Join with Health.com.kh on Telegram

​ដុំ​សាច់​ក្នុង​ស្បូន គឺជា​ការលូតលាស់​ដុំ​សាច់​មួយ​ប្រភេទ ដែល​មិនមែន​មហារីក ហើយ​ច្រើន​តែ​កើតមាន ក្នុង​វ័យ​បន្ត​ពូជ​។ ដុំ​សាច់​ក្នុង​ស្បូន អាច​ហៅថា Uterine Fibroid, Leimyomas ឬ Myomas​។ ដុំ​សា​ច់នេះ​មិន​មាន​ទំនាក់ទំនង ដែល​ធ្វើឱ្យ​ប្រឈម​កាន់តែ​ខ្លាំង​នឹង ជំងឺមហារីក​ស្បូន​ឡើយ​។

​ដុំ​សាច់​ក្នុង​ស្បូន កើត​ឡើង​ចេញ​ពី ជាលិកា​សាច់ដុំ​រលោង (Myometrium)​។ ដុំ​សាច់​ភាគច្រើន ដែល​ធ្លាប់​កើតមាន ក្នុងពេល​មាន​ផ្ទៃពោះ នឹង​រួច​ស្វិត​វិញ ឬ​បាត់​ទៅ​វិញ ក្រោយ​ពី​សម្រាលកូន​រួច ជា​ពិសេស​ពេល​ស្បូន​វិវត្ត​ទៅ​ទំហំ​ធម្មតា​វិញ​។

​ស្ត្រី ៣ នាក់​ក្នុងចំណោម ៤ តែងតែ​មាន​ដុំ​សាច់​ក្នុង​ស្បូន ក្នុង​ពេលវេលា​ណាមួយ​ក្នុង​ជីវិត ប៉ុន្តែ ភាគច្រើន គឺ​ពួកគេ​មិន​បានដឹងថា ខ្លួនឯង​មាន​វា​ឡើយ ព្រោះ​វា​មិន​បង្ក​ជា រោគសញ្ញា​អ្វី​ឡើយ​។ គ្រូពេទ្យ​អាច​នឹង​រកឃើញ ដុំ​សា​ច់នេះ​ដោយ​ចៃដន្យ ក្នុង​ពេល​ពិនិត្យ​ក្នុង​អាង​ត្រគាក ឬ​ថត​អេកូ តាមដាន​កូន​ក្នុង​ផ្ទៃពោះ​។

​មាន​កត្តា​មួយចំនួន​តូច ដែល​អាច​ប្រឈម​នឹង ដុំ​សាច់​ក្នុង​ស្បូន​ដែរ ដូចជា ៖
•​    ​ដំណរ​ពូជ ៖ បើសិន​ជា​ម្តាយ ឬ​បងប្អូន​ស្ត្រី មាន​ដុំ​សាច់​ក្នុង​ស្បូន​ហើយ នោះ​អ្នក​ក៏​ប្រឈម​នឹង​ជំងឺ​នេះ កាន់តែ​ខ្លាំង​ដែរ​។
•​    ​ជាតិ​សាសន៍ ៖ ស្ត្រី​ស្បែក​ខ្មៅ ប្រឈម​នឹង​ការកើត​ដុំ​សាច់​នៅ​ស្បូន ច្រើន​ជាង​ស្ត្រី​ស្បែក​ស ឬ​ពណ៌​ស្បែក​ផ្សេងៗ​ទៀត​។ ក្រៅពីនេះ ស្ត្រី​ស្បែក​ខ្មៅ ក៏​កើត​ដុំ​សាច់ នៅ​អាយុ​វ័យក្មេង និង​មាន​ទំហំ​ធំៗ​ដែរ​។
•​    ​កត្តា​ផ្សេងៗ​ទៀត ៖ នៅ​ពេល​ចាប់ផ្តើម​មក​រដូវ នៅ​អាយុ​ក្មេង​ពេក​ពេក ការ​ញ៉ាំ​អាហារ​សម្បូរ​សាច់​ក្រហម និង​មិនសូវមាន​ជាតិ​បន្លែ​ពណ៌​បៃតង និង​ផ្លែឈើ ព្រមទាំង​ញ៉ាំ​គ្រឿង​ស្រវឹង​ទៀត នោះ​វា​នឹង​ប្រឈម​កាន់តែខ្លាំង នឹង​ការ​កើត​ដុំ​សាច់​ក្នុង​ស្បូន​ដែរ​៕