ជារឿយៗ មនុស្សរាល់គ្នាអាចមានជំងឺទឹកនោមផ្អែម ហើយនឹងមិនបានដឹងអ្វីទាល់តែសោះពី រោគ សញ្ញា របស់វា។ មូលហេតុសំខាន់ ដែលនាំអោយពួកគេមានការធ្វេសប្រហេសដូចនេះនោះគឺ ដោយសារ តែពួកគេ យល់ ថាពួកវា ហាក់នឹងមិនមានផលប៉ះពាល់អ្វីដល់ពួកគេនោះទេ។ តែទោះជាយ៉ាងណា ក៏ដោយ កាលបើជំងឺទឹកនោម ផ្អែម កាន់តែឆាប់ ត្រូវបានធ្វើរោគវិនិច្ឆ័យដឹងមុន នោះគឺវានឹងមានឱកាស កាន់តែប្រសើរ ក្នុងការជៀសផុតបានពី ផល លំបាកធ្ងន់ធ្ងរជាច្រើន ដែលតែងតែកើតមាន ដោយសារជំងឺ ទឹកនោមផ្អែមនេះ ។
ទាំងនេះ គឺជាបញ្ជីរោគសញ្ញាជាទូទៅបំផុត របស់ជំងឺទឹកនោមផ្អែម ៖
១. នោមញឹក
តើអ្នកមានទៅបន្ទប់ទឹកបត់ជើងតូចញឹកញាប់ ជាងពេលធម្មតាទេ នាពេលថ្មីៗនេះ ? តើអ្នកមាន សម្គាល់ ឃើញថា ខ្លួនអ្នកបានចំណាយពេលជាច្រើន នៅក្នុងបន្ទប់ទឹកទេ? នៅពេលណា ដែលមានជាតិ គ្លុយកូស (ស្ករ) នៅក្នុងឈាម នោះអ្នកនឹងត្រូវធ្វើការបត់ជើងតូចញឹកញាប់ជាងពេលធម្មតា។ ប្រសិនបើ អរម៉ូនអាំងស៊ុយលីនរបស់អ្នក មិនមានប្រសិទ្ធភាព ឬ មិនមាននៅក្នុងខ្លួនអ្នក នោះតម្រងនោមអ្នក នឹងមិនអាចធ្វើការច្រោះជាតិស្ករ អោយត្រលប់ចូលទៅក្នុងឈាមបានវិញនោះទេ។ តម្រងនោមនឹង យក ជាតិទឹកពីក្នុងឈាមអ្នក ដើម្បីពង្រាវជាតិគ្លុយកូស ដែលនឹងកកពេញនៅក្នុងប្លោកនោមរបស់អ្នក ។
២. ស្រេកទឹកខ្លាំង
ប្រសិនបើអ្នកបានបត់ជើងតូចញឹកញាប់ ជាងធម្មតា នោះអ្នកនឹង ត្រូវការបំពេញមកវិញនូវ ជាតិទឹក ដែលបានបាត់បង់។ អ្នកនឹងត្រូវ ផឹកទឹកច្រើនជាងពេលធម្មតា។ តើអ្នកមានចាប់អារម្មណ៍ថា នាពេលថ្មីៗ នេះ អ្នកហាក់ផឹកទឹកច្រើនខុសពីមុន មែនដែរទេ?
៣. ឃ្លានខ្លាំង
នៅពេលដែលអរម៉ូនអាំងស៊ុយលីន នៅក្នុងឈាមអ្នកមិនបានធ្វើការ បានត្រឹមត្រូវល្អ ឬ មិនមានទាល់ តែសោះ ហើយកោសិការបស់អ្នក មិនបានទទួលយកថាមពលគ្រប់គ្រាន់ នោះខ្លួនប្រាណអ្នក អាចនឹងធ្វើ ការឆ្លើយតប ដោយការព្យាយាមស្វែងរកថាមពលបន្ថែម តាមរយៈការបរិភោគអាហារ។ ហេតុដូចនេះ អ្នកនឹងមានអារម្មណ៍ ស្រេកឃ្លានខ្លាំងខុសពីធម្មតា ។
៤. ឡើងទម្ងន់
វាអាចជាលទ្ធផល នៃរោគសញ្ញាខាងលើ ( ការស្រេកឃ្លានអាហារខ្លាំង ) ។
៥. ស្រកទម្ងន់ខុសពីធម្មតា
បញ្ហានេះ ច្រើនកើតមានជាទូទៅ ចំពោះក្រុមមនុស្សដែលកើតមាន ជំងឺទឹកនោមផ្អែមប្រភេទទី មួយ ។នៅពេលដែលខ្លួនប្រាណអ្នក មិនបានធ្វើការបង្កើត អាំងស៊ុយលីន នោះវានឹងត្រូវស្វែងរក ប្រភព ថាមពលដទៃទៀត ( កោសិកា មិនបានទទូលយកជាតិគ្លុយកូស) ។ ហើយជាលិកាសាច់ដុំ និង ខ្លាញ់ នឹងត្រូវបំបែក ថាមពល របស់ពួកវា។ ដោយសារតែជំងឺទឹកនោមផ្អែមប្រភេទទីមួយ គឺហាក់មានដំណើរការ កើតមានភ្លាមៗ ខុសពី ជំងឺទឹកនោម ផ្អែមប្រភេទទីពីរ ដែលច្រើនកើតមានបន្តិចម្តងៗ ហេតុដូចនេះហើយ ទើបបានជាការស្រកទម្ងន់ ច្រើនកើតមាន ចំពោះអ្នកជំងឺ ដែលមានជំងឺទឹកនោមផ្អែមប្រភេទទីមួយ ។
៦. សភាពអស់កម្លាំង មានការកើនឡើង
ប្រសិនបើអរម៉ូនអាំងស៊ុយលីនរបស់អ្នក មិនមានដំណើរការបានត្រឹមត្រូវ ឬ មិនមានទាល់តែសោះ នោះជាតិគ្លុយកូស នឹងមិនអាចចូលទៅក្នុងកោសិកា និង ផ្តល់ថាមពលដល់ពួកវាបាននោះទេ។ ហើយ បញ្ហានេះ នឹងអាចធ្វើអោយអ្នក មានអារម្មណ៍ថាអស់កម្លាំងជាខ្លាំង ។
៧. មានចិត្តស្រាល
ការមានអារម្មណ៍ឆាប់ខឹង អាចកើតមានដោយសារតែ អ្នកមិនសូវមានថាមពលក្នុងខ្លួន។
៨. ព្រិលភ្នែក
វាអាចកើតមានដោយសារតែ ជាលិកាត្រូវបានទាញចេញ ពីកញ្ចក់ភ្នែករបស់អ្នក។ វាអាចប៉ះពាល់ ដល់សមត្ថភាពរបស់ភ្នែក ក្នុងការមើលឃើញ។ ជាមួយនឹងការព្យាបាលបានត្រឹមត្រូវ នោះបញ្ហានេះនឹង អាចធ្វើការព្យាបាលជា។ នៅក្នុងករណីធ្ងន់ធ្ងរ អ្នកជំងឺអាចនឹងកើតមាននូវ ការពិការភ្នែក ឬ ភាពយូរអង្វែងនៃបញ្ហាក្នុងការមើលឃើញ ។
៩.ស្នាមមុត និង ជាំ គឺមិនបានជាសះស្បើយបានល្អ ឬ ភ្លាមៗនោះទេ
តើអ្នកមិនសម្គាល់ឃើញថា ស្នាមមុត និង ជាំរបស់អ្នក ហាក់នឹងចំណាយពេលច្រើនជាងធម្មតា ក្នុងការជាសះស្បើយមែនដែរទេ? នៅពេលណា ដែលមានជាតិស្ករនៅក្នុងខ្លួនអ្នកមានច្រើន នោះសម្តម្ថភាព ក្នុងការជាសះស្បើយបានដោយខ្លួនវា នឹងត្រូវបានកាត់បន្ថយ ។
១០. មានការបង្ករោគនៃមេរោគផ្សិត
នៅពេលដែលមានជាតិស្ករច្រើន នៅក្នុងរាងកាយអ្នក នោះសម្តម្ថភាពនៃការជាសះស្បើយ ពី ជំងឺ ផ្សិតនេះ នឹងត្រូវរងផលប៉ះពាល់។ ស្ត្រីដេលមានជំងឺទឹកនោមផ្អែម បានសម្គាល់ឃើញជាពិសេសថា ពួកគេមានភាពពិបាក ក្នុងការជាសះស្បើយពីការបង្ករោគ នៅក្នុងប្លោកនោម និង ទ្វារមាស។
១១.រមាស់ស្បែក
មានអារម្មណ៍ថា រមាស់នៅលើស្បែក ដែលពេលខ្លះ វាគឺសញ្ញានៃជំងឺទឹកនោមផ្អែម។
១២. អញ្ចាញធ្មេញឡើងក្រហម ឬ ប៉ោង, អញ្ចាញសណ្តកចេញពីធ្មេញ
ប្រសិនបើអញ្ចាញធ្មេញរបស់អ្នកឡើងតឹងណែន, ក្រហម ឬ ហើមប៉ោង នោះវាអាចជាសញ្ញា របស់ ជំងឺទឹកនោមផ្អែម។ ធ្មេញរបស់អ្នក អាចចាប់រលុង តាមដែលវាចាប់សណ្តកចេញពីអញ្ចាញ ។
១៣. មានជំងឺអញ្ចាញធ្មេញ និង មានការបង្ករោគជាញឹកញាប់
រួមផងដែរនូវសញ្ញានៃអញ្ចាញធ្មេញពីមុនមក នោះអ្នកអាចនឹងជួបប្រទះផងដែរ នូវជំងឺអញ្ចាញធ្មេញ និង ការបង្ករោគនៅទីនោះ ជាញឹកញាប់ខុសពីធម្មតា។
១៤. មិនមានមុខងារផ្នែកផ្លូវភេទ ចំពោះបុរស
ប្រសិនបើអ្នកមានអាយុលើសពី ៥០ឆ្នាំ និង ធ្លាប់មាននូវប្រវត្តិជារឿយៗ ឬ ការមិនមានមុខងារផ្នែក ផ្លូវភេទជាបន្ត (ប្រដាប់ភេទមិនឡើងរឹង) នោះវាអាចជាសញ្ញានៃជំងឺទឹកនោមផ្អែម ។
១៥. មានអារម្មណ៍ថា ស្ពឹក ឬ ឈឺចាក់ឆៀបៗ ជាពិសេសនៅត្រង់ជើង និង ដៃ
ប្រសិនបើមានជាតិស្ករច្រើនជ្រុល នៅក្នុងរាងកាយ នោះសសៃប្រសាទរបស់អ្នក អាចនឹងត្រូវបាន បំផ្លាញ ក៏រួមផងដែរនូវសសៃប្រសាទតូចៗ ដែលត្រូវចិញ្ចឹមពួកវាផងដែរ។ អ្នកអាចនឹងមានអារម្មណ៍ នូវការឈឺចាក់ឆៀបៗ ឬ ស្ពឹក នៅត្រង់ដៃ និង ជើងរបស់អ្នក ៕