ការចាស់ទៅតាមអាយុគឺជាដំណើរការធម្មជាតិមួយប្រភេទដែលគ្មាននរណាម្នាក់អាចចៀសផុតបានឡើយ។ ប៉ុន្តែមានអាហារ និងផ្លែឈើពីធម្មជាតិមួយចំនួនអាចបន្ថយល្បឿនរោគសញ្ញានៃការចាស់ទៅតាមអាយុបាន។ ទោះបីជាមានក្រែមប្រឆាំងនឹងការចាស់ទៅតាមអាយុ និងផលិតផលថែរក្សាសម្ផស្សមួយចំនួនដាក់លក់នៅលើទីផ្សាក៏ដោយ ប៉ុន្តែអ្វីដែលល្អបំផុត, សុវត្ថិភាពបំផុត និងមានប្រសិទ្ធភាពនោះគឺធ្វើទៅតាមធម្មជាតិ។ ខាងក្រោមនេះគឺជាបន្លែ និងផ្លែឈើមួយចំនួនដែលអាចប្រើប្រាស់ដើម្បីបន្ថយរោគសញ្ញានៃការចាស់ទៅតាមអាយុបាន។
ទឹក
ទឹកគឺជាផ្នែកមួយដ៏សំខាន់បំផុតសម្រាប់តម្រូវការរបស់រាងកាយ ព្រោះកោសិកាទាំងអស់របស់មនុស្សមានជាតិទឹក ៩៨ភាគរយឯណោះ។ មនុស្សម្នាក់ត្រូវតែផឹកទឹកយ៉ាងហោចណាស់ ៨កែវជារៀងរាល់ថ្ងៃ ព្រោះវាគ្មានកាលឡូរី និងសារធាតុគីមីអ្វីទាំងអស់។ វានឹងជួយអោយស្បែកមានភាពស្រស់ថ្លា និងលូតលាស់ ព្រមទាំងបញ្ចេញជាតិពុលដែលគ្រោះថ្នាក់ទាំងអស់ពីក្នុងខ្លួន ព្រមទាំងធ្វើអោយស្បែកស្អាត។
ស្រាក្រហម
ស្រាក្រហមក៏ត្រូវបានគេចាត់ទុកថាជាអាហារប្រឆាំងនឹងការចាស់ទៅតាមអាយុផងដែរ។ គេជឿថា ការផឹកស្រាក្រហមនឹងជួយបន្ថយភាពចាស់របស់កោសិកាព្រោះស្រាផ្ទុកទៅដោយសារធាតុ Resveratrol។ ប៉ុន្តែមនុស្សម្នាក់គួរតែផឹកស្រាក្នុងកម្រិតមធ្យមបានហើយដើម្បីចៀសវាងពីផលរំខានរបស់វា។
តែបៃតង
តែបៃតងគឺជាថ្នាំបូរាណមួយប្រភេទដែលផ្ទុកទៅដោយសារធាតុធម្មជាតិចម្រុះ សម្រាប់ជួយអោយរាងកាយមានសុខភាពល្អ, ជួយអោយស្បែកស្រស់ថ្លា និងលូតលាស់។ តែបៃតងបំពេញតួនាទីជាអង់ទីអុកស៊ីដង់ ដែលល្អបំផុតសម្រាប់ស្បែកដែលស្រស់ស្អាត។
យ៉ាអួ
យ៉ាអួផ្ទុកទៅដោយជាតិកាលស្យូមសម្រាប់ជួយថែរក្សាសុខភាពឆ្អឹងអោយនៅមាំល្អ និងបង្ការកុំអោយមានជំងឺពុកឆ្អឹងទៀតផង។ យ៉ាអួក៏ផ្ទុកទៅដោយបាក់តេរីមានប្រយោជន៍ជាច្រើនសម្រាប់ជួយថែរក្សាប្រព័ន្ធរំលាយអាហារ និងធ្វើអោយមនុស្សមានសុខភាពល្អ និងមើលទៅក្មេងជាងវ័យ។
គ្រាប់ធញ្ញជាតិ
គ្រាប់ធញ្ញជាតិផ្ទុកទៅដោយអង់ទីអុកស៊ីដង់, ជាតិរ៉ែ និងខ្លាញ់ Unsaturated Fat មួយចំនួនដែលជាតម្រូវការរបស់រាងកាយ។ ការញ៉ាំគ្រាប់ធញ្ញជាតិក្នុងកម្រិតមធ្យមជួយអោយរាងកាយមានសុខភាពល្អ, ផ្តល់ជាជាតិខ្លាញ់ដែលត្រូវការ និងការពាររាងកាយពីជំងឺមហារីកទៀត។
ត្រី
ត្រីសម្បូរទៅដោយជាតិខ្លាញ់អូមេហ្គាបី។ ការញ៉ាំត្រីពីរដងក្នុងមួយថ្ងៃជួយបង្ការជំងឺគាំងបេះដូងបាន ព្រោះអូមេហ្គាបីអាចការពារបេះដូងកុំអោយដើរខុសចង្វាក់ និងគ្រប់គ្រងកម្រិតកូឡេស្តេរ៉ុលក្នុងខ្លួន។
សរុបសេចក្តីមក អាហារ, ផ្លែឈើ និងបន្លែធម្មជាតិគឺជារបស់សំខាន់ និងមានប្រសិទ្ធភាពក្នុងការទប់ស្កាត់ភាពចាស់បានល្អជាងផលិតផលដែលដាក់លក់នៅលើទីផ្សា។ មនុស្សម្នាក់គួរតែមានគម្រោងញ៉ាំរបបអាហារអោយបានត្រឹមត្រូវដើម្បីចៀសវាងរោគសញ្ញានៃការចាស់ទៅតាមអាយុ៕