួយជាអាហារូបត្ថម្ភដល់ប្រព័ន្ធសរសៃប្រសាទផងដែរ។ នេះគឺជាជម្រើសដ៏ល្អមួយសម្រាប់ការផ្តាច់បារី ប៉ុន្តែការញ៉ាំច្រើនពេកមិនល្អព្រោះវាមានជាតិខ្លាញ់ច្រើន។
ផ្លែចេក
ការសិក្សាថ្មីៗនេះបានរកឃើញថា ផ្លែចេកអាចជួយផ្តាច់បារីបាន។ បញ្ហាដែលកើតមានជាញឹកញាប់បំផុតដែលផ្តាច់បារីតែងតែជួបប្រទះនោះគឺ អស់កម្លាំង និងស្ត្រេសចំពោះការផ្តាច់បារីតែម្តង។ ផ្លែចេកដែលជាមិត្តដ៏ល្អនោះ សម្បូរទៅដោយវីតាមីន និងជាតិរ៉ែសំខាន់ៗដែលអាចជួយបង្កើនថាមពល និងអារម្មណ៍ធូរស្រាលពីការស្រេកឃ្លានជាតិនីកូទីនបាន។ គ្រប់ពេលដែលអ្នកមានអារម្មណ៍ចង់ជក់បារីខ្លាំណាស់ ចូរញ៉ាំផ្លែចេកមួយផ្លែទៅ។