ថ្លើមរបស់មនុស្សគឺជាសរីរាង្គដ៏សំខាន់សម្រាប់មនុស្សអាចរស់នៅមានសុខភាពល្អបាន។ មុខងារដំបូងរបស់វាគឺទៅបំបែកសារធាតុចិញ្ចឹមដែលបានមកពីអាហារដែលយើងបានញ៉ាំ និងជំនួយដល់ការរំលាយអាហារ។ វានៅមានមុខងារជាច្រើនផ្សេងៗទៀតដែលត្រូវយកចិត្តទុកដាក់ទៅលើសុខភាពរបស់វាតែម្តង។ ខាងក្រោមនេះគឺជារោគសញ្ញានៃការខូចថ្លើមដែលអ្នកគួរតែយកចិត្តទុកដាក់។
ការប្រែប្រួលស្បែក
រោគសញ្ញាមួយដែលអាចមើលឃើញបបានថាខូចថ្លើមនោះគឺការប្រែប្រួលពណ៌របស់ស្បែក។ បើសិនជាស្បែកចាប់ផ្តើមប្រែទៅជាស្លេក ឬលឿង ហើយចុងក្រចកទៅជាពណ៌លឿងដែរនោះ មានន័យថាថ្លើមមិនកំពុងតែបំពេញមុខងាររបស់ខ្លួនបានល្អឡើយ ហើយត្រូវការព្យាបាលថែមទៀតផង។ ក្នុងករណីស្បែកទើបតែប្រែជាពណ៌លឿងព្រឿងៗថ្មីៗ វាអាចដោយសារតែថ្លើមមិនបានបញ្ចេញជាតិពុលអស់ពីក្នុងខ្លួន ដែលជាហេតុនាំអោយជាតិ Bilirubin កើនឡើងច្រើននៅក្រោមស្បែក។
ប្រែប្រួលពោះ
ថ្លើមមានទីតាំងនៅក្បែរឆ្អឹងជំនីរ ហើយនៅពេលសុខភាពថ្លើមចាប់ផ្តើមថយចុះ វានឹងធ្វើអោយឈឺចាប់នៅក្នុងពោះផ្នែកខាងក្រោមរបស់ឆ្អឹងជំនីរខាងស្តាំ។ ជំងឺទាចទឹកអាចកើតឡើងបានបើសិនជាបញ្ហាមិនព្រមព្យាបាល។
មានអារម្មណ៍ថាឧស្សាហ៍ហើមពោះ
បើសិនជាអ្នកឧស្សាហ៍មានអាការៈហើមពោះដោយសារតែសម្ពាធរបស់លាមក អាចជាសញ្ញាបញ្ជាក់ថា ថ្លើមមិនអាចបញ្ចេញរសារធាតុដើម្បីរំលាយអាហារបាន។ រឿងនេះក៏អាចបញ្ជាក់ទៀតថា ប្រព័ន្ធរំលាយអាហារត្រូវបានប៉ះពាលដោយសារតែបញ្ហាថ្លើម។
អស់កម្លាំង
នៅពេលថ្លើមបំពេញមុខងារដើម្បីរំលាយអាហារ វានឹងបញ្ចេញថាមពលដើម្បីប្រើប្រាស់លើមុខងារជាច្រើនប្រចាំថ្ងៃ។ ការដែលងាយនឹងអស់កម្លាំង គឺជាសញ្ញាមួយនៃការកង្វះថាមពលដែលបញ្ជាក់ថាថ្លើមមិនអាចបំពេញមុខងាររបស់វាបានយ៉ាងល្អនោះទេ។
ប្រែប្រួលទឹកនោម
នៅពេលថ្លើមចាប់ផ្តើមខូចខាត ពណ៌ទឹកនោមនឹងប្រែទៅជាលឿងខាប់។ វាប្រហែលជាអាចទៅជាពណ៌ដូចឈាម ឬដូចជ័របារី។ មនុស្សមួយចំនួនយល់ថា ការប្រែប្រួលពណ៌របស់ទឹកនោមនេះដោយសារតែការខ្សោះជាតិទឹក ដូច្នេះបើសិនជាអ្នកផឹកទឹកបានគ្រប់គ្រាន់ហើយនៅតែមានបញ្ហាបែបនេះទៀត វាពិតជាបណ្តាលមកពីថ្លើមមានសុខភាពមិនល្អហើយ។
រមាស់ស្បែក
សញ្ញាមួយដែលបញ្ជាក់ថាមានបញ្ហាថ្លើមនោះគឺទាក់ទងនឹងការរមាស់ស្បែក។ បើសិនជាអ្នកសម្គាល់ឃើញថាមានការរមាស់នៅតំបន់ណាមួយលើស្បែក ដែលចេះតែបន្តធ្ងន់ទៅៗ នោះវាអាចក្លាយទៅជាសញ្ញារបស់បញ្ហាថ្លើមហើយ។
ចង្អោរ
បញ្ហារំលាយអាហារដូចជា ក្រពះមិនកិន និងការច្រាលអាស៊ីតក្រពះមកបំពង់កគឺជាសញ្ញានៃការខូចខាតរបស់ថ្លើម។ បើសិនជាបញ្ហារំលាយអាហារ ឬចង្អោមិនធូរស្បើយមកវិញជាមួយនឹងការផ្លាស់ប្តូររបបអាហារទេ នោះវាគឺជាសញ្ញានៃបញ្ហាថ្លើមហើយ។ ក្នុងករណីធ្ងន់ធ្ងរ វាក៏ប្រហែលជាធ្វើអោយក្អួតបាន។
ស្រកទម្ងន់ខ្លាំង
ការដែលស្រកទម្ងន់ភ្លាមៗ ដោយមិនដឹងខ្លួនអាចក្លាយទៅជារោគសញ្ញាមួយនៃបញ្ហាថ្លើម។ បើសិនជាអ្នកស្រកទម្ងន់ដោយមិនមានគម្រោងនោះទេ វាប្រហែលជាបណ្តាលមកពីការបាត់បង់ចំណង់អាហារដោយសារតែថ្លើមខ្សោយ ទើបធ្វើអោយអ្នកទៅជាស្គម និងកង្វះអាហាររូបត្ថម្ភបែបនេះ។
ចាល់ជាតិទឹក
ការចាល់ជាតិទឹកក្នុងខ្លួនជាច្រើនកន្លែង ជាពិសេសជើង គឺជាសញ្ញាមួយនៃអាការៈថ្លើមខ្សោយ។ បញ្ហាបែបនេះអាចកើតឡើងនៅកែងជើង, ប្រអប់ដៃ, ប្រអប់ជើង និងភ្លៅ។ បើសិនជាអ្នកសង្កត់ម្រាមដៃថ្នមៗទៅលើកន្លែងដែលហើមនោះ វានឹងធ្វើអោយមានស្នាមទ្រុឌនៅកន្លែងហើមនោះជាប់រយៈពេលពីរទៅបីវិនាទី។
លាមកប្រែប្រួល
ការប្រែប្រួលលាមកអាចបញ្ជាក់អំពីបញ្ហាថ្លើមជាច្រើន។ បើសិនជាអ្នកសង្កេតឃើញថាមានវត្តមានឈាមក្នុងបន្ទប់ទឹក ចូរប្រាប់គ្រូពេទញយអោយដឹងភ្លាម។ សញ្ញាផ្សេងៗទៀតនៃអាការៈខូចថ្លើមដែលទាក់ទងនឹងលាមកប្រហែលជាធ្វើអោយទល់លាមកមួយរយៈ ឬរចង្កោមរោគសញ្ញារលាកពោះវៀនបាន៕