Join with Health.com.kh on Telegram

​ការ​មក​រដូវ គឺជា​រឿង​ធម្មតា ហើយក៏​ជា​ផ្នែក​មួយ​ធម្មជាតិ​របស់​មនុស្ស​ស្រី​ដែរ​។ ក្មេងស្រី​ដែល​ទើប​តែ​ជួប​បញ្ហា​នេះ​ច្រើនតែ​ជា​សញ្ញា​ដំបូង​នៃ​ការឈាន​ដល់​ភាព​ពេញវ័យ​ហើយ (​ជា​ពេលវេលា​មួយ​ដែល​ពួកគេ​ចាប់ផ្តើម​យល់​ថា​ខ្លួនឯង​ខ្ពស់​ជាង​មុន និង​សុដន់​ចាប់ផ្តើម​លូតលាស់​) ប៉ុន្តែ​វា​មិន​ដូចគ្នា​ទាំងអស់​នោះ​ទេ​។

​ស្ថិត​ត្រង់​ចំណុច​នេះ​ដែរ ក៏​មាន​ក្មេងស្រីៗ​ជាច្រើន​សួរ​មក​ខាង​យើងខ្ញុំ​ថា ពេល​មក​រដូវ​ម្តងៗ តើ​ត្រូវ​បាត់បង់​ឈាម​អស់​ប៉ុន្មាន​លីត្រ​ទៅ​?

រឿង​នេះ​បើ​ស្តាប់​ទៅ​គឺ​ទំនង​ណាស់ ហើយក៏​មាន​មនុស្ស​ជាច្រើន​ចង់ដឹង​ដែរ ប៉ុន្តែ​គ្រាន់តែ​មិន​ហ៊ាន​សួរ​ប៉ុណ្ណោះ​។ សូមបញ្ជាក់​ថា ឈាម​ដែល​ធ្លាក់​មក​ក្នុង​ពេល​មក​រដូវ​នោះ​ភាគច្រើន​គឺជា​ឈាម​មែន ប៉ុន្តែ​ធាតុ​ផ្សំ​របស់​វា​គឺ​ទឹក​រំអិល និង​ជាលិកា​ផ្សេងៗ​ទៀត​ដែល​កើតចេញពី​ភ្នាស​កម្រាល​របស់​ស្បូន​ប៉ុណ្ណោះ​។

ពេល​ខ្លះ​វា​ហាក់បីដូចជា មាន​ឈាម​ច្រើន​មែន ប៉ុន្តែ​ជាធម្មតា​វា​មាន​ចំនួន​មិន​ដល់ ១០០​មី​លី​លីត្រ​ឡើយ​។ បើសិន​ជា​អ្នក​ធាត់​រហូតដល់ ៥០​គីឡូក្រាម អ្នកនឹង​អាចមាន​ឈាម​ក្នុង​ខ្លួន​រហូតដល់ ៣,៥​លីត្រ ដូច្នេះ​ការបាត់បង់​ឈាម​ត្រឹម ១០០​មី​លី​លីត្រ​នឹង​មិន​បង្ក​ជា​បញ្ហា​អ្វី​ដល់​អ្នក​ឡើយ ព្រោះ​ឈាម​ដែល​បាត់បង់​នោះ​នឹង​ជំនួស​វិញ​ដោយ​ការបង្កើត​ថ្មី​ពី​ខួរឆ្អឹង​យ៉ាង​លឿន​។

ករណីខ្លះ ស្ត្រី​អាច​នឹង​ធ្លាក់​ឈាមរដូវ​ច្រើន ហើយ​ក៏​បាត់បង់​ឈាម​ច្រើន​ដែរ​។ ករណី​បាត់បង់​ឈាម​ច្រើន​បែប​នេះ នាង​អាច​នឹង​មាន​ជំងឺ​កង្វះ​គ្រាប់​ឈាម និង​ត្រូវការ​ជាតិ​ដែក​បន្ថែម​ពី​ក្នុង​របប​អាហារ ឬ​ថ្នាំ​គ្រាប់​ដើម្បី​ជួយ​បង្កើត​គ្រាប់​ឈាម​ឡើងវិញ​។ យក​ល្អ​គួរតែ​ពិគ្រោះ​ជាមួយ​គ្រូពេទ្យ​បើសិនជា​អ្នក​សម្គាល់​ឃើញថា ការ​មក​រដូវ​អ្នក​មាន​លក្ខណៈ​ធ្ងន់ធ្ងរ និង​មក​ច្រើនៗ​៕